Read Phom Naga KAHBHAO 39 Bible Online

KAHBHAO 39 - Phom Naga bible

KAHBHAO 39

¹Shaang Joseph-ü Ishmael am shennyak hüki müei Ijiplei yiüjapü Pharaohlei lakchongbü, ongshem yombüthülei mübü Potiphar-i shakteke.

²SHEMBÜPA Joseph mü nyu, hatü lemphü aokpü shennyak lei; büpa Ijip am büpalei shembü amei shemei nyu.

³Büpa mü SHEMBÜPA nyüke shei büpalei shembüi veiaok, hatü büpai dükpü lemphü kü SHEMBÜPAi moihimanteke.

⁴Hanangkü Potiphar-i Joseph kü monghah-ei deih, hatü büpalei shemei nyupü lemphü kü büpai veibü vaihen dousho shaei tuh.

⁵Hahepak kübü büpai jomei shem kempü hatü büpai angpü lemphü shangkü büpai veihen tuh, hatü Josephei SHEMBÜPAi hapa Ijip am shemong kü moihiman. Potiphar am angpü lemphüli kü shemei vaituh, kah kü vaituh SHEMBÜPAi moihimanteke.

⁶Hanangkü büpai angpü lemphü Joseph-i veihen junghen tuh; büpai hahying hahpü kü kenhingpü mü lenei lebü mehe kao mong-aaei nedeih.

⁷Shaang Joseph-ü shaohi-ang meishi nethe meishi nyu, hatü kanja nyupheikü büpalei shembülei chenyühai Joseph lümei deih, hatü pinnyüi, “Ngei mü shikütuh” shei e.

⁸Shejao büpai ha nemongi büpalei shembülei chenyüha kü, “Veituh, ngelei shembüi shemei nyupü mepa kao mongne-aanyih; büpai angpü peü ngelei lak kü shuoh-ei nyüpeih.

⁹Hapa shem kü ngei mü longpü üpayao neshiü. Nüng mü lenei ngelei shembüi ngei kü neshuohpü meheyao neshiü; mehenangkü nüngü büpalei nyüha. Mehekei henüng keipü douten dükhen hatü Kahvang touei mang thahhen?” shei e.

¹⁰Pinnyüi Joseph kü nyihjeih eshuohjao Joseph-i pinnyü mü shihen nevaijü pinnyü mü nyuhen nemong.

¹¹Mechem nyih hük mih üpayao shemei nenyupü hepak kü büpa dou dükhen shemongei shüjapa,

¹²pinnyüi büpalei ashak kü düktü, “Ngei mü lemkütuh!” shei e. Shejao büpalei ashak pinnyülei lakei binei tuhphongtü büpai chingshelei mokei lüdai.

¹³Mechem pinnyüi büpalei ashak pinnyülei lakei tuhphongtü chingshelei mokei lüdaipü eepa,

¹⁴pinnyüi shem am kü nyüktü, “Veituh, ngelei bahai hapa Hebrew amü jen kü mükshüngshenaamhen shakpü khih! Büpai ngei mü shinüng shüküpeih, hatü ngei wongmü ngeü anei lenpeih,

¹⁵hatü mechem büpai ngei ngeüwong anei lenpü danpa, büpai büpalei ashak ngei touei binei yakphongtü chingshelei mokei lüdaipeih” shei e.

¹⁶Chepaha mangleija thahshi pinnyüi büpalei ashak pinnyü mü tuh.

¹⁷Hapheikü pinnyüi büpa kü hapa büshah ejateke: “Nüngi jenei leiküpü hapa Hebrew am chongphobüyü ngelei dungei shüei ngei kü mükshüngshenaamhen dükpeih,

¹⁸shejao ngei ngeüwong anei lenjapü nangkü büpalei ashak ngei touei binei shükphongtü chingshelei mokei lüdaipeih” shei e.

¹⁹Mechem büpalei shembü kü chenyühai, “Nüngei chongphobüi ngei kü hapakei dükhen je?” shei eshuohpü danpa, büpa mongshih vam,

²⁰hatü Josephei shembüi büpa yepei ongpai yeppüthü küpteipü khoklat mongei küpteke, hatü büpa halei küpshi nyu.

²¹Shejao SHEMBÜPA Joseph mü nyu, hatü büpa bampü hu; büpai khoklat yompü veshan longpübai büpa kü bamhen peihü.

²²Khoklat yompü veshan longpübai khoklat mongei nyupüthü peü shak kü Joseph kü veihen shuoh, hatü halei mehe mehe dük, hathü kemei büpai dükteke.

²³Khoklat veshan longpübai Joseph kü eyei tuhphongpü mepa kao mongne-aa; mehenangkü SHEMBÜPA büpa mü nyu, hatü büpai mehe dük, ha kü SHEMBÜPAi moihimanteke.