Read Phom Naga KAHBHAO 4 Bible Online

KAHBHAO 4 - Phom Naga bible

KAHBHAO 4

¹Hapheikü Adami chenyüha Ev mü jem, hatü pinnyü büm nekongi lei, hatü Kain büh. Pinnyüi, “SHEMBÜPAi sheüh-ei ngei hangku hük bühtepih” shei e.

²Hapheikü pinnyüi büpalei chenaü Abel büh. Shaang Abel-ü mi haümpü shennyak, Kainü kah ling am nyuteke.

³Hapa hepak kü Kaini SHEMBÜPA kü betjükvungjük moila koteke.

⁴Shejao Abeli büpalei shongpü mi cheha nitshüpü yah-ei moila koteke. SHEMBÜPAi Abelei moila kü monghah hatü ha yah,

⁵shejao Kain hatü büpalei moila neyah. Hanangkü Kain mongshih hatü büpalei dhe yim.

⁶Hahepak kü SHEMBÜPAi Kain kü, “Mehekei nüng mongshihnya hatü nüngei dhe yimnya?

⁷Nüngi jiüshi düklangmeyü nüngei moila neyahhen je? Nüngi jiüshi nedükpü nangkü mangi nüng kü yepei nyeanhen shadenei danei nyüke; hapai nüng shak kü vanglem lemhünyüke, shejao nüngi ha aokhen vongbong” shei e.

⁸Shaang Kaini chenaü Abel kü, “Ji kahlei shashah” shei e. Mechem jiji kahlei shaei nyupa, Kaini chenaü Abel jütük.

⁹Hapheikü SHEMBÜPAi Kain kü, “Anaü Abel melei nyüpa?” shei phe. Büpai jangei, “Ngei nenying. Ngeiyü naüpeü yombü je?” shei e.

¹⁰SHEMBÜPAi, “Nüngi mehe dükpa? Bangtuh! Anaüei iy kahdok leipü ngei thahshi lenei aongnyüke.

¹¹Sheyü nüng thaüvaü phangkü nyüke, hatü kah nelingaokhen. Mechem nüngi anaü jüpa hapalei iy jüphen ju kashi nyupükei kahdoki anaülei iy jüplangteke.

¹²Nüngi kah lingjao hapai meheyao nekohhühen. Nüngü kahdoknyü kü shem neshiüi longteipü am vaihen” shei e.

¹³Kaini SHEMBÜPA kü, “Ngei kü shuohpü hanghiyü ngei kohen neaoki khih.

¹⁴Shinnyih nüngi ngei hapa kahdok leipü changtüknyu khih, hatü ngei nüng toueipü daiyei joshi nyuhen; ngeiyü hapa kahdok kü benhayaha shing nelingi longteipü am vaihen khih hatü hanei ami ngei pongjema jütükhen khih” shei e.

¹⁵Hahepak kü SHEMBÜPAi büpa kü, “Hapakei nevai, üpai nüng jühenshang shing nyetpa nyeishi bhüh yemhen” shei e. Hanangkü üpai Kain ponghenshang nejühen shingvaishi SHEMBÜPAi Kain kü nyangeihepü hük shüngteke.

¹⁶Hanangkü Kaini SHEMBÜPA toueipü daiyei Eden heongphi Nod kahdokei nyu.

¹⁷Kaini chenyüha mü jem, hatü büm nekongi lei hatü Enokh büh. Hahepak kü Kaini ching hük agei nyu, hatü büpai hapa ching kü naüei men aimü Enokh shei men.

¹⁸Enokh kü Irad bühjateke, Iradü Mehujaelei chepa, Mehujaelü Methushaelei chepa, Methushaelü Lamekhei chepa nyu.

¹⁹Lamekh-i nyüha nyi yah; hükei men Adah hatü hükpalei men Zillah nyu.

²⁰Adah-i Jabal büh; büpayü ashakshemei nyuei yemhimak haümpüthülei chepa nyuteke.

²¹Chenaüei menü Jubal nyu; büpayü liping hatü harp vüngteipüthülei chepa nyuteke.

²²Zillahlei cheha Tubal-Kain shei nyu; büpai melangnyiam hatü nyiam yah-ei lemphü douhinang lingbü nyuteke. Tubal-Kainei chenaü nelanyülei menü Naamah nyu.

²³Lamekh-i chenyüha kü e, ngelei shah bangtuh; Lamekhei nyüha nyi, ngei mehe enya, bangtuh: Ngei kü ma yahphopü nangkü, ngei shennyak hük jütepih. Ngei kü bheiphopü nangkü ngei nethe hük jütepih.

²⁴Kain jüpü nangkü shingnyet bhüh yemjema Lamekh jüpü nangkü pejempüanpünyetpa bhüh yemhen.

²⁵Shao Adami chenyüha mü jem, hatü pinnyüi yeshang hük büh hatü naü kü Seth shei men; mehenangkü pinnyüi “Kaini Abel jütükpü nangkü ha nangjei Kahvangi ngei kü shao lebü hapeü hük yahphopeih” shei e.

²⁶Seth-i shao yeshang hük büh, hatü büpai naü kü Enosh shei men. Hapa hepak kü hangkui Kahvangei men eshi khümhen chongpangteke.