Read Phom Naga KAHBHAO 40 Bible Online

KAHBHAO 40 - Phom Naga bible

KAHBHAO 40

¹Kanja angpheikü Ijip ongpalei yungshong nobü hatü aan lingbü nyi-i Ijip ongpa touei huluh shuoh.

²Pharaoh-i hapa lakchongbü yungshong nobü hatü aan lingbü nyi kü mongshih-ei,

³büpai henyi Joseph küppü shingei khoklat yompü veshan mübülei shemei tuh.

⁴Khoklat yompü mübüi Joseph kü jiji tuhphong, hatü büpai jiji kü veiteke. Hepak kansho hük khoklatei nyupheikü,

⁵Ijip ongpalei yungshong nobü hatü aan lingbü nyi-i khoklatei nyushi yahük mangh hük hük manghteke. Mangh ieyei kü hapalei lappü kohshi nyu.

⁶Mechem Joseph nepnüng peijapa, büpai jiji mongshangpü ee.

⁷Hanangkü büpai büpalei shembülei shemei büpa mü nyupü Pharaohlei lakchongbü nyi kü, “Mehekei shinnyih-ü anjilei dhe hajük yimeiya?” shei phe.

⁸Jiji-i büpa kü, “Henji-i mangh manghpeih, hatü hapa mangh tetei ephahen üpayao neshiü” shei e. Joseph-i jiji kü, “Mangh tetei ehenü Kahvangei nevaipü je? Ngei kü eshih” shei e.

⁹Hanangkü yungshong nobüi büpalei mangh Joseph kü e, “Ngei mangh mü nyalingngupai vü hük,

¹⁰kao jem phaaktü manghküpeih. Hapa kü phenlak vamhinüng bong pungei betjük jükei shümei eepeih.

¹¹Ngelei lakei Pharaohlei yungshong notü hapa nyalingngupai yah-ei Pharaohlei yungshong kü bhitei shihtü büpa kü shuoh-ei manghküpeih” shei e.

¹²Hahepak kü Joseph-i büpa kü, “Hapa lappeyü ha khih: Kao jem eepeyü nyih jem khih;

¹³nyih jem mongkü Pharaoh-i nüng khoklat leipü leihen hatü sheleipü dousho shao nyokei shuohhen khih, hatü nüng shelei büpalei yungshong nopü hepak kü dükpü keiha nüngi Pharaohlei yungshong büpalei lak kü shuohhen khih.

¹⁴Shejao mechem ha nüng kü dhaümkahen ngei deih-ei dangtuh; chingmeilemlingei Pharaoh kü ngei jung ejatuh, hatü ngei kü hapa bampü dou dükshih hatü ngeiyao hapa shing kübü ngailangtuh.

¹⁵Ngeiyü Hebrew kahdok leipü güh-ei deilangpeih, hatü jomi shaang ngei kü hatouei khoklat kü tuhhen mü ngei mehe tenao nedükangpih” shei e.

¹⁶Mechem hapa aan lingbüi mangh tetpeyü meishi khih shei veiaokpa, büpai Joseph kü, “Ngeiyao mangh hük manghpeih: Ngelei shangjingei aan mühdow jem haüshi manghpeih,

¹⁷hatü peü mü dokpa mühdowlei Pharaoh shing aan lemphü eepeih, shejao ngelei shangjing leipü mühdow leipü aan peü outhüi hahtüki eepeih” shei e.

¹⁸Joseph-i jangei, “Hapa lappeyü ha khih: Mühdow jem eepeyü nyih jem khih;

¹⁹nyih jem mongkü Pharaoh-i nüng ngaihen, hatü nüngei shangjing daktükhen, hatü nüngei büm pü hük kü sheüshi tuhphonghen, hatü ouhiyühthüi nüngei phai hahkemhen khih” shei e.

²⁰Nyih jempabü kü Pharaoh bühpü nyih kü, büpai büpalei chongphobüthü peü shing mo hük ling, hatü büpai yungshong nobü hatü aan lingbü nyi büpalei chongphobüthü touei ngai.

²¹Büpai yungshong nobü dousho kü tuh, hatü büpai Pharaoh kü yung shuohhamteke.

²²Shejao aan lingbüyü Joseph-i epükei pülei sheüshi tuh.

²³Shejao yungshong nobüi Joseph nedeih, büpai büpa betük.