Read Phom Naga KAHBHAO 41 Bible Online

KAHBHAO 41 - Phom Naga bible

KAHBHAO 41

¹Bong nyi pheikü Pharaoh-ü Nile yungkungei yaongshi manghteke,

²hatü hapa Nile yungyen leipü nyülükpü hatü nitpü mohoh nyet vamei hathüi thüng meekhah-ei ee.

³Hathü pheikü lebü mohoh nyet koihvanpü vang mon eeshi Nile yungmong leipü vamei hathü touei yungkungei yaongteke.

⁴Hathü koihvanpü, vang mon nyupü mohoh nyeti nyülükpü nitshüpü mohoh nyet hahtüki ee. Hapheikü Pharaoh paodai.

⁵Büpa shao shi, hatü mangh hük manghteke: hah pü hük kü longi ngetshi hatü meishi hahmai nyet kohshi ee.

⁶Hapheikü nengetpü hatü heong vanglüki shamtükpü hahmai nyet vamteke.

⁷Hapa nengetpü hahmai nyeti meipü hahmai nyet hahtüki ee. Hapheikü Pharaoh pao, hatü hayü mangh leidaitü nyu.

⁸Nepnüng paoei büpa longi mongshang, hanangkü büpai Ijip kahdok kübü tetpüvanpü hatü nahpülangpüthü peü nyükhen shom. Pharaoh-i jomphong kü mangh ejajao üpaiyao hapa mangh tetei büpa kü ne-eaok.

⁹Hapheikü yungshong nobüi Pharaoh kü, “Ngei pungpü shinnyihang deih-ei peikünyüke.

¹⁰Pharaoh-i chem büpalei chongphobüthü kü mongshih-ei büpai ngei hatü aan lingbü henji khoklat yompü veshan mübülei shemei küpei tuhpeih.

¹¹Ya cha kü henjiphen mangh manghpeih, hatü mangh ieyei kü hapalei lappü kohshi manghpeih.

¹²Halei khoklat yompü veshan mübülei shemei henji mü Hebrew am nethe hük shepeih. Henji-i büpa kü mangh ejajü büpai hathü mangh lappü tetei ephopeih,

¹³hatü büpai epü peü jiüshi henji kü vampeih: Ngei ngelei dousho kü leiyei shü, shejao hükpayü bakla kü bheanei jütüktih” shei e.

¹⁴Hanangkü Pharaoh-i shülangi Joseph nyüknüng deishih, hatü büpa khoklat leipü shülangi müei dai. Büpai jumum kupei ashakviha jeitü Pharaoh touei heih.

¹⁵Pharaoh-i Joseph kü, “Ngei mangh hük manghpeih, hatü ha üpaiyao tetei ne-ephünyu. Shejao nüngi mangh tet-aoknyuja shei nüng jung epü ngei danpeih” shei e.

¹⁶“Ngei ha nedükaokpih. Shejao Kahvangi Pharaoh-i napü kü jangpü shuohhen” shei Joseph-i Pharaoh kü jangei e.

¹⁷Hahepak kü Pharaoh-i Joseph kü, “Ngei mangh mü Nile yungkungei yaongshi nyushingkü,

¹⁸nitshüpü hatü nyülükpü mohoh nyet Nile leipü vamei thüng meekhah-ei nyu.

¹⁹Hahepak kü lebü mohoh nyet koihvani veihen nemeipü vamteke. Ijip kahdok kempülei hapakei veihen nemeipü mohoh ngei ne-eeangpih.

²⁰Koihvanpü hatü veihen nemeipü mohohthüi nitshüpü mohoh nyet hahtük,

²¹shejao hathüi hathü hahtükjao üpaiyao hathüi hahtükpü khih shei eyei neaok; mehenangkü hathüyü sheleipü kei-üng nemei-i shiüteke. Hapheikü ngei paodaipeih” shei teke.

²²“Shao ngei nyipabü shijü mangh mü hah pü hük kü hahmai nyet longi ngetshi hatü meishi vamei eepeih;

²³hapheikü nengetpü, kaudaipü hatü heong vanglüki shamtükpü hahmai nyet hathü pheikü vamei,

²⁴nengetpü hahmaithüi meipü hahmai nyet lühtüki eepeih. Hapa jung mechem ngei tetpüvanpüthü kü ejapa, üpaiyao ngei kü ha nih-ei ne-ephaaoknyu” shei e.

²⁵Hahepak kü Joseph-i Pharaoh kü, “Hapa mangh nyiphen aihük mon khih; Kahvangi mehe dükhen nyu, ha shakei vamei hupü khih.

²⁶Meipü mohoh nyet hayü bong nyet, hatü hahmai meipü nyet hayao bong nyet lappü; ha mangh nyiphen hük khan.

²⁷Hapheikü koihvanpü hatü veihen nemeipü mohoh nyet, hatü nengetpü, hatü heong vanglüki vantükpü hahmai nyet hayao bong nyet lappü khih. Hayü bong nyet münghishaü lappü khih.

²⁸Hayü ngei nüng kü epükei Kahvangi mehe dükhen nyu, ha büpai hupü khih.

²⁹Bong nyet thahshi Ijip kahdok kü longi bhuh-eilinei anghen.

³⁰Hapheikü bong nyet münghishaü nyuhen, hatü Ijip kahdok kü bhuh-eilinei angpü peü bedaihen.

³¹Bhuheilinei angpü jung nenyingi leidaihen, mehenangkü ha kü münghishaü mühen, hatü hayü ne-eaoki shangpongpü nyukahen.

³²Aihük mangh nyi manghpeyü Kahvangi ha temtüktü nyüke, hatü büpai ha lomi koei peikahen.”

³³“Hanangkü nüngi shaang Ijip kahdok kü kon kohpü hatü güh yao-aokpü shennyak hanei jetuh.

³⁴Nüngi shao bong nyet kahdok kü bhuh-eilinei angpü hepak kü mop phaihan nga kübü hük thaiyei tuhpü kü veihen lakchongbüthü hanei jetuh.

³⁵Bong meipü bongthü vamkahen, hahyingthü jomphongi thaiyei Pharaoh ongpalei wong phangkü chingnyüthülei yowei tuhtuh.

³⁶Ijip kahdok kü münghishaü bong nyet peikahen nyupü shingvaishi hapa hahyingü yowei tuhhen; shejüang hapa kahmük münghishaü kü neponghahhen” shei e.

³⁷Hapa küpjan kü Pharaoh hatü büpalei lakchongbüthü peüi mongong.

³⁸Pharaoh-i büpalei chongphobüthü kü, “Jeni hapa keipü Kahvangei laangha kohpü hük dangaokhen je?” shei e.

³⁹Hanangkü Pharaoh-i Joseph kü, “Kahvangi nüng kü hathü peü hupü nangkü nüng keiha kon kohpü hatü güh yao-aokpü üpayao neshiü.

⁴⁰Nüngü ngelei ongshem veihen, hatü nüngi epü kü ngelei nanglakthü peüi banghen. Vanglem lempü ong uoshing phikü mon ngei nüng mü longpü vaihen” shei e.

⁴¹Hatü Pharaoh-i Joseph kü, “Veituh, ngei nüngü Ijip kahdok kempü kü governor vaihünyeih” shei e.

⁴²Hapheikü Pharaoh-i büpalei lakjaang leipü anguti yah-ei Joseph-ei lakjaang kü shepteke. Büpai büpa kü nyemin ashaki thüngpü bhagthuh thuhhü, hatü üng kü honyük yükshuoh.

⁴³Büpai büpalei koyei khari nyipabü kü büpa uohü, hatü shennyakthüi, “Lem yamtuh” shei lenei e. Hapa keiha büpai Ijip kahdok kempü kü büpa governor vaihüteke.

⁴⁴Hapheikü Pharaoh-i Joseph kü, “Ngeiyü Pharaoh, shejao nüng kü nephepü kü Ijip kahdok kü üpaiyao lak nevaijü la nohen neaok” shei e.

⁴⁵Pharaoh-i Joseph kü Zaphenath-Paneah shei men, hatü büpa kü On leipü ngongpa Potipheralei yiükha Asenath mü shem yemhü. Hapa keiha Joseph-i Ijip kahdok kempü kü vanglem lembü lei.

⁴⁶Joseph-i Ijip ongpa Pharaohlei dousho kü shüpü hepak kü nyübüh bong hapüan nyu, hatü Joseph-i Pharaoh toueipü layaongei Ijip kahdok kempü kü shinei dai.

⁴⁷Bong nyet bhuh-eilinei angpü hepak kü kahdoki hahying changshi vamhü.

⁴⁸Bong nyet Ijip kahdok kü bhuh-eilinei vampü hepak kü Joseph-i hahying vampü peü thaiyei chingnyüthülei tuh. Chingnyü ieyeilei hapa shinei nyupü kahthü leipü hahying thaiyei tuh.

⁴⁹Joseph-i yungching bhihhiphang keiha hahying longi thaiyei tuh; ithen neaoki longi vaipü nangkü büpai nyangao nenyangi dohdai.

⁵⁰Münghishaü bongthü peishekü On leipü ngongpa Potipheralei yiükha Asenath-i Joseph kü yeshang nyi bühjateke.

⁵¹Joseph-i hashongpa kü Manasseh shei men. Mehenangkü büpai, “Kahvangi ngei ponghahpü hatü opalei shem peü betükhüpeih” shei e.

⁵²Nyipabü hapeü kü Ephraim shei men. “Mehenangkü Kahvangi ngei ponghahpü kahdokei hapeü bühhüpeih” shei e.

⁵³Bong nyet Ijip kahdokei bhuh-eilinei angpü doh-ei pei,

⁵⁴hatü Joseph-i epükei bong nyet münghishaü peihen pangteke. Kahdoknyü kempülei münghishaü pei, shejao Ijiplei mon hahying nyu.

⁵⁵Mechem Ijip kahdok kü shaü peipü nyingei peipa, nanglakthüi Pharaoh kü hahying yahshih shei yüteke. Hahepak kü Pharaoh-i Ijip am kü, “Joseph touei peijatuh, hatü büpai mehe ephahenshang hapakei düktuh” shei e.

⁵⁶Mechem kahmük kü münghishaü peipa, Joseph-i hahpuongthü ap, hatü Ijip am kü ha yuteke; mehenangkü hapa münghishaü-ü longi nemei-i shiüteke.

⁵⁷Kahmük peü leipü Ijiplei hahying shaknüng Joseph touei pei; mehenangkü kahdoknyü peülei hapa münghishaü longi mangshi peiteke.