Read Phom Naga KAHBHAO 42 Bible Online

KAHBHAO 42 - Phom Naga bible

KAHBHAO 42

¹Mechem Jakobi Ijiplei hahying nyükeja shei danpa, büpai chehathü kü, “Amphong hüki hük kü veishi mehekei nyunya?

²Ijiplei hahying nyükeja shei ngei danpeih; jen aeipai nedihen shangmü yiüei jen shing hahying shakkütuh” shei e.

³Hanangkü Josephei chejeihijei am jom an Ijiplei hahying shaknüng yiü.

⁴Shejao Jakobi Josephei chenaü Benjamin neyüshih; mehenangkü büpa kü nemei-i dükshuohkahen khih shei nyemei deih.

⁵Hanangkü hahying shaknüng mih peipü khongkü Israelei hapeüthüao omshi shiüteke; mehenangkü Kanan kahdokeiyao shaühile ngoiyei nyu.

⁶Shaang Joseph-ü hapa kahdok kü governor vaiteke; büpai kahmük kübü nanglak peü kü hahying yuteke. Josephei chejeihijei amao yiüei büpa touei jomei dhe kahdokei aümei sha.

⁷Mechem Joseph-i hathü eepa, büpai jomphong nying, büpai jomphong kü yenpa kü kei no, hatü jomphong kü, “Amphong meleipü peiküpa?” shei shahwong eteke. Jomphongi, “Kanan kahdok leipü hahying shaknüng yiüküpeih” shei e.

⁸Joseph-i chejeihijei am nyingjao jomphongi büpa nenyingaok.

⁹Joseph-i jomphong nangkü mangh manghpü deih-ei dang. Büpai jomphong kü, “Amphongü hamei kahmük wong nekohpü shing kü gühshuknüng yiüpü khih!” shei e.

¹⁰Jomphongi büpa kü, “Nevaipih, hamei shembü, hamphongü hahying shaknüng yiüküpeih.

¹¹Ham peü pa hükei hapeüthü hih; hamphongü shahhing epüthü; ham mechemao gühshukei nekamteiham” shei e.

¹²Shejao büpai jomphong kü, “Nevaipih, amphongü hamei kahmük wong nekohpü shing kü gühshuknüng yiüpü khih!” shei e.

¹³Jomi, “Hamphongü Kanan am shennyak hükei hapeüthü ham anpünyi nyupeih; shombüpa opa mü nyüpeih, shejao hükpayü neshiüpih” shei e.

¹⁴Shejao Joseph-i jomphong kü, “Ngei shaang epü keiha amphongü gühshuk yiüpeih” shei e.

¹⁵“Amphong keyü hapakei dokhen: Ongpalei men kü ngei vangei enyeih; amphongei naüshompa hatouei mangyiü thahshi amphong haleipü neleihen.

¹⁶Amphong khongkü hük leituh, hatü anaü müei peikei; aopü kemei khoklatei nyuhen; shejüang amphongi epeyü shahhing vaipü nevaipü nyinghen; hei nevaijema Pharaoh ongpalei men kü enyeih, amphongü gühshuk peipeih” shei e,

¹⁷hatü büpai jom peü nyih jem thahshi khoklatei tuh.

¹⁸Nyih jempabü kü Joseph-i jomphong kü, “Ha düktuh, hatü am yemmü nyuhen; mehenangkü ngei Kahvang kü nyemnyeih:

¹⁹Amphongü shahhing shennyakthü vaijema amphong khongkü hük hapa khoklatei nyutuh. Aopü am peü hahying koei am shem shing leihahtuh,

²⁰hatü anaü shombü ngei touei müei peikei. Shejüang amphongei shah lekhen, hatü am nedihen” shei e, hatü jomi hapakei dükhen mongteke.

²¹Jomphong hüki hük mü, “Jeni jenei naüpeü kü dükshuohpü hapalei mang nangkü ponghahnyu khih; büpa ponghahküpü jeni eephei; büpai ngei yangshih shei khümshingkü jeni ha nebangpeih. Hanangkü jen kü ha shanghah peipeih” shei etei.

²²Hahepak kü Reubeni jomphong kü, “Jeni naüpeü kü nejiüi nedükshah shei ngei ne-eangpü je? Shejao amphongi ha nebangpeih. Hanangkü shaang büpalei iy nangkü jen ponghahnyeih” shei e.

²³Jomphongi eteipü Joseph-i dannyeih shei jomi nenying; mehenangkü Joseph-i jomphong mü shah lepbüi lepei eteiteke.

²⁴Büpai jomphong lemeipü yaakei leitü thep; hapheikü shao dhe yaakei leitü jomphong mü shah etei. Büpai Simeon yah-ei jomphongi eeshi shatü tuh.

²⁵Hapheikü Joseph-i jomphongei hanggo kü hah maei hühen, hatü laophü laophülei lop khongei hüshuohhen hatü lemei hahhen hahyingao temshuohhen ngeükhüam shuoh. Hayü jomphong shing dükteke.

²⁶Jomi jomei gadu kü hah kohütü lei.

²⁷Mechem jomphong shennyak hüki gadu kü het ühshingei het ühhen hanggo apei veipa, büpai büpalei lop shakei shihshi dangteke.

²⁸Büpai cheihinaüthü kü, “Ngelei hanggo ha khih! Ngelei lopü nyokei shihtü shüpü khih!” shei e. Hapa kü jomphong mong mah-ei hüki hük lemei meetü kheüei, “Kahvangi jen kü dükpü hayü meheang?” shei etei.

²⁹Mechem jomphong Kanan kahdokei leiyei chepa Jakob ngoipa, jomi mehe heüpa hathü kemei chepa kü ejateke.

³⁰“Hapa kahdok kü shembü vaipü shennyaki hamphong kü shahwong mon ephopeih, hatü hamphongü jomei kahdok gühshuk peipeih shei ephopeih.

³¹Shejao hamphongi büpa kü, ‘Hamphongü shahhing epü shennyakthü, gühshukpü am nevaipih.

³²Hamphongü pa hükei ha nethe anpünyi nyupü hükü neshiü; naüshompayü opa mü Kananei nyüpeih’ shei eshuohpeih” shei eteke.

³³Hahepak kü ha kahdok kü shembü vaipü shennyaki hamphong kü, “Amphong khongkü hük ngei mü nyutuh; aopü amphongü hahying kotü laophü shemong yemei leituh; shejüang amphongü shahhing epü shennyakthü khih shei nyinghen.

³⁴Naüshompa müei peikei, shejüang amphongü shahhing epü shennyakthü khih shei ngei nyinghen. Hapheikü mon anaü vephahen hatü am hapa kahdokei bhei leih-ei aokhen shei ephopeih” shei eteke.

³⁵Jomi jomei hanggo aokei veishingkü ha mongei jomei lop kemei hüshi chongjateke. Mechem jom hatü chepai hathü lop dangpa, jom peü nyemteke.

³⁶Chepa Jakobi jomphong kü, “Ngei mon tuhtü ngelei hapeüthü kemei nyemdidaikem shei deihpü je? Joseph neshiü, sheyü Simeonao neshiü, hatü shaang Benjaminao yah-ei daihen enyüke. Ngeiyü henüng ponghahnyu khih!” shei e.

³⁷Hahepak kü Reubeni chepa kü, “Ngei nüng touei büpa müei neleiküjema ngelei hapeü nyi nyupü jütüktuh. Büpa ngei kü yahshih hatü ngei büpa müei leikahen hih” shei e.

³⁸Shejao büpai, “Ngelei hapeü nüng mü nedeishihpih, chejei didai, shaangü büpa mon aopeih. Lemei lemhük kei büpa kü vamjema, viüdaipü ngelei yangnyu-ü nüngi koei peipü mongshangi ngei dihen khih” shei e.