Read Phom Naga KAHBHAO 43 Bible Online

KAHBHAO 43 - Phom Naga bible

KAHBHAO 43

¹Shaang kahmük kü münghishaü nemeipüba nyuteke.

²Mechem jomphongi Ijip leipü anpü hahying kemdaipa, chepai jomphong kü, “Shao yiütuh, hatü hahying shao shakkütuh” shei e.

³Shejao Judah-i chepa kü, “Hapa shennyaki hamphong kü, ‘Amphong mü anaü müei mangyiükei thahshi ammi ngelei dhe ne-eepih’ shei ephopeih.

⁴Nüngi hamphong mü naüpeü shomjema hami nüng kü hahying shaknüng yiühen;

⁵shejao nüngi büpa neshomjema, hamphongao neyiüpih; mehenangkü hapa shennyaki hamphong kü, ‘Anaü müei nepeiküjema amphongi ngelei dhe neeepih’ shei ephopeih” shei eteke.

⁶Israeli, “Hapa shennyak kü shao hamphongei naüpeü hük nyüpeih shei eyei mehekei ammi ngei hapakei mongshanghünya?” shei e.

⁷Jomphongi büpa kü, “Hapa shennyaki hamphong hatü shem am nangkü longi mong shuohshi, ‘Ampa meishi nyüla? Anaüpeü shao nyüla?’ shei phephopeih. Hamphongi büpa kü eshuohpeyü büpai phepü kü leishuohpü mon. ‘Anaüao müei peikei’ shei büpai ephahen hih shei hamphongi nyingpü je?” shei eteke.

⁸Hahepak kü Judah-i chepa Israel kü, “Ngei mü naüpeü shomtuh, hatü hamphong yiüshah; shejüang hamphong, nüng hatü hapeüthüao nedi-i yemmü nyuaokhen.

⁹Büpa shing hanggovih ngei yahhen hih; büpa nangkü nüngi ngei kü hanggovih kohütuh. Ngei büpa nüng touei müei neleijema, hapa thaüvaü den kü ngei kohen.

¹⁰Hamphong paoh nepheilangmeyü shaang keiyü nyipa thahshi yiüei leidaitü nyuhah shepeih” shei e.

¹¹Hapheikü chepa Israeli jomphong kü, “Hakei-üng vaijema ha düktuh; kahmük kü vampü betjük vaümei ammei hanggo kü shih-ei yiüei hathü hapa shennyak kü balm meli maani, nyahjiü maani, hetnyai maani, nyalingngupai vantükpü, pistachio betjük hatü almond betjük yah-ei thintho yah-eishuoh.

¹²Lop shingnyi nyeishi hütuh. Amphongei hanggolei hüshi chongküpü lop hütuh; üpai nyingpa, jomi pungei hüpü vainüng aokpeih.

¹³Anaüao müei hapa shennyak touei yiütuh;

¹⁴hükpa anaü hatü Benjamin nyokei shomhühen mü hapa shennyak touei Jeiyong Kahvangi amphong phahjiphahen aokpeih. Ngei shingvaishiyü ngei tuhphongtü hapeüthü didaijao mehe enüng” shei e.

¹⁵Hanangkü jomphongi thintho hatü lop shingnyi nyeishi kotü Benjamin müei Ijiplei yiüei Joseph touei yaong.

¹⁶Mechem Joseph-i Benjaminao jomphong mü eepa, büpai büpalei shem leipü chongphobüthü kü, “Hathü shemei müei shükei, hatü yem hük jütü hahying temtuh; mehenangkü hathüyü sheya ngei mü hahyinghen” shei e.

¹⁷Büpai epükei chongphobüi hathü shennyakthü Josephei shemei müei shüteke.

¹⁸Shaang jomphong Josephei shemei müei shüpü nangkü longi nyem hatü jomphongi, “Shelei jenei hanggolei lop hüpü jeni ha koei leidaipü nangkü jenphongü shemongei shüpü vaaishang; jomi jen kü nemei-i düktü jen aa leihühen hatü jenei gaduthü yahlangphahen khih” shei etei.

¹⁹Hanangkü jomphongi Josephei chongphobü touei heihei shadenei yaongtü büpa mü,

²⁰“Oh longpü am, ham shelei hahying shaknüng yiüpeih;

²¹hatü mechem ham paümpü shingei leiyei hanggo apei veipa, ham peüei lop lakshing hanggo shakei hüshi chongküpeih. Hayao hamphongi koei yiüei nyüpeih.

²²Nyeinya vaishi hamphongi shao hahying shakhen lop üei hüshi nyüpeih. Lop üpai hüphopüshang hami nenyingangpih” shei e.

²³Büpai, “Meihen, tenyem; ammei Kahvang hatü ampalei Kahvangi ammei hanggolei hapa lop hüphopü vaihen aokpeih; ngei ammei lop dangphei hih” shei e. Hahepak kü büpai jomphong touei Simeon müei dei.

²⁴Mechem chongphobüi jomphong Josephei shemei müei shüei yung yahshuohpa, jomphongi lakhila phu, hatü gaduthü kü het üh,

²⁵hatü Joseph om mü leijajü thintho shuohhen shei tem; mehenangkü jomphongü om mü halei hahyinghen shei epü danteke.

²⁶Mechem Joseph shemei leijapa, jomphongi büpa shemongei shüei hapa thintho shuohtü büpa touei aümei shateke.

²⁷Büpai jomei nang phe, hatü “Amphongi eküpü ampa meishi nyüla? Büpa yemmü nyüpa yo?” shei e.

²⁸Jomphongi, “Nüng chongphobü, opayü meishi-üng shaang thahshi yemmü nyüpeih” shei e, hatü jomphongi aümei shatü büpa kü dhüm shuoh.

²⁹Joseph-i veishuohshingkü büpa mü vom mong hük kü dungpü chenaü Benjamin eeyei büpai, “Büpayü amphongi eküpü naüshompa je?” shei phe. Büpai, “Hapeü, Kahvangi nüng kü phahjituh” shei e.

³⁰Büpai chenaü eeyei mong ongyangpü neyepaoki büpai mokei thephen shing yemei shü. Büpai büpalei dungei shüei thepteke.

³¹Hapheikü büpai dhe phutüktü vam, hatü büpai büpa nyingi ungei-aeiyei, “Bhaong hahtuh” shei e.

³²Joseph hayaoha, jomphongao hayaoha, hatü Ijip am büpa mü hahyingpüthü hayaoha shing hükei hahying; mehenangkü Ijip ami Hebrew am mü hahyinghenü Ijip am keyü chaibenüng nyuteke.

³³Hathü chongphobüthüi jomphongü cheihinaü nyingei Joseph philei meeshi uohüteke, hatü jomphong hüki hük kü veiteitü thamateke.

³⁴Mechem Josephei nükdü leipü hathü kü hahying deiyei shihpa, aopüthü meyü Benjamin kü phaihan nga nyeishi shihteke. Hanangkü jomphong büpa mü mongongshi hahyingteke.