Read Phom Naga KAHBHAO 46 Bible Online

KAHBHAO 46 - Phom Naga bible

KAHBHAO 46

¹Hanangkü Israeli büpai angpü peü yah-ei yiüei Beersheba ngoiyei büpai chepa Isakei Kahvang kü jakpü moila shuoh.

²Kahvangi Israel kü yanüng manghkhang hük kü, “Jakob! Jakob!” shei nyük. “Ngei hammü nyüpeih” shei büpai jang.

³Hahepak kü büpai, “Ngeiyü Kahvang, ampa amei Kahvang. Nüng Ijiplei yiühen tenyem; mehenangkü ngei nüng jat longpü hük leihühen.

⁴Ngeiyao nüng mü Ijiplei yiükahen, hatü shao ngei nüng müei anhen, hatü Josephei laki dükshi nüng müksho methühen” shei e.

⁵Hapheikü Jakobi Beersheba leipü layaong, hatü Israelei chehathüi chepa Jakob, jomei nyüha hapeüthü kemei Pharaoh-i jom mühen shompü khari kü yiüteke.

⁶Jomi Kanan kahdokei dangpü yemhimak, hatü douhinang Ijiplei koei yiü. Jakobi büpalei hühihathü peü büpa mü müei yiü:

⁷büpalei hapeüthü, hüpeüthü nyüha baha Ijiplei müei yiü.

⁸Shaang hathüyü Jakob mü Israel am hühiha Ijiplei müei yiüpüthü nyüke: Jakobei hashongpa Reuben,

⁹hatü Reubenei hapeüthü: Hanokh, Pallu, Hezron, hatü Karmi

¹⁰Simeonei hapeüthü: Jemuel, Jamin, Ohad, Jakhin, Zohar hatü Kanan am nyühai bühpü Shaul.

¹¹Levilei hapeüthü: Gershon, Kohath, hatü Merari.

¹²Judahlei hapeüthü: Er, Onan, Shelah, Perez hatü Zerah (shejao Er hi Onan nyiyü Kananei nyushi didai). Perezlei hapeüthü: Hezron hatü Hamul.

¹³Issakharlei hapeüthü: Tola, Puah, Jashub hatü Shimron.

¹⁴Zebulunei hapeüthü: Sered, Elon, hatü Jahleel.

¹⁵Büpalei yiükha Dinah mü Paddan-Aramei nyushi Leah-i Jakob kü bühjapü hapeüthü nyüke. Büpalei hapeüthü peüshep hapüanpüjem nyu.

¹⁶Gadlei hapeüthü: Zephon, Haggi, Shuni, Ezlon, Eri, Arodi hatü Areli.

¹⁷Asherlei hapeüthü: Imnah. Ishvah, Ishvi hatü Beriah. Jomei chenaü nyüha hükü Serah nyu. Beriahlei hapeüthü: Heber hatü Malkiel.

¹⁸Hathüyü Labani büpalei yiükha Leah kü shuohpü aa lanyü Zilpah-i Jakob kü bühjapü hapeüthü — peüshep jom anpüvok nyu.

¹⁹Jakobei chenyüha Rachelei hapeüthü: Joseph hi Benjamin.

²⁰Ijiplei On leipü ngongpa Potipheralei yiükha Asenath-i Joseph kü Manasseh hatü Ephraim nyi bühjateke.

²¹Benjaminei hapeüthü: Bela, Beker, Ashbel, Gera, Naaman, Ehi, Rosh, Muppim, Huppim hatü Ard

²²Hathüyü Racheli Jakob kü bühjapü hühihathü jom peüshep anpüali nyu.

²³Danei hapeü: Hushim.

²⁴Naphtalilei hapeüthü: Jahzeel, Guni, Jezer, hatü Shillem.

²⁵Hathüyü Labani büpalei yiükha Rachel kü shuohpü aa lanyü Bilhah-i Jakob kü bühjapü hapeüthü peüshep jom nyet nyu.

²⁶Jakob mü Ijiplei yiüpü büpalei hühihathü mon, jomei nyühathü neomi jom pejempüvok nyu.

²⁷Joseph kü Ijiplei hapeü nyi bühjapü ieyei Jakob am shem Ijiplei yiüpü jom pejempüan nyu.

²⁸Shaang Jakobi Goshenei yiüpü lem phehen shingvaishi Joseph touei Judah yeihshi shom. Mechem jom Goshen ngoipa,

²⁹Joseph-i büpalei koyei khari temtü Goshenei chepa Israel mü pongteinüng heih. Josheph-i chepa touei ngoihinüng chepa kü khaaitü hepak luangi thep.

³⁰Israeli Joseph kü, “Shaang thahshi nüng yemmü nyupü ngei eephei keyü ngei shaang didaijoong mehe shepa!” shei e.

³¹Hahepak kü Joseph-i chejeihijei am hatü chepalei shem am kü, “Ngei shaang aongei Pharaoh kü, ‘Ngelei cheihinaüthü hatü opalei shem am Kananei nyupü ngei touei yiüküteke.

³²Jomphongü mi yompü am hatü yem haümpü am, hatü jomei mi, mohoh hatü jom angpü peü koei yiüteke shei eshuohhen hih’ shei eteke.

³³Mechem Pharaoh-i am kü nyüktü, ‘Amü menüng keipü dou düknya?’ shei phephüjü,

³⁴amphongi, ‘Hamü hashih mebü obü opa am kei yemhimak haümpü am hih’ shei etuh. Shejüang amphong kü Goshen shinpülei nyuhen hanphahen; mehenangkü Ijip am shingvaishi mi yompü amü jiühitbenüng dou hih” shei eteke.