Read Phom Naga KAHBHAO 48 Bible Online

KAHBHAO 48 - Phom Naga bible

KAHBHAO 48

¹Hapheikü Joseph kü, “Ampa tüngei nyüke” shei eshuohteke. Hanangkü büpai cheha Manasseh hatü Ephraim nyi büpa mü müei dei.

²Mechem Jakob kü, “Anha Joseph peiyei nyüke” shei eshuohpa, büpai wong antü lüngei paoei uo,

³hatü Jakobi Joseph kü, “Jeiyong Kahvangi Kanan kahdok Luzlei ngei touei vamei,

⁴ngei kü, ‘Ngei nüng betjük jükhühen, hatü lihila longi dahühen hatü jat longi leihühen, hatü ngei hapa kahdok nüng pheikü nüngei hühihathü kü denshing shuohhen’ ephopeih.

⁵Ngei nüng yemei Ijiplei yiükei shekü Ijiplei nüng kü bühküpü hapeü Manasseh hi Ephraim nyiyü Reuben hatü Simeon nyi kei-üng ngelei hapeü vaihen.

⁶Jiji pheikü angpüthü peü nüngei hapeü vaihen. Jiji kü mükjüp nangkeyü chejeihijei am mü aihük mü men nyanghen.

⁷Ngei mechem Paddan leipü peipa, Rachelü Kanan kahdok lemei Ephrah ngoihen maani taishi nyushi mongkü tüngshi didaipeih, hatü ngei pinnyü Ephrathlei (hayü Bethlehem) aongpü lemei vüphongpeih” shei eteke.

⁸Mechem Israeli Josephei hapeü nyi eepa, büpai, “Ha nyi üamang?” shei phe.

⁹Joseph-i chepa kü, “Kahvangi ngei kü hatouei yahphopü hapeü nyi khih” shei e. Büpai, “Ngei moihiman shuohnüng ngei touei deikei” shei e.

¹⁰Shaang Israelü viüei mük pumdaitü meishi ne-eeaoki nyu. Hanangkü Joseph-i jiji büpa yopailei deija, hatü büpai jiji kü khaaitü jüpteke.

¹¹Israeli Joseph kü, “Ngei nüngei dhe eehen shei nedeih-angpih, shejao halei Kahvangi ngei kü nüngei hapeüthüao eehüteke” shei e.

¹²Hapheikü Joseph-i jiji chepalei shüngdok leipü yahlangtü büpai büpa touei kahdokei aümei sha.

¹³Joseph-i jijiphen müei dei; Ephraimü büpalei lakdah philei shejao Israel kü laknyongphi lemei, hatü Manasseh-ü büpalei laknyongphi lemei shejao Israel kü lakdahphi lemei jiüshi büpai müei dei.

¹⁴Shejao Israeli büpalei lak anei aitü naü-eepa Ephraim kü büpalei lakdahphi-i dük, hatü hashongpa Manasseh kü büpalei laknyongphi-i shangjing kü düktü,

¹⁵Joseph kü moihimanei hapakei e: “Kahvang üpa kü ngelei bühipai chongphopa, Kahvang üpai shinnyih thahshi ngelei yangnyu müpa,

¹⁶ngei vongshüh peü kübü yangpü vangsho phongshani hapa naü nyi kü moihimantuh; Ngelei men hatü ngelei bühipa Abraham, Isakei men ha naü nyi homei nyuhütuh, hatü kahdoknyü kü hühihathü longi dahütuh.”

¹⁷Mechem chepai Ephraimei shangjing kü laknyongphi-i dükpü Joseph-i eepa, büpa mongneongi deih. Hanangkü büpai chepalei lakdahphi Ephraimei shangjing kübü yah-ei Manassehlei shangjing kü haüshuoh.

¹⁸Joseph-i chepa kü, “Opa, hei nevai! Büpayü ngelei hashongpa vaipü nangkü nüngei lakdahphi-i büpa kü düktuh” shei e.

¹⁹Shejao chepai ha nemongi büpa kü, “Ngei nyingnyeih, hapeü ngei nyingnyeih; Manassehlei hühihathüao nanglak longi dahen; büpa-ao longpü leihen. Shejao naü-eepa büpa mao longpüba leihen, hatü büpalei hühihathüyü longpü jat leihen” shei e.

²⁰Hanangkü büpai ha nyih jomphong kü moihimanei hapakei e: “Nüngei men noshi Israel ami hapa moihiman baonghen: ‘Kahvangi am Ephraim hi Manasseh kei leihütuh’ ” shei ehen. Hanangkü Jakobi Manasseh shekü Ephraim noteke.

²¹Hapheikü Israeli Joseph kü, “Ngei sheyü didaihen khih, shejao Kahvang nüng mü nyuhen hatü nüng shao nüngei bühipalei kahdokei müei leihen.

²²Shaang ngei anjei anaüthü mü nyeishi ngei nüng kü phaihan hük nyeinya shuohnyeih; hapayü ngelei yan hatü lahhilaongi neüei yahpü Amor amei kahdok ha yahphünyeih” shei e.