Read Phom Naga KAHBHAO 49 Bible Online

KAHBHAO 49 - Phom Naga bible

KAHBHAO 49

¹Hapheikü Jakobi chehathü peü kü nyüktü, “Ngei shonei thaikei, hatü ngei ngoikahen nyih kü mehe vamkahen ngei ha amphong kü ephüshah” shei e.

²Thaituh, hatü Jakobei hapeüthü bangtuh; ammei ampa Israeli epü kü bangtuh:

³Reuben, nüngü ngelei hashongpa, ngelei nethe wong kübü vampü hapeü, dhüm kü hatü wong kü peü mü meipü.

⁴Yung keiha shing nelingi, nüng hajük kü shongnyü neleipih; mehenangkü nüngi ngelei shinshing dhüm neshiüi sheihtükpeih.

⁵Simeon hi Levi nyiyü cheihinaü nyi, Jijilei phunglangü iy-aongmashahen phunglang.

⁶Jom shahjo eteipülei ngei ne-omhen, jomei thaihiyu kü ngei hean neyahhen. Mehenangkü jiji mongshihpai shennyak jüteke, hatü jiji-i mongpükei mohohbaongthü kü lapheichah langtükpeih.

⁷Jiji mongshihpü thaüvaü vaihütuh, mehenangkü hayü ahshi nemei; Jiji mongshihpü ahshi mangshi! Ngei jiji Jakob hatü Israel am khongkü haitükhen.

⁸Judah, anaüpeüi nüng kü vihhen; Nüngi nüngei vepathü kü üng kü dükhen. Anaüpeüthüi nüng touei aümei khümhen.

⁹Judah-ü mailang kei yemhimak jüei jepei leinyüke, ngelei hapeü. Mailangi keiha lakhila temei lemnyüke, Mailang chebi kü keiha üpai büpa kü baokhen?

¹⁰Judah ami ongpalei lenshuoh nopü, hatü vanglem lembülei lenshuoh nopü kübü neyanhen. Jatthüi büpa kü bom ühhen, hatü büpa touei ven bangei aümei khümhen.

¹¹Büpalei gadu cheha nyalingngupai vü kü, hatü gaduthü meipü nyalingngupai chongei shenhen, Büpai laophülei ashakviha yiü kü, hatü laophülei büm-ow nyalingngupai iy yiü kü dhohen.

¹²Büpalei mük yiü mao nyakshi, büpalei bha amma mao shoshi nyuhen.

¹³Zebulunü yungching yungkungei nyuhen, hatü büpalei kahmükü jahas yaongshing vaihen, büpalei kahmük Sidon thahshi heihhen.

¹⁴Issakhar-ü wong kohpü gadu, gadulei hanggo nyi aa kü lempükei nyüke.

¹⁵Shejao mechem büpa lemshing meiangke shei, hatü büpalei kahdok mongongshi khih shei veihen, büpai hanggo konüng aümei shahen, hatü aa keiha douwong dükhühen.

¹⁶Dan ami laophülei nanglak kü vanglem lemhen, Jomü Israel am lebü jatthü kei nyuhen.

¹⁷Dan amü lemhao leipü biü keiha, hatü lemba leipü biütam keiha, hapai koyeilei laphei kü kaokhen, hatü halei uopü shennyak ngaümphei lemei vühen.

¹⁸Ngei nüng yemleipü omdannyeih, Oh SHEMBÜPA.

¹⁹Gühpathüi Gad am hahhen, shejao jomiang gühpathülei laphei kü bapei changhen.

²⁰Asherlei kahdoki hahying longi vamhühen; büpalei ongpai hahhen hahying meipü büpai shuohhen.

²¹Naphtaliyü mehe kao nenyemi longteipü shaok keiha büpai cheha longi shaannyüpeih.

²²Joseph-ü nyalingngupai keiha; ünyü yangkü betjük jükpü nyalingngupai, büpalei vü bhamba kao banei aongnyüke.

²³Vepathüi pülah hatü lahhan noshi büpa hahteke, longi nemei-i jomi büpa kü kapteke.

²⁴Shejao büpalei lahhan jiüshangi, hatü büpalei lak wong kohshi nyüke. Hapayü wong kohpü Jakob Kahvang laki, hatü Mi Yombü, Israel amei Yaongei men kü nyüke.

²⁵Nüng kü sheühpeyü ampai vaipü Kahvang, Jeiyong Kahvangi nüng kü vangsho shangpa leipü moihiman, ilangmongei nyupü moihiman, yemhimak hatü hapeü moihimanthü shuohnyüke.

²⁶Ampalei moihimanü aivang den mebü kahshangthü, hatü den luangi daipü shangtaothülei moihiman mao longpüba. Hathü moihiman Josephei shangjing kü, hatü jeihinaüthü toueipü khaatei deitükpülei shangba kü nyutuh.

²⁷Benjaminü aeipü shuw keiha, dhom mü büpai yem jüei hahnyüke. Om mü büpai vehok leipü douthü hanteinyüke.

²⁸Hathüyü Israel phang anpünyi nyüke, hatü hathüyü chepai jom kü moihimanpü hepak kü jom kü epeih; jom peü kü jom kü jiüpü moihiman shuoh-ei moihimanteke.

²⁹Hapheikü büpai jomphong kü hapa shah eteke: Sheyü ngei diyei opa am mü nyudaihen ngoikünyüke. Ngeiyü Hit am Ephronei kah leipü yaongdung,

³⁰Kanan kahdokei Abrahami mahngchong vaihen shakpü Hit am Ephronei kah Mamre pü yopailei vüshih.

³¹Halei Abraham hatü chenyüha Sarah nyi vüpeih; halei-üng ngeiyao Leah vüphongpeih.

³²Kah hatü haleipü yaongdungü Hit am leipü shakpeih.

³³Mechem Jakobi chehathü kü ha eyei kempa, büpai lüngei la temei an, hatü büpa mongdang shemdai.