Read Phom Naga KAHBHAO 50 Bible Online

KAHBHAO 50 - Phom Naga bible

KAHBHAO 50

¹Hahepak kü Joseph-i chepa kü laongei khaaitü thep hatü jüpteke.

²Joseph-i meli nopüthü kü chepalei mahng kü meli shihhen eteke. Hanangkü meli noteipüthüi,

³nyih pinyi yah-ei meli shih; mehenangkü hapayü mahng kü meli shihhen nyih hajük nadang vaishi shiüteke, hatü Ijip ami büpa kü nyih pejempüan mahng thep.

⁴Mechem büpa kü mahng theppü nyih peihpa, Joseph-i Pharaoh am shem kü, “Ammi ngei kü bamei deihjema, chingmeilemlingei Pharaoh kü hapakei etükkütuh:

⁵Opai ngei kü lahhüpeih, ‘Ngei sheyü didaihen khih. Kanan kahdokei ngei laophü shing laetei lingpü yaongsha mahngchongei ngei vüshih’ shei epeih. Hanangkü shaang ngei opalei mahng vününg aongshah; hapheikü ngei nyokei leikahen” shei e.

⁶Pharaoh-i, “Ampai nüng kü ha dükshih shei lahhüpükei aongei ampalei mahng vütuh” shei e.

⁷Hanangkü Joseph-i chepalei mahng vününg aong. Büpa mü Pharaohlei chongphobüthü, shem kü behethü, Ijip kahdok kübü lupülongpüthü peü,

⁸hatü Joseph am shem kemei, büpalei cheihinaüthü hatü chepalei shem am peü aongteke. Hashihthü, yemhimak mon Goshenei tuhphong.

⁹Koyei khari hatü halei uoteipüthü peü büpa mü aong. Hapayü khongnyü longpü hük nyuteke.

¹⁰Mechem jomi Jordan yungdangei Adadlei hah tenshing ngoipa, halei jomi longi mahng theppü hatü youngpünangpü nyu; büpai halei nyih nyet thahshi mahng theppü hepak nyu.

¹¹Mechem halei nyupü Kanan ami Adadlei hah tenshingei mahng theppü youngpü eepa, jomi, “Hapayü Ijip am shing ahshi-üng mongmangei theppü youngpü hepak khih” shei etei.

¹²Chepai jomphong kü epü keiha chehapeüthüi büpa kü dük.

¹³Jomi chepa Kanan kahdokei yah-ei anei Makhpelah kah leipü yaongsha, Mamre yopailei Abrahami mahngchong vaihen Hit am Ephron leipü shakpü kahlei mahng vüphong.

¹⁴Chepa mahng vüphongtü Joseph, cheihinaüthü hatü büpa mü chepalei mahng vününg aongpüthü peü Ijiplei nyokei lei.

¹⁵Sheyü chepa didaiteke shei nyingei Josephei cheihinaüthüi büpa kü, “Jeni büpa kü nejiüpü dükshuohpü nangkü Joseph-i jen kao hapa shongdak lakshing shemhen shei deihshi shiühen hiang?” shei etei.

¹⁶Hanangkü jomphongi Joseph kü shahjang hük hapakei shom: “Jenei opa didai shekü,

¹⁷büpai hamphong kü anaü Joseph touei peiyei büpa kü, ‘Hamphongi nüng kü nemei-i düktükpü mang tükshih shei mang lahtuh’ shei lahhen ephopeih. Hanangkü chingmeilemlingei ampalei Kahvang chongphobüthüi pungpü mang tükshih” shei e. Jomphongi mechem ha eshuohpa, Joseph thepteke.

¹⁸Hahepak kü büpalei cheihinaüthüiyao büpa touei doei lemtü thepei, “Hamphongü nüngei aathü hih” shei e.

¹⁹Shejao Joseph-i jomphong kü, “Amphong tenyem! Ngeiyü Kahvangei shing kü nyunyu je?

²⁰Amphongi ngei kü nemei-i dükhen deihjao Kahvangi hapayü shinnyih büpai dükpükei shennyak longi yangei tuhhen med kü mei leitü deihpeih.

²¹Hanangkü tenyem; ngei am hatü naüthü peü shing hahying shuohhen” shei e. Hapa keiha büpai jomphong kü mongyangshah hatü bamei etei.

²²Hanangkü Joseph hatü chepalei shem am peü Ijiplei nyu; Joseph-ü bong kho hük mü an nyu.

²³Joseph-i Ephraimei hapeü hatü hüpeüthü eeshi nyu. Büpai Manassehlei cheha Makirlei hapeüthüao büpalei shemei büh-ei paümei ang.

²⁴Hapheikü Joseph-i büpalei cheihinaüthü kü, “Ngei sheyü didaihen khih, shejao hingmei Kahvangi am kü junghen, hatü Abraham, Isak hatü Jakob kü lahpü kahdokei am müei leihen” shei e.

²⁵Hanangkü Joseph-i Israel am kü hapakei lahhü: “Mechem Kahvangi am hapa kahdokei mülangnüng yiükahen, amphongi ngelei vangtao-ao hatoueipü koei leituh” shei e.

²⁶Büpa bong kho hük mü an nyuei di; büpalei mahng kü meli shihtü mahngshungei hütü Ijiplei tuh.