Read Phom Naga KAHBHAO 6 Bible Online

KAHBHAO 6 - Phom Naga bible

KAHBHAO 6

¹Mechem kahdoknyü kü hangku dahen pangpa, yiükhathü bühteke,

²Kahvang hathüi hangkuli yiükha nela meipü ee, hatü jomi jepüthü mü shem yem.

³Hahepak kü SHEMBÜPAi, “Ngei shennyakthü kü den den nyuhen nehanpih; mehenangkü jomphongü dihen shennyakthü; jomei denü bong 120 mon nyuhen” shei e.

⁴Hathü nyih kü hatü haphei kao Nephilim am hapa kahdoknyülei nyu. Mechem Kahvang hathüi hangkulei yiükhathü touei peipa, jomi hathü mü hapeüthü büh. Jomü aivang mebü hampa hatü bümlong wong kohpü men-e shennyakthü nyuteke.

⁵Kahdoknyülei nyupü hangkulei mang ahshi longshi khih, hatü düngei jomei mongei ten mon deihnyüke shei SHEMBÜPAi veiteke.

⁶Kahdoknyülei büpai hangku lingei tuhpü nangkü SHEMBÜPA mongshang, hatü büpalei mong kü tüngteke.

⁷Hanangkü SHEMBÜPA i, “Kahdok shak kü ngei lingpü hangku, kahdokei kamteipü yemhimakthü hatü shangouthü thitei yaktükhen hih — ngei hathü lingpü nangkü ngei mongshangnyüke” shei e.

⁸Shejao Noah payü SHEMBÜPA i monghahhen mü nyuteke.

⁹Hathüyü Noahlei hühihathü: Noah-ü daülangshemshepü shennyak nyu, hatü büpa hepak kü hangku khongkü eela neshiüpü yangnyu, hatü büpa Kahvang mü kam.

¹⁰Noahlei hapeüthü jem nyu: Shem, Ham hatü Japheth.

¹¹Shaang Kahvang touei kahdoknyü-ü mang monha jüteishangteipai maei nyu.

¹²Mekei kahdoknyü tendaipa, hangkuthü peü mang lem kü daikem.

¹³Hanangkü Kahvangi Noah kü, “Ngei hapa hangkuthü mahtükkemhen hih; mehenangkü kahdoknyü kü hathü homei jüteishangteipai madaiteke. Ngei hingmei hangku hatü kahdoknyü nyiphen dohtükhen.

¹⁴Hanangkü nüngi am shing pü meipü yah-ei Jahas hük lingtü halei dung lingtuh, hatü shakhimong kü müh-i shaoktuh.

¹⁵Nüngi hapakei lingtuh: Hapa jahas-ü feet 450 lushi, ba kü feet 75, shaopü kü feet 45 lingtuh.

¹⁶Hapa kü adok küptuh, hatü hapayü dok philei inch 18 aongei lingtuh, hatü haam lemei shaden hük jiampa jaan, hatü jaandokpa thahshi lingtuh.

¹⁷Ngei kahdoknyülei bünghiyang lenei vangsho phangkü nyupü yem, hatü halei nyupü peü mahtükhen vang keiphahen.

¹⁸Shejao ngei nüng mü vangpüshuwpü hük linghen; nüng, anyüha, hapeüthü hatü jomphongei nyühathü peü jahas mongei shütuh.

¹⁹Nüngi yemmü nyupü yemlem peü kübü bihibaong shei nüng mü yemmü nyuhen leituh.

²⁰Oulem peü, yemhimak hatü kahdokei kamteipü yemhamakha peü nüng mü yemmü nyuhen peikahen.

²¹Nüngi hahying lemphü am shem hatü hathü hahhen shingvaishi kotuh” shei e.

²²Kahvangi epükei Noah-i lemphü dük.