Read Phom Naga KAHBHAO 7 Bible Online

KAHBHAO 7 - Phom Naga bible

KAHBHAO 7

¹Hapheikü SHEMBÜPAi Noah kü, “Jahas mongei shütuh, nüng hatü am shem kemei, mehenangkü hapa den kü ngei touei nüng mon daülangi nyüke shei veiaoknyüke.

²Nüngi daülangpü yemhimak bihibaong jora nyet, nedaüpü yemhimak bihibaong jora hükbaong yahtuh.

³Shao oulem peü kübü bihibaong jora nyet baong kahdok shak kü jomei li nyuhen shingvaishi yahtuh.

⁴Nyih nyet mongkü ngei kahdoknyülei nyih pinyi ya pinyi vang keiphahen, hatü ngei lingpü lemphü hapa kahdok shak kübü thittükhen” shei e.

⁵SHEMBÜPAi eshuohpü peü Noah-i dük.

⁶Mechem kahdoknyü kü bünghiyang lenpa, Noah bong kho vok nyuteke,

⁷hatü Noah, chehathü hatü chehathülei nyühathü büng kübü yanghen jahas mongei shü.

⁸Daülangpü yemhimak, nedaüpü yemhimak, outhü hatü kahdokei kamteipü yemhathü peü,

⁹bihibaong shei Kahvangi Noah kü epükei Noahlei jahas mongei shüteke.

¹⁰Nyih nyet pheikü bünghiyang lenpü pei.

¹¹Noahlei yangnyu bong khovokpabü len nyi mü nyih anpünyetpabü kü kahmong yunglok kemei bhaoei phumshang vang shaden apteke.

¹²Nyih pinyi ya pinyi thahshi vang kei.

¹³Ha nyih Noah, chehathü Shem, Ham, Japheth hatü hapeüthülei nyühathü jahas mongei shüteke.

¹⁴Phaüyem lemphü, haümyem lemphü hatü kahdokei lüei kamteipü yem lemphü, oulem kemei hatü yang kohpü ouhiyüh peü,

¹⁵bihibaong shei yem nyupü lemphü Noahlei jahas mongei shüteke.

¹⁶Kahvangi Noah kü epükei yemhimak bihibaong shei jahas mongei shü hatü SHEMBÜPAi sha küptük.

¹⁷Nyih pinyi thahshi vang keikhan keiyei yung longei kahdok kübü jahas bhongei aong.

¹⁸Yung longkhan longei yung shak kü jahas bhongteke.

¹⁹yung longkhan longei kahshangthü peü lümlang.

²⁰Yung longei aongpai kahshang shangjing peih-ei feet 20 thahshi aongteke.

²¹Kahdoknyülei nyupü yemhimak, ouhiyüh hatü hangkuli peü mahkem.

²²Kahdok shak kü shongsha lemei ngü heepü yemmü nyupü lemphüli didaikem.

²³Kahdok shak kü yemmü nyupü hangkuli, yemhamakha, ouhiyüh peü thitei yaktük. Shejao büpa mü jahas mongei nyupüthü mon yangteke.

²⁴Kahdoknyülei yung nejepi nyih 150 nyu.