Read Phom Naga 2 SAMUEL 1 Bible Online

2 SAMUEL 1 - Phom Naga bible

2 SAMUEL 1

¹Saul dipheikü Davidi Amalek am neüphongtü leiyei Ziklagei nyih nyi them.

²Nyih jempabü kü Saulei baümtap leipü shennyak hük büpalei büm-ow kemei shaaktüktü shangjing kü bhihla nyiotü David touei peiyei dhüm huei kahdokei doei lem.

³Davidi büpa kü, “Nüng meleipü peiküpa?” shei phe. Büpai büpa kü, “Ngeiyü Israel amei baümtap leipü yangei daiküpeih” shei e.

⁴Davidi büpa kü, “Mehe vampa eshih” shei e. Büpai, “Shennyakthü thepju kübü nyaiyei daikemteke, hatü longshi shing mahdaitih; Saul hatü cheha Jonathan nyiao jütükteke” shei e.

⁵Hahepak kü Davidi shah-om kobü kü, “Saul hatü cheha Jonathan nyi jütükteke shei nüngi mekei nyingpa?” shei phe.

⁶Büpa kü shah-om kobüi, “Ngei Gilboa Kahshangei nyujü Saulü büpalei phung kü nyanshi, koyei kharithü hatü koyei kü uopü shennyakthü ngoiyaki,

⁷büpai yaakei veitü ngei eeyei ngei kü nyükpha-i ngei jangshuohjü,

⁸büpai ngei kü, ‘Nüng üpaang?’ shei phephopeih. Ngei büpa kü, ‘Ngeiyü Amalek am hih’ shei eshuohjü,

⁹büpai ngei kü, ‘Heihkei hatü ngei kü shoptü jütüktuh; mehenangkü ngei longi nemei-i ma yahteke, shejao nedi-i yemmü nyüpeih’ shei ephopeih.

¹⁰Hanangkü ngei büpa kü la-i shoptü jüpeih; mehenangkü büpa ma yahpü nangkü neyangshasha khih shei ngei nyingpeih. Ngei büpalei shangjing leipü ong athen hatü lakshep yah-ei ngelei shembü nüng touei koei peiküpeih” shei e.

¹¹Hahepak kü Davidi laophülei ashak shaaktük hatü büpa mü nyupüthü peüi hapakei dük.

¹²Jomi Saul hatü cheha Jonathan nyi hatü SHEMBÜPAlei veshanthü hatü Israel phang mih-ei yani mahdaipü nangkü youngei mahng thep, hatü om dhüshi shüaeiyungle.

¹³Davidi büpa kü shah-om leijapü shennyak kü, “Nüng meleipü peiküpa?” shei phe. Büpai, “Ngeiyü ammei kahdokei benei nyupü Amalek hahimoi hih” shei e.

¹⁴Davidi büpa kü, “SHEMBÜPAi jepü shennyak hük kü lak shihhen nüng nenyemang je?” shei e,

¹⁵hatü Davidi nethe hük nyükei, “Hatouei heih-ei büpa jütüktuh” shei e. Hanangkü büpai büpa kü baptü jütük.

¹⁶Davidi büpa kü, “Nüngei iy nüng shak kü nyutuh; nüngi laophülei ju-i, ‘Ngei SHEMBÜPAi jepü shennyak jüpeih’ shei denpü shuohteke” shei e.

¹⁷Davidi Saul hatü cheha Jonathan nyi kü hapa yim kesho lok,

¹⁸hatü büpai hapa kesho Judah am kao nyuhhen eteke. Hapayü Jashar Laitap kü nyangei nyüke.

¹⁹Oh Israel, nüngei müknyinshekhang kahshangei jüei shükshi nyüke! Wong kohpü hampathü mih-ei lak kü dodaiteke!

²⁰Gathlei ha jung te-e, Ashkelon chingyangshong kü ha baongei yaüei te-e; Hei nevaijema Philistia nelathüi mongonghen, hatü nejaptükpüthülei yiükhathüi mongmeihen.

²¹Gilboa kahshangthü kü nyien hi vangyung nyemtevü; Hapalei kahthü düngei kong nyemleidai. Mehenangkü halei wong kohpüthülei ii sheihtükteke, Hajük kü Saulei ii kü mainga-i nephuhen.

²²Jütükpülei iy kübü, hatü wong kohpülei phai kübü; Jonathanei lahhan nyokei nelei, nevaijü Saulei yanlu kong nyokei nelei.

²³Saul hatü Jonathan nyi yemmü nyushiyao bamtei-aongtei, phahji yahyangtei; dipü nyih-ao baong nehan, alang mü shangpüba, mailang mao wong kohpüba nyu.

²⁴Oh Israel nyühathü, amphong kü ashak hakla ümphopü, hatü ammei ow kü hon shihphopü Saul nangkü theptuh.

²⁵Thepju kü hampathü mekei dopa! Jonathanü ammei kahshangei jüei shükshi nyüke.

²⁶ngei nüng kü mahng thepnyeih, Oh ngelei mongjempa Jonathan; Nüngi ngei kü longi kenpeih; Nyühathüi kenpü mao nyeishi nüngi ngei kü kenpü thamashi.

²⁷Hampathü mekei dopa, hatü vehok phunglang kemei mahdaipa!