Read Phom Naga 2 SAMUEL 10 Bible Online

2 SAMUEL 10 - Phom Naga bible

2 SAMUEL 10

¹Hepak kansho hük angpheikü Ammon ongpa didaitü büpalei cheha Hanuni büpa kü jeiyei ong vai.

²Davidi, “Chepa Nahash-i ngei kü bampü hupü keiha ngeiyao Nahashlei cheha Hanun mü bamteishi nyuhen hih” shei deih. Hanangkü Davidi chepa mü mekei bamteishi nyu, büpa mao bamteihen jung eyei phongmokbü hanei shom. Mechem Davidei phongmokbüthü Ammon kahdok ngoijapa,

³Ammon am mübüthüi jomei ongpa Hanun kü, “Davidi bamteihen eyei shompai hingmei büpai ampa kü dhüm shuohnyeih shei nüngi deihnyu je? Davidi hathüyü nüng touei jenei chingnyü, kahmük dokhen gühshukhen, hatü jen hahtükhen shei shompü nevaipü je” shei e.

⁴Hanangkü Hanuni Davidi shompü shennyakthü yepei shatü jomei jumum hükkeishing kuptük, hatü jomei büm-ow jiam kü shüng mü jiüshi vettüktü leishihteke.

⁵Mechem David kü hapa jung ejapa, büpai hathü mü pongteinüng shennyakthü shom; mehenangkü jom longi veü pongteke. Ongpai jomphong kü, “Ammei jumum manglu thahshi Jerikolei chongkei, hapheikü mon leikei” shei e.

⁶Mechem Ammon ami David mü ve leiteke shei nyingpa, Ammon ami Beth-Rehob hatü Zobah leipü Aramea am la mü daiyei hokpü veshan haja kukha, hatü Maakah ongpa leipü veshan haja hük, hatü Tob leipü veshan haja anpünyi phuoei yahteke.

⁷Mechem Davidi ha jung danpa, büpai Joab hatü veshanthü mü hampathü peü hokhen shom.

⁸Ammon am aongei jomei chingnyü penyüsha touei show ling, hatü Zobah hatü Rehob leipü peipü Aramea am hatü Tob hatü Maakah leipü veshanthüyü koshoyalei nyu.

⁹Joabi jomei ngaümphei lemei hatü sheshalem kemeilei vepathü show uodaiteke shei nyingei Israel am veshan meipüthü hanei jetü Aramea am mü hokhen tuh.

¹⁰Aopüthü büpai büpalei chenaü Abishai-i mütü Ammon am mü hokhen tuhphong.

¹¹Joabi, “Aramea am longi wong kohshi chongküjema amphong peiyei ngei kü sheühshih; shejao am kü Ammon am ahshi wong kohshi nyuküjema ngei peiyei am kü sheühphahen.

¹²Am wong kohtuh, hatü jenei nanglak hatü jenei Kahvangei chingnyüthü shingvaishi monglongshi hokshah; SHEMBÜPAi mehe büpa kü mei, ha dükphahen” shei e.

¹³Hanangkü Joab hatü büpa mü nyupü veshanthü Aramea am mü hokhen thepjulei heih, hatü jom büpa toueipü nyaidai.

¹⁴Mechem Ammon ami Aramea am nyaidaipü eepa, jomphongao Abishai toueipü nyaidai, hatü chingnyü mongei shüdai. Hanangkü Joabi Ammon am mü hokpü kübü Jerusalemei leidai.

¹⁵Shejao mechem Aramea ami jom kü Israel ami neüshuohpü nyingpa, jom shao chemi thai.

¹⁶Hadadezeri Euphrates yungdang leipü Aram am müei leihen shomei müei leiteke. Hadadezerlei veshan mübü Shobakh-i shangjing vaitü Helamei heih.

¹⁷Mechem hapa jung David kü eshuohpa, büpai Israel am kemei thaihü, hatü Jordan yungdang homei Helamei heih. Aramea ami David mü hokhen show lingtü büpa mü hok.

¹⁸Shejao jom Israel am toueipü nyaidai, hatü Davidi koyei kharithü kü uopü veshanthü kho nyet, hatü la mü daiyei hokpü veshanthü haja pinyi jü. Büpai jomei veshan mübü Shobakh-ao baptü hatouei jü.

¹⁹Mechem Hadadezer ong phangkü nyupü onghathüi Israel ami jom neütükpü eepa, jomi Israel am mü chingmei ling, hatü jom phangkü nyu. Hanangkü Aramea ami Ammon am kü hajük kü sheühhen nyemdai.