Read Phom Naga 2 SAMUEL 12 Bible Online

2 SAMUEL 12 - Phom Naga bible

2 SAMUEL 12

¹SHEMBÜPAi David touei Nathan shom. Nathani David touei peiyei büpa kü, “Ching hükei shennyak nyi nyuteke; hükü shemmei, hükü taopa.

²Shemmeipalei mi hatü mohoh longi nyu;

³shejao taopa-i shakhahpü mi chebiha hük mü lenei lebü meheyao neshiü. Büpai hapa mi büpa hatü chehathü mü chemi büpalei hahying üh-ei, büpalei yungshong kü yingei hatü büpalei shüngdok shangkü haüshi shinhüei, hatü hapayü laophülei yiükha hük keiha angteke.

⁴Shaang shemmeipa amei yenpa hük ngoi, shejao shemmeipai jomei ngoijapü yenpa kü hahying temnüng büpalei mi nevaijü mohoh neyah-i taopalei mi chebiha hük mon nyupü ha yah-ei jomei ngoijapü yenpa kü hahying temei ühpü khih” shei e.

⁵Davidi hapa shemmeipa kü mongshih, hatü Nathan kü, “Vanyangyem SHEMBÜPAlei men kü enyeih, hapakei dükpü shennyakü dihen shangei nyüke;

⁶mehenangkü büpai phahji neshiüi hapa dou dükpü nangkü shing ali shemhen vongbong khih” shei e.

⁷Hahepak kü Nathani David kü, “Hapa shennyak-ü nüng khih! SHEMBÜPA, Israel Kahvangi hapakei enyüke: ‘Ngei nüngü Israel shak kü ong vaihühen shingvaishi thiteiphuei jepeih, hatü Saulei lak kübü ngei nüng yangpeih.

⁸Ngei büpalei ongching hatü chenyühathüao nüng kü shuohpeih. Ngei nüng kü Israel hatü Judah phangthü shuohpeih, hatü hapaiyao maandaiteke shei shejema ngei shao nyeishi shuohhen vaipeih.

⁹Nüngi mehekei SHEMBÜPAlei shah yaktüktü büpa touei henüng mang dou düknya? Nüngi Hit am Uriah vehok kü jütükhütü büpalei nyüha nüngei nyüha vaishi yahteke. Nüngi büpa Ammon amei yani mahhütükteke.

¹⁰Hanangkü shaang, nüngei shemong kübü yan mechemao neyanpih; mehenangkü nüngi ngelei shah neyah-i Hit am Uriahlei nyüha nüngei nyüha vaishi yahteke.

¹¹SHEMBÜPAi ha enyüke: Nüngei shemong mong kü-üng nüng homei shanghah hük vamhühen. Nüngei müki eeshi ngei nüngei anyühathü yah-ei lebü shennyak hük kü shuohhen, hatü büpai nyihnüng heshotapa kü jom mü shihen.

¹²Nüngi hapa dou joshi dükpeih, shejao ngei Israel am peüi eeshi heshotapa kü hapa dou dükhen’ ” shei e.

¹³Hahepak kü Davidi Nathan kü, “Ngei SHEMBÜPA khüei mang thahteke” shei e. Nathani jangei, “SHEMBÜPAi nüngei mang yahlangteke. Nüng nedipih.

¹⁴Shejao nüngi hapakei dükpai SHEMBÜPA kü longi yaüeilungteke; nüng kü bühküpü hapeü didaihen” shei e.

¹⁵Nathan shemei leidaipheikü Uriahlei chenyühai David kü bühjapü naü kü SHEMBÜPAi bhei, hatü naü tüng.

¹⁶Davidi naü nangkü Kahvang kü phop. Büpai shüaeiyungleyei shem mongei shüei yajeih kahdokei lemshi nyu.

¹⁷Büpalei shem leipü lakchongbüthüi büpa touei yaongtü büpa phukhen khe, shejao büpai hayao nebang, hatü büpai jomphong leipü meheyao nehah.

¹⁸Nyih nyetpabü kü naü didai. Davidei chongphobüthüi David kü naü didaiteke shei ehen nyemdai; mehenangkü, “Naü mangdi-i nyushi dangkao jeni epü kü Davidi nebang. Naü didaiteke shei mekei jeni büpa kü eshuohhenang? Büpa laophü nyingi vongshüh vaikahen khih” shei deih.

¹⁹Shejao mechem büpalei chongphobüthüi nümei eteipü Davidi danpa, naü didaiteke shei büpai nying, hatü büpai, “Naü didaiteke je?” shei phe. Jomphongi, “Hayü khih” shei e.

²⁰Hahepak kü Davidi kahdok leipü paoei hangha laktü meli nyioei ashakviha jeitü SHEMBÜPAlei shemei daiyei khüm. Hapheikü büpa shemei leiyei büpai yüpü nangkü jomphongi büpa kü hahying shuoh, hatü büpai ha hah.

²¹Büpalei chongphobüthüi büpa kü, “Nüngi hapakei mehekei düknya? Naü yemmü nyushi-angü shüaeiyungleyei thepei nyutü didaijüang mehekei paoei hahyingnya?” shei e.

²²Büpai jom kü, “Mechem naü yemmü nyu, üpai nyingpa, SHEMBÜPAi ngei kü phahjiei naü nyemyangpha shei deihshi ngei shüaeiyungleyei thepeiyoungpeih” shei e.

²³“Shejao shaangü büpa didai; mehekei ngei shüaeiyunglehen? Ngei büpa yangaokhen je? Ngei-ang büpa touei nyih hük daihen jamiyü büpa ngei touei nyokei neleikahen” shei e.

²⁴Hapheikü Davidi chenyüha Bathsheba mong nyiushem meihü, hatü büpai pinnyü mü shi, hatü pinnyüi büpa kü yeshang hük büh, hatü büpai naü kü Solomon shei men. SHEMBÜPAi büpa kü bam,

²⁵hatü SHEMBÜPAi büpa kü bampü nangkü büpai Nathan thibü mü shah shomei büpa kü Jedidiah shei men.

²⁶Hahepak kü Joabi Ammon amei chingnyü Rabbah mü hok, hatü hapa ongching omei yah.

²⁷Hahepak kü Joabi David touei phongmokbüthü shomei, “Ngei Rabbah am mü hoktepih, hatü jomei yung shoshing omei yahtepih.

²⁸Hanangkü shaang aopü nanglakthü thaihütü hapa chingnyü hahtuh, hatü omei yahtuh. Hei nevaijema ngei hapa chingnyü hahhen, hatü hayü ngelei men vaidaihen” shei e.

²⁹Hanangkü Davidi nanglakthü peü chemi thaihütü Rabbahlei aongei hapa chingnyü hahtü omei yah.

³⁰Büpai Ammon amei kahvang lajei shangjing leipü yah, hatü hapa dokshuohjü hon dok nga nyu, hatü halei douvang yaongthüao shihtü nyu, hatü hapa Davidei shangjing kü thenteke. Büpai hapa chingnyü leipü douhinang longi yah,

³¹hatü büpai haleipü shennyakthü müei leiyei jom kü pü vethüei, nyiam yüei, nyiam ay yah-ei dou dükhüei, hatü itayaong oukei angteke. Büpai hapakei Ammon amei chingnyüthü peülei dükhüteke. Hapheikü David hatü nanglakthü peü Jerusalemei nyokei lei.