Read Phom Naga 2 SAMUEL 17 Bible Online

2 SAMUEL 17 - Phom Naga bible

2 SAMUEL 17

¹Ahithopheli Absalom kü, “Ngei veshan haja anpünyi jeküshah, hatü sheya-üng David phei changei daishah.

²Büpa nyiuei wong neshiüi chongküjü ngei jühen. Ngei büpa kü nyem shaohen hatü büpa mü nyupü shennyakthü peü nyemei nyaidaiphahen. Ngei ongpa mon jühen,

³hatü nanglakthü kemei laophülei baha touei nyüha doi peipükei müei leikahen. Nüngi shennyak hük mon jühünyüke, shejao aopü nanglakthü meishi tuhhünyüke” shei e.

⁴Hapa küpjanü meiangke shei Absalom hatü Israel am mübüthü peüi deih.

⁵Shejao Absalomi, “Ark am Hushai kao nyüktuh, büpaiyao mehe ekahen bangshah” shei e.

⁶Mechem Hushai büpa touei peijapa, Absalomi büpa kü, “Ahithopheli hapa dükhen epü khih. Büpai epükei jeni dük-üla? Hapakei nevaijema, nüngi deihpüyao ekütuh” shei e.

⁷Hushai-i Absalom kü, “Ahithopheli epü shahnyingü hapa hepak shingvaishiyü nemeiang.

⁸Ampa hatü büpalei shennyakthüyü ahshi mangshi hokpü shennyakthü, hatü cheha yahlangjü sheptao mangpükei nyüke. Ha mü lenei ampayü ponghok vaanshenghen longi nyingpü shennyak; büpai yanüng veshanthü mü nepaümnyih.

⁹Shaangao büpayü yaongsha nevaijü shing haneilei joshi shiühen. Büpalei veshanthüi shong nüngei veshanthü jüjema, hapa danpü peüi, ‘Absalom phei müpü veshanthü jüpüja’ ” shei eteihen.

¹⁰Hahepak kü mailang kei monglongpü veshanthü nyempai mong maandaihen; mehenangkü Israel am peüi ampa, hatü büpa mü nyupüthüyü monglongpü veshanthü shei nyingei nyüke.

¹¹“Shejao nüng kü ekahen shahnyingü ha hih: Dan kübü Beer-sheba thahshi yungching bhihhiphang keiha Israel am aokpü thahshi nüng touei thaihütuh, hatü nüngao omshi hoknüng daituh.

¹²Hahepak kü-ang büpa melemei danghenshang yemhen, hatü kahdok kü nyien shükpükei jeni büpa kü laongei shükhen; büpa hatü büpa mü nyupüthü üpayao neyangaokhen.

¹³Büpa chingnyü mongei shüdaijema, Israel am kemei vü thaiyei shentü hapa chingnyü kahjilei shüei shanhen hatü yaongphaang hükao kahshangei aoei netuhphongpih” shei e.

¹⁴Absalom hatü Israel shennyakthü kemei, “Ark am Hushai-i epeyü Ahithopheli epü mao meipüba khih” shei e. SHEMBÜPAi Absalom lomohhühen shingvaishi Ahithopheli epü shahnying meipeyü nejiüpükei leitük.

¹⁵Hapheikü Hushai-i Zadok hatü Abiathar ngongpa nyi kü, “Ahithopheli Absalom hatü Israel am mübüthü kü hapakei dükhen eshuohpeih.

¹⁶Hanangkü shaang David kü shahjang lomi shomei, ‘Yanüng jahpanei yung taenshingei tepaüm shejao Jordan homei heihdaituh; hei nevaijema ongpa hatü büpa mü nyupü shennyakthü peü jütükhen khih’ ” shei e.

¹⁷Chingnyülei shüpü mih-i eehen khih shei deihpü nangkü Abiatharlei cheha Jonathan hatü Zadokei cheha Ahimaaz nyiyü En Rogel yungkukei danei nyuhamteke, hatü chongphobü nela hüki jijinyi kü eshuohjü jiji-i ongpa kü eshuohhamteke.

¹⁸Shejao nethe hüki jiji eeyei Absalom kü ha lushuohteke. Hanangkü jiji lomi nyaiyei daiyei Bahurimei shennyak hükei shemei shü, hatü büpalei chingshe konei yungkuk hük nyu; hapa mongei jiji shüdai.

¹⁹Hapa shennyakei chenyühai yung kü küppü shaküp yah-ei küptü hapa shangkü hah yemtük; hanangkü meheyao hayaoha shei nenyingaok.

²⁰Absalomei shennyakthüi hapa nyühalei shemei peiyei pinnyü kü, “Ahimaaz hi Jonathan nyi melei nyüpa?” shei phe. Hapa nyühanyüi jomphong kü, “Jijiyü yungyen homei lüdaitih” shei e. Hapa shennyakthüi yemjao meheyao nedang, jomphong Jerusalemei leidai.

²¹Hathü leidaikem pheikü jijinyi yungkuk leipü vamei leiyei David ongpa kü ha jung e. Jijinyi-i David kü, “Yung homei lomi heihdaituh; Ahithopheli nüng khüei hapakei eshuohpü vaai” shei e.

²²Hanangkü David hatü büpa mü nyupü shennyakthü kemei Jordan yung homei heihdaikem; vangngaipü thahshi Jordan yung nehomi üpayao nenyu.

²³Mechem Ahithopheli büpai epü shahnying neyah-ang shei nyingpa, büpai laophülei gadu kü uotü shem yemei lei, hatü shem meishi jungei tuhphongtü büpa bakla kü phenei di. Büpalei mahng chepalei mahngchongei vü.

²⁴Mechem Absalomi Israel am kemei mütü Jordan yung homei heihpa, hahepak kü Davidü Mahanaim ngoidaitü nyuteke.

²⁵Absalomi Joab nangjei Amasa veshan mübü vaihen je. Amasayü Ishmael am Jetherlei cheha nyuteke; büpai Nahashlei yiükha Abigail yah; pinnyü-ü Joabei chenyü Zeruiahlei chenaü nyu.

²⁶Israel am hatü Absalomi Gilead kahdokei baümtap ve.

²⁷Mechem David Mahanaim ngoijapa, Ammon am Rabbah leipü Nahashlei cheha Shobi, Lodebar leipü Makirlei cheha Ammiel, hatü Rogelim leipü Gilead am Barzillai,

²⁸hathüi lüng, chilimji, haümdük, wheat, barley, atta, ngoutükpü aungjük, lihao

²⁹nyahjiü, ammathi, mi, mohoh amma cheü koei peiyei David hatü büpalei nanglakthüi hahhen shuoh. Mehenangkü jomi, “Hathü shennyakthü-ü jahpanei aeiyeileyei nyiueinangei nyupü khih” shei etei.