Read Phom Naga 2 SAMUEL 18 Bible Online

2 SAMUEL 18 - Phom Naga bible

2 SAMUEL 18

¹Hapheikü Davidi büpa mü nyupü shennyakthü kemei thaihütü haja shak kü kho shak kü mübüthü je.

²Davidi veshanthü khong jem vaishi hapakei han: Phaihan jem khongkü phaihan hük Joabi mühen, phaihan hük Zeruiahlei cheha, Joabei chenaü Abishai-i mühen, hatü phaihan hük Gath am Ittai-i mühen hanteke. Ongpai shennyakthü kü, “Ngeiyao daiküshah” shei e.

³Shejao shennyakthüi, “Nüng ham mü tedaikei; mehenangkü ham nyaiyei leidaijao jomi meheyao ham nang hayaoha deihpü nechongkahen. Ham hükkeishing didaijao jomi ham nang heshap kü neshiü. Shejao nüngü hamphong keipü haja an shangpeih; hanangkü nüngiyü chingnyü leipü ham kü sheühpü mon shomshih” shei e.

⁴Ongpai jomphong kü, “Am kü mehe mei, ngei ha dükshah” shei e. Hanangkü shennyakthü kho mü haja mü daishingkü Davidü pe shadenei yaong.

⁵Ongpai Joab, Abishai hatü Ittai hathü kü, “Amphongi ngelei men kü nethepa Absalom kü nephahji-i tedük” shei e. Mechem ongpai veshan mübüthü kü Absalom nangkü ngeükhüam shuohpa, nanglakthü peüi ha danteke.

⁶Hanangkü veshanthüi Israel am mü hoknüng kahjilei heih, hatü Ephraim jahpanei hokteke.

⁷Halei Israel shennyakthü kü Davidei chongphobüthüi neü, hatü ha nyih shennyak haja kukha thahshi jü.

⁸Hapa vehok kahmük peülei dai, hatü yani jüpü mü nyeishi phaülei mahkem.

⁹Absalomi Davidei shennyakthü heüteke. Absalomü gadu kü uotü dai, hatü büpalei gadu longkham pükao ngetpü phangkü mokei daishingkü Absalomü pükao kü shanghichong aa kü itphongtü gadu lüdaitü chongjateke.

¹⁰Davidei shennyakthü khongkü hüki ha eeyei Joab kü, “Longkham pükao aa kü Absalom sheüshi eepeih” shei ejateke.

¹¹Joabi büpa kü shah-om shuohpü shennyak kü, “Mehe, nüngi büpa eepü je? Mehekei nüngi hatouei-üng baptü jüei neyakphongpa? Nüngi hapakei düktü leikülang meyü ngei nüng kü ngin pha an shüngshep hük shuohhah shepeih” shei e.

¹²Shejao hapa shennyaki Joab kü, “Nüngi ngei kü ngin haja haja lakmongei shümphüjao ngei ongpalei hapeü kü lak neshihpih. Jenei ongpai nüng, Abishai hatü Ittai kü, ‘Ngelei men kü nethepa Absalom yangei tuhtuh’ shei epü danteke.

¹³Ngelei yangnyu mahhen kao nenyemi ngei büpa kü nemeipü dükjü, hatü ongpai hapa jung danjü nüngi ngei khüambakei neyaongküpih” shei e.

¹⁴Joabi, “Nüng mü henüng eteiyei hepak angkü netükpih” shei etü büpai phung jem notü heih-ei Absalom yemmü longkham pükao kü ittü sheüshi nyushi mongdang kü hümteke.

¹⁵Joabei vehok phunglang kobüthüi Absalom shonei yaongtü büpa kü baptü jü.

¹⁶Hapheikü Joabi amit vüng, hatü veshanthüi Israel am kü changpü doh; mehenangkü Joabi jom nyüklang.

¹⁷Jomi Absalom yah-ei yingnyülei kahsha hük kü shükphongtü büpa shangkü yaongthü longi thaiyei shüngphongteke. Israel am kemei laophülei shem yemei nyaiyei leidaikem.

¹⁸Absalom yemmü nyushi Ongpalei Kahjilei büpai yaong shemnyü hük haongei tuh; mehenangkü büpai, “Ngelei men nedoh-i deihhen shingvaishi hapeü neshiü” shei e. Hanangkü büpai hapa yaong shemnyü kü büpalei men nyükhen eyei tuh, hatü shinnyih thahshi hapa kü “Absalom Yaong” shei nyüknyüke.

¹⁹Shaang Zadokei cheha Ahimaaz-i, “Ngei leiyei ongpa kü SHEMBÜPAi nüngei vepalei lak kübü nüng yangteke shei shahjang koei leishah” shei e.

²⁰Joabi büpa kü, “Nüngi shinnyih hapa shahjang koei telei; lebü nyih kü leituh; mehenangkü ongpalei ha didaipü nangkü nüngi shinnyih hapakei tedük” shei e.

²¹Hapheikü Joabi Kush am shennyak hük kü, “Nüng leituh, hatü nüngi mehe eepa, ha ongpa kü eyeishuoh” shei e. Hanangkü hapa Kush am shennyaki Joab touei aümei shatü mokei lei.

²²Zadokei cheha Ahimaaz-i shao Joab kü, “Mehe shangkü vaijao ngei Kush naüha phei changei leishah” shei e. Shejao Joabi, “Ngelei hapeü, mehekei nüng hajük leihünya? Nüngi shahjang koei leipai shei mehe lakleiyao danghen nevai” shei e.

²³“Mehe shangkü vaijao ngei leihüangke” shei e. Hanangkü Joabi “Leituh” shei e. Hanangkü Ahimaaz-i kahji lemei mokei leiyei Kush am naühalei she yeiyei lei.

²⁴Mechem David peshaden nyi aa kü uoshi nyupa, yompü shennyaki bham kü bakei aongei yaongtü veishuohshingkü büpai shennyak hük mokei leijapü ee.

²⁵Yombüi ongpa kü nyüktü ha eshuoh. Ongpai, “Büpa mon vaijema, shahjangmei koei leiküpü vaihen” shei e. Hatü hapa shennyak yopüba ngoiyei lei.

²⁶Hahepak kü yombüi shao lebü shennyak hük mokei leijapü eeyei büpai shaden yombü kü, “Veihümao, shao lebü shennyak hük mokei leikünyüke!” shei e. Ongpai, “Büpaiyao shahjangmei koei leiküpü vaihen” shei e.

²⁷Yombüi, “Ngei eepüleiyü shongpü shennyakü Zadokei cheha Ahimaaz kei eenyüke” shei e. Ongpai, “Büpayü shennyak mei hih; hapayü shahjangmei koei leiküpü vaihen” shei e.

²⁸Hahepak kü Ahimaaz-i ongpa kü nyüktü, “Peü meishi khan nyüpeih” shei e. Büpai ongpa touei kahdokei aümei shatü, “SHEMBÜPA, nüngei Kahvangei men longtuh! Büpai ngelei shembü ongpa khüei yaongpü shennyakthü neütükteke” shei e.

²⁹Ongpai, “Nethepa Absalom meishi nyüla?” shei phe. Ahimaaz-i, “Mechem Joabi ngei shompa, üathamapü longi eepeih, shejao ha mehe shangkü ngei nenyingangpih” shei e.

³⁰Ongpai, “Antolei heih-ei yaongshi chongkei” shei e. Hanangkü büpai shinei heihtü halei yaongshi nyu.

³¹Hapheikü Kush am shennyak ngoiyei ongpa kü, “Ngelei shembü ongpa, shahjangmei bangtuh! SHEMBÜPAi shinnyih nüng khüei yaongpü shennyakthü kübü nüng yangteke” shei e.

³²Ongpai hapa Kush am naüha kü, “Nethepa Absalom meishi tuhla?” shei phe. Hapa Kush naühai, “Ngelei shembü ongpalei vepathü, hatü nüng kü nemeihen shei yaongpüthü peü kemei hapa nethepa kei-üng chongkahen” shei e.

³³Ongpai longi mongmang hatü büpa peshaden homei shangpa dung-amei aongei thep. Büpa aongyaki, “Oh ngelei hapeü Absalom! Ngelei ha, ngelei hapeü Absalom! Nüng nangjei ngei-ang dihah shepü-ü, Oh Absalom!, Ngelei hapeü, ngelei hapeü!” shei mahng thepteke.