Read Phom Naga 2 SAMUEL 2 Bible Online

2 SAMUEL 2 - Phom Naga bible

2 SAMUEL 2

¹Hapheikü Davidi SHEMBÜPA kü, “Judah chingnyüthü hükei ngei aongei nyuhen hiang?” shei phe. SHEMBÜPAi büpa kü, “Aongtuh” shei e. Davidi, “Mepalei ngei aonghenang?” shei phe. Büpai, “Hebronei aongtuh” shei e.

²Hanangkü Davidi halei büpalei chenyüha Jezreel am Ahinoam hatü Karmel am Nabali tuhphongpü vaümnyü Abigail nyi müei aong.

³Davidi büpa mü nyupü shennyakthü peü jomei shem am omshi müei aongei Hebron jilalei nyu.

⁴Hahepak kü Judah nanglakthü peiyei Judah phangkü ong vaihen David jeteke. Mechem jomphongi David kü, “Saulei mahngü Jabesh-Gilead ami vüpeih” shei eshuohpa,

⁵Davidi Jabesh-Gilead am touei phongmokbüthü shomei jomphong kü, “Ammi ammei ongpa Saul kü dhüm huei büpalei mahng vüpü nangkü SHEMBÜPAi am kü moihimantuh.

⁶Shaang SHEMBÜPAi am kü büpalei phahji nyemhu! Ammi ha dükpü nangkü ngeiyao am kü hapakei aihük mü bampü huhen.

⁷Hanangkü shaang am wong kohtuh hatü monglongtuh; mehenangkü ammei ongpa Saul didaiteke, hatü Judah nanglakthüi ngei jomei ong vaihüteke” shei e.

⁸Shejao Nerlei cheha Abner, Saulei veshan mübüi Saulei cheha Ishbosheth müei Mahanaimei dai.

⁹Halei Abneri Ishbosheth kü Gilead, Asher, Jezreel, Ephraim, Benjamin hatü Israel kempü kü ong vaihü.

¹⁰Saulei cheha Ishbosheth-i mechem Israel kü ong vaiyei chongpangpa, büpa nyübüh vangbong pinyi nyu, hatü büpai vangbong nyi vanglem lem. Shejao Judah am phang David phei kü mü.

¹¹Davidi Judah phang kü Hebronei bong nyet mü lenyang vok vanglem lemteke.

¹²Nerlei cheha Abner hatü Saulei cheha Ishboshethlei chongphobüthü mütü Mahanaim leipü Gibeonei dai.

¹³Zeruiahlei cheha Joab hatü Davidei chongphobüthü daiyei Gibeon shemyungei jom mü pongtei. Jom khong nyi shemyung dangpong kü uoteke.

¹⁴Abneri Joab kü, “Nethethü hanei jetü ji-i veishi lakhilak hingei nyemdekei” shei e. Joabi, “Jomphong vamei nyemde” shei e.

¹⁵Hanangkü jom yaonghütü Benjamin hatü Saulei cheha Ishbosheth nyi shing jom anpünyi hatü Davidei chongphobüthü jom anpünyi ieyei jeteke.

¹⁶Shennyak peüi laophülei vepalei shangjing kü laki düktü yanlui vepa lemei bapteke; hanangkü jom peü chemi doei di. Hanangkü Gibeon leipü hapa shing kü Helkath-Hazzurim shei nyüknyüke.

¹⁷Ha nyih vehok longi mangshi hok, hatü Davidei shennyakthüi Abner hatü Israel shennyakthü neüteke.

¹⁸Zeruiahlei yeshangthü Joab, Abishai hatü Asahel halei nyu. Shaang Asahelü shaok keiha la shangkhah-i nyu.

¹⁹Asaheli Abner phei kü laknyong lakdah melemeiyao neyaaki changei dai.

²⁰Hahepak kü Abneri yaakei veitü, “Asahel! hapayü nüng je?” shei phe. Büpai, “Hih, ngei hih” shei e.

²¹Abneri büpa kü, “Laknyong nevaijü lakdah lemei yaakei veitü nethethü hükei vehok phunglang yahhahtuh” shei e. Shejao Asaheli büpa phei kü changpü nedoh.

²²Abneri Asahel kü shao, “Ngei kü changpü dohtuh; mekei etü ngei nüng kü hattü kahdokei shükphonghenang? Ngei anjei Joab mü mepa dhe kotü heüteihenang?” shei e.

²³Shejao büpai nyokei neleipih shei e. Hanangkü Abner-i büpalei phungi vom kü peishi hüm. Büpa hatouei do, hatü dopü shingei di, hatü Asahel doei dipü touei peipü peüi nemoiloi-i yaongdaikem.

²⁴Shejao Joab hi Abishai nyi-i Abner phei changei dai, hatü vanghe shüdaiyaki jiji nyi Gibeon lemei Giah yopailei nyupü Ammah Kahshangei pei.

²⁵Benjamin am kemei khong hük vaishi lingtü Abner changei dai hatü jomi kahshang shangchingei yomei nyu.

²⁶Hahepak kü Abner-i Joab kü e, “Den kü baonghok vaanshengei mon nyuhen je? Hapai shahyaki dohkahen shei nenyingnyu je? Meshük thahshi nüngi shennyakthü kü ammei jeihinaüthü kü changei daipü kübü leidaikei shei ne-e-i nyuhenang?”

²⁷Joabi, “Vanyangyem Kahvang med kü eshah, nüngi hapakei ne-elangmeyü nanglakthüi nedoh-i ngenep thahshi changei daihah shepeih” shei e.

²⁸Hanangkü Joabi amit vüngshuohjü shennyakthü peü shenei yaong, hajük kü Israel am kü changei nedai hatü nehoki doh.

²⁹Abner hatü büpalei shennyakthü vangnyak Arabah homei dai; jom Jordan yung homei nükham hahshe yangkemei kamei Mahanaim ngoi.

³⁰Joabi Abner phei changei daipü leiyei nanglakthü peü chemi thaihüshingkü Asahel mü Davidei chongphobüthü jom anpüshü mahdaitü nyujateke.

³¹Shejao Davidei chongphobüthüi Benjamin am Abnerlei shennyakthü jom kho jem mü pejem jüteke.

³²Jomi Asahelei mahng leiyei Bethlehemei chepalei mahngchongei vü. Joab hatü büpalei shennyakthü vangnyak kamei paümei dhomi Hebron ngoiteke.