Read Phom Naga 2 SAMUEL 24 Bible Online

2 SAMUEL 24 - Phom Naga bible

2 SAMUEL 24

¹Shao SHEMBÜPAi Israel am kü mongshih, hatü büpai David homei jom kü shanghah koei peihü. SHEMBÜPAi büpa kü, “Daituh, hatü Israel hatü Judah veshanthü shangkuk ietuh” shei e.

²Hanangkü ongpai Joab hatü büpa mü nyupü veshan mübüthü kü, “Israel jatthü peü touei Dan kübü Beer-sheba thahshi daituh, hatü veshanthü meshük nyüpa ngei nyinghen shingvaishi shangkuk ietuh” shei e.

³Shejao Joabi ongpa kü, “SHEMBÜPA, nüngei Kahvangi veshanthü shaang nyupü mü kho uoshing mü nyeishi nyemdahüma hatü ngelei shembü ongpalei müki ha eehen. Shejao mehekei ngelei shembü ongpai hapa keipü dou dükhünya?” shei e.

⁴Shejao ongpalei shah-i Joab, hatü veshan mübüthü shak kü nyu. Hanangkü Joab, hatü veshan mübüthü ongpa toueipü daiyei Israel veshanthü shangkuk ieteke.

⁵Jom Jordan homei heih-ei Gad kahdokei kahji jiam kü chingnyü Aroer apshaphi kü baümtap ve, hatü haleipü Jazerlei aong.

⁶Hapheikü jom Gilead kahdokei pei hatü Hit amei kahdok Kadeshlei pei hatü Dan kahdokei heih, hatü Dan leipü Sidonei heih,

⁷hatü Tyre amei penyüsha hatü Hiv hatü Kanan amei chingnyüthü peüei pei, hatü jomi Judah pehephi Beer-shebalei shomei pei.

⁸Jomphongi kahdok kempülei daipheikü Jerusalemei lenyang shü mü nyih kukha pheikü nyokei lei.

⁹Joabi ongpa kü nyangei leipü veshanthü bhei-ie shah-om shuoh. Israel kü yan noshi hokaokhen veshanthü 800, 000 hatü Judah kü 500, 000 nyuteke.

¹⁰Shejao Davidi veshanthü shangkuk iepheikü büpa longi mongshangei deih, hatü büpai SHEMBÜPA kü, “Ngei dükpü doui nüng touei mang longi thahteke. Shejao shaang, Oh SHEMBÜPA, nüngei chongphobüi thahpü mang tükshih shei phopnyüpeih; mehenangkü ngei ngadou dükpü khih” shei e.

¹¹Nepphei David shipü paopheikü SHEMBÜPAlei shah Davidei thibü Gad touei peiyei büpa kü,

¹²“Heihtuh, hatü David kü, SHEMBÜPAi hapakei enyüke: ‘Nüngi jehen dou jem shuohnyeih; nüng kü ngei hapa dükhen shei etuh’.

¹³Hanangkü David touei Gad peiyei büpa kü, ‘Nüngei kahmük kü münghishaü bong jem thahshi peikahen hi, nevaijü lenyang jem thahshi nüngei vepathüi nüng kü changpü kü nyaiteihen hi, nevaijü nüngei kahmük kü cham nyih jem peihahhenang? Shaang hapa kü deih-ei veitü ngei shompü SHEMBÜPA kü mehe shahnyok shuohhen eshih’ ” shei e.

¹⁴Davidi Gad kü, “Ngei mongshang longpü kü nyüpeih. Hangkulei lak kü dolei meyü SHEMBÜPAlei lak kü doshah; mehenangkü büpalei phahji yahyangü longshi nyüpeih” shei e.

¹⁵Hanangkü SHEMBÜPAi hapa nep kübü pangei itpü nyih mangpeih thahshi Israel am kü cham peihü, hatü Dan kübü Beer-sheba thahshi nanglak 70, 000 thahshi di.

¹⁶Mechem vangsho phongshani Jerusalemao mangtüknüng shei lak nopa, nanglakthü dipü eeyei SHEMBÜPAi mong yeiya hatü nanglakthü hanghihüpü vangsho phongshanthü kü, “Hajük-üng! Amphongei lak leilangtuh” shei e. SHEMBÜPAlei phongshanthü ha hepak kü Jebus am Araunahlei hah tenshingei nyu.

¹⁷Mechem Davidi nanglakthü jütükpü vangsho phongshanthü eepa, büpai SHEMBÜPA kü “Mang thahpü hatü pungpeyü ngei hih. Nanglakthüyü mi keiha mon. Jomi mehe nejiüpü dükpa? Ngei hatü ngelei shem am kü nüngi lak hingtuh” shei e.

¹⁸Ha nyih David touei Gad peiyei büpa kü, “Aongtuh hatü Jebus am Araunahlei hah tenshingei SHEMBÜPA kü moidü hük lingtuh” shei e.

¹⁹Gad thibü homei SHEMBÜPAi epükei David halei aong.

²⁰Mechem Araunah-i veishuohpa, büpai ongpa hatü büpalei chongphobüthü büpa lemei aongjapü eeyei ongpa touei büpa dhe aümei sha.

²¹Araunah-i, “Ngelei shembü ongpa, nüngei chongphobü touei mekeipü kü aongkünya?” shei phe. Davidi jangei, “Nanglakthü kü peipü cham dohhen shingvaishi nüngei hah tenshing shakei SHEMBÜPA kü moidü hük linghen aongküpeih” shei e.

²²Araunah-i David kü, “Ngelei shembü ongpai hapa yahhahtuh, hatü nüng kü mehe mei, ha moila shuohtuh. Hatouei jakpü moila shuohhen mohohbaongthü shüpeih, hatü aw jakhen shangmü hahlüngthü hatü mohoh hanshongthü shüpeih.

²³Hathü kemei, Oh Ongpa, Araunah, ngei-i ongpa kü shuohnyeih” shei e. Araunah-i ongpa kü, “SHEMBÜPA, nüngei Kahvangi nüngei moila nyemyahma” shei e.

²⁴Shejao ongpai Araunah kü, “Tah, ngei nüng kü lop shuohtü-üng shakhen hih. Ngei lat neshuohpü kü ang kübü doui SHEMBÜPA, ngelei Kahvang kü moila neshuohpih” shei e. Hanangkü Davidi hah tenshing hatü mohohbaongthü lop pinyipüan shuohtü shak.

²⁵Davidi halei SHEMBÜPA kü moidü hük ling, hatü halei jakpü moila, hatü mongjempü moilathü shuoh. Hahepak kü kahmük men kü phoppü kü SHEMBÜPAi jang, hatü Israel kübü cham dohdai.