Read Phom Naga 2 SAMUEL 5 Bible Online

2 SAMUEL 5 - Phom Naga bible

2 SAMUEL 5

¹Hapheikü Israel jatthü peü Hebronei David touei peiyei, “Veituh, hamphongü nüngei iy hatü phai.

²Shelei Saul hamei ong vaipü hepak kü thepjulei Israel veshanthü müei daipeyü nüng hih. SHEMBÜPAi nüng kü Israel nanglakthü mi yomhenü nüng vaihen, Israel shak kü vanglem lemhenü nüng vaihen shei epeih” shei e.

³Hanangkü Israel am behethü peü Hebronei David ongpa touei pei, hatü SHEMBÜPA tou mü ongpai jomphong mü vangpüshuwpü ling, hatü jomi Israel shak kü ong vaihen David je.

⁴David vanglem lemei chongpang shingkü büpa nyübüh bong hapüan nyu, hatü büpai bong pinyi thahshi vanglem lemteke.

⁵Hebronei nyushi büpai Judah kü bong nyet mü lenyang vok vanglem lem, hatü Judah hatü Israel kempü kü bong hapüanpüjem thahshi vanglem lem.

⁶Ongpa hatü büpalei shennyakthüi Jerusalemei nyupü Jebus am hahhen dai. Jebus ami David kü, “Nüng hatouei nepeiaokpih; mükphüngpü hatü lakhodaipüthüiyao nüng changei leitükaokhen” shei büpa halei nepeiaokshasha shei deihshi eshuohteke.

⁷Davidi Zion penyüsha omei yah, hatü hapa kü shaang David Chingnyü shei nyüknyüke.

⁸Davidi ha nyih büpalei nanglakthü kü, “Üami Jebus am jühenshang büpai yunglem phungei aongei Davidi jiühitpü lakhopü hatü mükphüngpüthü jütuh” shei e. Hanangkü, “Mükphüngpa hatü lakhodaipü ongshemei peihen neaok” shei eteke.

⁹Davidi penyüsha omei yahtü halei nyu, hatü hapa kü, “David Chingnyü” shei nyük, hatü Davidi Millo kübü pangei chingmongei shüei chingnyü lingteke.

¹⁰David anyei anyei wong kohpüba lei; mehenangkü SHEMBÜPA Jeiyong Kahvang büpa mü nyu.

¹¹Tyre am Hiram ongpai David kü phongmokbüthü, mistrithü hatü yaong bhaokpüthü mü cedar pü shomei Davidei ongshem veteke.

¹²SHEMBÜPAi büpa Israel shak kü ong vaihüteke shei Davidi nying, hatü büpai büpalei ongching Israel nanglakthülei men kü longei anshihteke shei nying.

¹³Hebron leipü Jerusalemei peipheikü Davidi nyüha hatü yiükphü longi yah, hatü David kü hapeüthü longi bühjateke.

¹⁴Hathüyü Jerusalemei bühjapü hapeüthülei menthü: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada hatü Eliphelet.

¹⁷Mechem Philistia ami Israel kü David ong vaihen jepüja shei danpa, jomi veshan changshi temei büpa yemhen aong, shejao Davidi ha danei penyü showtükpü mongei shüdai.

¹⁸Shaang Philistia am Rephaim Kahjilei aongei yaüshi nyu.

¹⁹Davidi SHEMBÜPA kü, “Philistia am mü hokhen ngei daihen hiang? Nüngi jom ngelei lak kü yahpha-üla?” shei phe. SHEMBÜPAi David kü, “Aongtuh, hingmei ngei nüngei lak kü Philistia am yahphahen hih” shei e.

²⁰Hanangkü David Baal-Perazimei heih-ei halei jom neütük. Büpai, “SHEMBÜPAi ngei touei ngelei vepathü yungnyü büng keiha beneilangei shanlangteke” shei e. Hanangkü hapa shing kü Baal-Perazim shei nyüknyüke.

²¹Philistia ami jomei lajei halei yakphong, hatü David hatü büpalei shennyakthüi ha koei leilang.

²²Shao Philistia am aongei Rephaim Kahjilei yaüshi nyu.

²³Davidi SHEMBÜPA kü pheshingkü büpai, “Nüngi jiüshangi te-aong; shejao jomei ngaümphei lemei shinei aongtuh hatü balsam püying yopailei hükpa lemeipü heih-ei hoktuh.

²⁴Mechem ammi balsam püshangei mokpü ngeü danhenshang am hakatuh hatü hokhen pangtuh; mehenangkü hapa lappeyü SHEMBÜPAi Philistia am veshanthü jühen am shekü dainyu khih shei nyingtuh” shei e.

²⁵Hanangkü SHEMBÜPAi epükei Davidi dük, hatü büpai Philistia am Gibeon kübü Gezer thahshi lemyang kü jüteke.