Read Phom Naga 2 SAMUEL 6 Bible Online

2 SAMUEL 6 - Phom Naga bible

2 SAMUEL 6

¹Davidi shao Israel kü meipü veshanthü peüshep 30, 000 thahshi thaihü,

²hatü Davidi büpa mü nyupü shennyakthü peü müei Judah kahdok Baalah leipü layaongei Pela shangei cherubim nyi aa kü uoshi nyupü Vangpüshuwpü Pela mepa kü Jeiyong Kahvangei men shei nyüknya, ha yah-ei leihen dai.

³Jomi hapa Kahvangei Vangpüshuwpü Pela mohoh khari ja kü shihtü kahshangei nyupü Abinadabei shem leipü Abinadabei cheha Uzzah hatü Ahio nyi-i Kahvangei Vangpüshuwpü Pela shihtü mohoh khari müteke,

⁴hatü Ahio-ü Vangpüshuwpü Pela shelei kam.

⁵David hatü Israel phang kemei SHEMBÜPA touei jomei wong kempai kesho lokei, lyre, harp, tambourin, castanet hatü cymbal vüngei phaukteiteke.

⁶Mechem jomi Nakonei hah tenshing ngoipa, mohoh-i huluh shuoh-ei pheüpü nangkü Uzzah-i büpalei laki Kahvangei Vangpüshuwpü Pela kü dük.

⁷SHEMBÜPAi büpalei Vangpüshuwpü Pela kü Uzzah-i dükpü nangkü mongshih-ei Kahvangi Uzzah kü bhei hatü büpa Kahvangei Vangpüshuwpü Pela touei shükshi di.

⁸SHEMBÜPAi Uzzah kü mongshih-ei jütükpü nangkü David mongshih, hatü hapa shing kü shinnyih thahshi Perez-Uzzah shei nyüknyüke.

⁹Davidi ha nyih SHEMBÜPA kü nyem, hatü büpai, “SHEMBÜPAlei Vangpüshuwpü Pela mekei etü ngei jungaokhen?” shei e.

¹⁰Hanangkü Davidi SHEMBÜPAlei Vangpüshuwpü Pela David Chingnyülei neleihahhüi büpai Gath am Obed-Edom am shemei leiyei tuh.

¹¹SHEMBÜPAlei Vangpüshuwpü Pela lenyang jem thahshi Gathlei Obed-Edom am shemei tuh, hatü SHEMBÜPAi Obed-Edom hatü jom shem am peü kü moihimanteke.

¹²Kahvangei Vangpüshuwpü Pela tuhpü nangkü SHEMBÜPAi Obed-Edom am shem kü hatü büpai angpü lemphüli kü moihimannyüke shei David ongpa kü eshuohpü nangkü Davidi yiüei Obed-Edom am shem leipü Kahvangei Vangpüshuwpü Pela David Chingnyülei longi mongongmongleshi ngetnahcheüi yah-ei anteke.

¹³Mechem SHEMBÜPAlei Vangpüshuwpü Pela paipüthüi lakham vok dai, Davidi jom yaonghütü SHEMBÜPA kü mohohbaong hatü nitshüpü mohoh cheha moila shuoh.

¹⁴Davidi nyemin ashak hük mon yah-ei shüng kü loktü SHEMBÜPA kü dhüm shuoh-ei wong kempai phaukteiteke.

¹⁵Hanangkü David hatü Israel phang kemei SHEMBÜPAlei Vangpüshuwpü Pela leneiwongei amit ngeü mü Jerusalemei yah-ei an.

¹⁶SHEMBÜPAlei Vangpüshuwpü Pela David chingnyülei shüyaki Saulei yiükha Mikhali ümha shaden leipü veishuohshingkü David ongpa SHEMBÜPA touei phauktei tungteipü eeshingkü pinnyüi mongei ne-ienelemi deih.

¹⁷Jomi SHEMBÜPAlei hapa Vangpüshuwpü Pela mongei shüei Davidi hapa tuhhen lingpü shingei tuh, hatü Davidi jakpü moila hatü mongjempü moilathü SHEMBÜPA kü shuoh.

¹⁸Mechem Davidi jakpü moila hatü mongjempü moilathü shuoh-ei kempa, büpai Jeiyong SHEMBÜPAlei men kü nanglakthü kü moihiman,

¹⁹hatü büpai Israel nanglakthü thaipü khong nyüha, baha kemei kü aan hükbaong, phai hatü nyalingngupai-i lingpü aan shuoh. Hapheikü nanglakthü laophülei shemei leidaikem.

²⁰Davidi büpalei shem am kü moihimanhen shemei lei. Shejao Saulei yiükha Mikhali David mü pongnüng vamei büpa kü, “Israel amei ong hüki shinnyih mekei laophü nyingi dhüm lüktükhahpa? Ngapa hüki dükpükei büm kübü ashakviha bintüktü veüao neveüi mehekei laophülei chongphopü nelathüi eeshi nyupa?” shei e.

²¹Davidi Mikhal kü, “Ampa hatü büpalei shem am nangjeiyei SHEMBÜPAlei nanglak Israel shak kü vanglem lemhen ngei jepü SHEMBÜPA touei ngei phaukteipeih.

²²Ha mü nyeishi ngei shao dhüm neshiüi leihen mao dükhen, hatü ngei ngelei müksho kü nyeinya maanei leihen, shejao nüngi epü nelathü nangkeyü ngei hapakei dükjao jomi ngei kü dhüm shuohhen” shei e.

²³Saulei yiükha Mikhalü dipü thahshi hapeü nebüh.