Read Phom Naga 2 SAMUEL 7 Bible Online

2 SAMUEL 7 - Phom Naga bible

2 SAMUEL 7

¹Shaang, mechem ongpai büpalei shemei shingnüng chongkhenei nyupa, SHEMBÜPAi büpa kü ngeihpü shonpü vepathü peü kübü chingmei shuoh,

²hatü ongpai Nathan thibü kü, “Veituh, ngei payü cedar pü yah-ei vepü shem kü nyunyüke, shejao SHEMBÜPAlei Vangpüshuwpü Pelayü ashakshemei nyüke” shei e.

³Nathani ongpa kü, “Daituh, hatü nüngei mongei mehe deihshi nyu, ha düktuh; mehenangkü SHEMBÜPA nüng mü nyüke” shei e.

⁴Shejao ha ya-üng SHEMBÜPAleipü shahjang Nathan touei peiyei,

⁵aongtuh hatü ngei chongphobü David kü etuh: SHEMBÜPAi hapakei enyüke: “Ngei nyuhen shem hük vephahenü nüng je?

⁶Ijip leipü Israel am müei daipü nyih kübü pangei shinnyih thahshi shem hük kao nenyuangpih, shejao ashakshem hük kü nyuei shing hük kübü hük shei longteihampeih.

⁷Melei melei ngei Israel am mü longteihenshang, Israel nanglakthü mi yomhen ngei jepü vanglem lembüthü kü, ‘Ngei kü cedar pü yah-ei mehekei shem nevephünya shei ngei chemao ela?’ ”

⁸Hanangkü shaang nüngi ngelei chongphobü David kü SHEMBÜPAi hapakei enyüke shei etuh! Ngei nüngü mi pheikü müshi phenha yingei nyupü kübü ngelei Israel nanglak kü ong vaihen jepeih;

⁹hatü nüng melei dai halei ngei nüng mü nyu, hatü nüng toueipü vepathü peü ngei neütük; hatü kahdoknyü kü peü mü longpü shennyakei men keiha ngei nüngei men longpü leihüpeih.

¹⁰Ngei ngelei Israel nanglak shingvaishi shing hük yahphahen, hatü üamiyao nebukneshaani shingnüng chongkhenei nyuhen shingvaishi ngei jomphong sheiphonghen. Hajük kü nemeipü shennyakthüi shelei ngei,

¹¹Israel nanglakthü shangkü shahphenbüthü jepü nyih kübü keiha jom kü neshüveihen, hatü ngei vepathü peü kübü chingmei shuohhen. “Nyeinya vaishi SHEMBÜPAi nüng kü SHEMBÜPA, büpa nyingi shem hük lingphahen shei enyüke.

¹²Nüngei hantet kemei dijü nüngü nüngei bühipa mü vüphahen; nüng pheikü nüngei hühiha nüngei büm kübü vamhühen, hatü ngei büpalei ongching ong uoshing denshing linghen.

¹³Büpai ngelei men kü shem hük vehen, hatü ngei büpalei ongching ong uoshing den kü chonglingei tuhhen.

¹⁴Ngei büpalei pa vaihen hatü büpa ngelei hapeü vaihen. Mechem büpai mang thahhen, ngei büpa kü hangkulei nyiamlüngi hapeü kü pa-i bheipükei bheihen.

¹⁵Shejao ngei bampü Saul leipü nüng ong vaihühen nangkü ong uoshing yahlangpükei neyahlanghen.

¹⁶Nüngei shem am hatü nüngei ongching ngei touei denden nyuhen; nüngei ong uoshing den den kü nyuhen” shei e.

¹⁷Nathan kü Kahvangi shakei vamei eshuohpü peü David kü eteke.

¹⁸Hahepak kü David ongpai mongei shüei SHEMBÜPA touei uotü, “Ngei üpaang, Oh SHEMBÜPA Kahvang, hatü nüngi ngei kü hajük thahshi müei peihen mü ngelei shemong meheang?

¹⁹hatü hapaiyao nüngei mükmong nema, Oh SHEMBÜPA Kahvang; nüngi shao nüng chongphobülei ngoikahen shemong nangao eteke. Oh SHEMBÜPA Kahvang, hapayü nüngi hangku mü nyingnyoi kü noteipü lem je?

²⁰Ngei mehe nyeinya ekününg! Mehenangkü nüngi nüngei chongphobü nyingei nyüke, Oh SHEMBÜPA Kahvang!

²¹Nüngi lahpü nangkü hatü nüngi mongpükei nüngi hapa dou longpü dükteke, hatü nüngei chongphobü kü ha nyinghüteke.

²²Oh SHEMBÜPA Kahvang, nüng meshük longpüang! Nüng kei üpayao neshiü; hatü nüng mü lenei lebü kahvang üpayao neshiü shei hamei dhaongi danei nyüpeih.

²³Hatü nüngei nanglak Israel kei kahdoknyü kü jat hük Kahvangi laophü lompü nanglak vaihen angei leipü, hatü laophü shing men tuhhen, hatü laophülei nanglak touei lebü jatthü hatü jomei kahvangthü changtüktü jomphong shing longpü hatü nyempühanpü dou dükpü üpa nyüpa?

²⁴Hatü nüngi Israel nanglakthü düngei nüng lompü nanglak vaihen shingvaishi lingei tuh, hatü Oh SHEMBÜPA, nüngi jomei Kahvang vaiteke.

²⁵Shaang, Oh SHEMBÜPA Kahvang, nüngi nüngei chongphobü hatü büpalei shemong nang nüngi lah-ei epü keiha den kü hapa jiühütuh.

²⁶Hapa keiha nüngei men den kü longhühen hatü Jeiyong SHEMBÜPAyü Israel shak kü Kahvang shei shennyakthüi ehen, hatü nüng chongphobü Davidei shem lingei tuhhen.

²⁷Oh Jeiyong SHEMBÜPA, Israel Kahvang, nüngi nüngei chongphobü kü ha shakei vamei, ‘Ngei nüng shing shem hük vehen’ shei eteke. Hanangkü nüng chongphobüi monglongei hapa phoppü nüng kü konyüpeih.

²⁸Oh Jeiyong SHEMBÜPA, nüngü Kahvang! Nüngei shahthüyü hingshangpü, hatü nüngi nüngei chongphobü kü hapa lahpü meipü shuohteke.

²⁹Nüng touei den kü nyuhen shingvaishi nüngi chingmeilemlingei nüngei chongphobülei shemong kü moihimanshih, Oh Jeiyong SHEMBÜPA, nüngi nüngei moihimani nüng chongphobülei shemong den kü moihimanhen” shei phopei e.