Read Phom Naga 1 ONGPATHÜ 11 Bible Online

1 ONGPATHÜ 11 - Phom Naga bible

1 ONGPATHÜ 11

¹Solomoni lebü kungla longi lüm. Ijip ong Pharaohlei yiükha mü Moab, Ammon, Edom, Sidon hatü Hit am nyühathü longi lüm.

²Jomphongü SHEMBÜPAi Israel am kü, “Ammi jom mü yiükyah lashompü tenyu; mehenangkü jomi ammei mong jomei kahvangthü lemei leplanghen” shei epüthü shiüteke. Shejao Solomoni hathü küang longi lüm.

³Solomonei shembünyüthü kho nyet, hatü yiükphü kho jem nyu, hatü büpalei nyühathüi büpa lemnyongei mülang.

⁴Mechem Solomon viüei behe leidaipa, büpalei shembünyüthüi büpalei mong lebü kahvangthü lemei mülang, hatü büpalei mong chepa Davidi hinglempü kei SHEMBÜPA büpalei Kahvang kü hingnelem.

⁵Mehenangkü Solomoni Sidon amei nyüha kahvang Astartes hatü Ammon amei jiühitnalaipü Molekh kahvang kü khüm.

⁶Hanangkü Solomoni SHEMBÜPA touei mang thah, hatü chepa Davidi müpükei SHEMBÜPA pheikü nemü.

⁷Jerusalem heongphi kahshangei Solomoni jiühitnalaipü Moab amei Kemosh kahvang, hatü Ammon amei Molekh kahvang kü khümhen khümshing veteke.

⁸Büpai yahpü kungyiük peü kü jomi ayingshü jakei jomei kahvangthü kü moila shuohhen khümshing veteke.

⁹Büpa touei nyipa thahshi vamei hupü SHEMBÜPA Israel Kahvang toueipü mong lepei lüdaipü nangkü SHEMBÜPAi Solomon kü mongshih.

¹⁰Büpai Solomon kü lebü kahvangthü phei temü shei elangmao Solomoni SHEMBÜPAlei shah nebang.

¹¹Hanangkü SHEMBÜPAi Solomon kü, “Nüngi mongpükei deihtü nüngi ngei mü vangeishuwpü nedüki nüng kü ngei epü ngelei shahkungthü mangtükpü nangkü, ngei nüngei ongching nyi vaishi hantü nüngei chongphobü hük kü shuohtükhen.

¹²Shejoongpa, ampa Davidei men kü nüngei den kü payü ngei hapa nedükhen. Ngei anhalei lak leipü hantükhen.

¹³Shejao ngei büpalei ongching kemei payü nehantükhen, shejao ngelei chongphobü David hatü ngei jepü Jerusalem men kü jat hük shuohhen” shei e.

¹⁴Hapheikü SHEMBÜPAi Solomon khüei vepa hük Edom am ongsha ongshem kübü Hadad vamhü.

¹⁵Shelei mechem Davidi Edom am mü hokei neüpa, büpalei veshan mübü Joabi mahng vühen hatouei aongei nyushingkü büpai Edom am bahathü kemei jü.

¹⁶Joab hatü Israel am kemei hatouei lenyang vok thahshi Edom am bahathü peü mangjükem thahshi halei nyu.

¹⁷Shejao Hadad hatü chepalei chongphobü Edom am lakchongbüthü nyaiyei Ijiplei daiyei nyu. Hahepak kü Hadad-ü hashih mü nyuteke.

¹⁸Jom Midian leipü layaongei Paranei dai; jomi Paran leipü shennyakthü mütü Ijip ongpa Pharaoh touei peiyei nyu. Pharaoh-i büpa kü shem hük, kahdok hatü hahying shuoh.

¹⁹Pharaoh-i Hadad kü longi monghahpü nangkü büpai chenyühalei chenaü Tahpenes onglanyü Hadad mü shem yemhüteke.

²⁰Pinnyüi büpa kü yeshang hük büh, hatü hapa naü kü Genubath shei men; hapa naü-ü onglanyüthüi Pharaohlei shemei Pharaohlei chehathü mü longteke.

²¹Mechem Hadadi Ijiplei nyushi David hatü veshan mübü Joab didaitekeja shei danpa, Hadadi Pharaoh kü, “Ngelei kahdokei leinüng ngei layaongshah” shei e.

²²Pharaoh-i “Ammei kahdokei leihühen meyü hatouei nüng mepai taopa?” shei phe. Büpai, “Meheiyao taopü nevai, hei-üng leishah” shei e. Büpa jomei kahdokei lei. Büpa Edom amei nemeipü ong vaitü Israel am mü longi nemeipü vepa leiteke.

²³Kahvangi shao Solomon khüei lebü vepa hük Eliadalei cheha Rezon vamhü. Büpayü laophülei shembü Zobah am Hadadezer ongpa Davidi neütükpheikü büpa toueipü paüei daiyei,

²⁴shennyakthü thaitü shahkung venlepü khongkü mübü lei, hatü jomphong Damaskalei daiyei nyu, hatü büpalei nanglakthüi büpa ong vaihü.

²⁵Hadadi dükpü keiha Solomonei den kemei Rezonü Israel amei vepa lei. Büpa Aram kahdokei ong vai, hatü Israel am mü düngei vemang vaiteke.

²⁶Shao Solomon ongpa khüei yaongpü lebü shennyak hükü büpalei chongphobü khong kübü Nebatei cheha Jeroboam nyuteke. Büpayü Zeredah leipü Ephraim am nyuteke. Büpalei chenyü-ü vaümnyü hük meni Zeruah shei nyu.

²⁷Ongpa khüei vampü shojungü hapakei: Solomoni Jerusalem heongphi kü kahdok shaok, hatü chepa Davidei Chingnyü bham thapteke.

²⁸Jeroboamü dou aokpü nethe hük nyu, hatü mechem Solomoni büpa dou dükpü eepa, büpai büpa Joseph am phang dou dükbüthü shak kü dou veibü vaihü.

²⁹Mechem nyih hük Jeroboam Jerusalem leipü layaongei daijapa, büpai lemei Shiloh leipü Ahijah thibü owja owtü heüteke. Jijinyi monha phaüei nyu.

³⁰Ahijah-i büpalei owshi nyupü ow pha anpünyi vaishi shaak,

³¹hatü büpai Jeroboam kü, “Haleipü nüng shing pha an yahhahtuh; mehenangkü SHEMBÜPA, Israel Kahvangi enyüke, ‘Veituh, ngei Solomonei lak leipü ongching shaaktükhen, hatü jat an nüng kü shuohhen.

³²Shejao ngelei chongphobü David hatü Israel jatthü peü khong kübü ngei jepü Jerusalem Chingnyü men kü büpa kü jat hük mon shuohhen.

³³Jomi ngei tuhphongtü Sidon amei nyüha kahvang Astartes, Moab amei kahvang Kemosh, hatü Ammon amei Molekh kahvang kü khümei ngelei lemthü kü nekam, nevaijü ngei touei jiüpü nedük, nevaijü chepa Davidi dükpükei ngelei vanglem hatü shahkungnyüthü nedükpü nangkü ngei hapa dükshuohhen.

³⁴Shejoong ngei Solomonei lak leipü ongching kemei payü neyahlangpih; ngei jepü ngelei shahkung hatü vanglemthü bangpü ngelei chongphobü Davidei men kü ngei büpalei den kemei ong vaihühen,

³⁵shejao büpalei chehalei lak leipü hapa ongching yahlanghen, hatü nüng kü jat an shuohhen.

³⁶Ngelei men kü khümhen ngei jepü shing Jerusalem Chingnyü kü ngelei chongphobü Davidei hühihathüi vanglem lempü nedoh-i nyuhen shingvaishi ngei Solomonei cheha kü jat hük mon shuohhen.

³⁷Shejoong Jeroboam, ngei nüng yahhen, hatü nüngü Israel am shak kü ong vaihen, hatü nüngi napü peü shak kü nüngi vanglem lemhen.

³⁸Ngelei chongphobü Davidi dükpü keipü nüngi ngei epü peü dükjema, hatü ngelei lemthü kü kamjema, hatü ngelei shahkung hatü vanglemthü dükei ngei touei mehe jiü, ha dükjema, ngei düngei nüng mü nyuhen. Ngei David kü dükpükei ngei nüng kao den kü longsha ongshem leihühen, hatü ngei nüng kü Israel am shuohhen.

³⁹Hapa phuo kü ngei Davidei hühihathü hanghihühen, shejao denshing payü nevai’ ” shei e.

⁴⁰Hanangkü Solomoni Jeroboam jütükhen khe, shejao Jeroboami Ijip am Shishak ongpa touei laongei daiyei halei Solomon mangdi thahshi nyu.

⁴¹Solomoni dükpü lemphüli, büpai dükaokpü, hatü büpalei kihikon peü Solomonei Büshah Lai kü nyangei nyüpeih.

⁴²Solomoni Jerusalemei Israel am kemei kü vangbong pinyi thahshi vanglem lem.

⁴³Büpa di, hatü chepa Davidei Chingnyülei mahng vü, hatü cheha Rehoboami büpa kü jeiyei ong vaiteke.