Read Phom Naga 1 ONGPATHÜ 17 Bible Online

1 ONGPATHÜ 17 - Phom Naga bible

1 ONGPATHÜ 17

¹Shaang Gilead kahdok Tishbe leipü Tishbe am Elijah-i Ahab kü, “SHEMBÜPA, ngei chongphopü vanyangyem Israel Kahvangei men kü ngei lemhük kei mange thahshi bong shohük vang nevaijü nyien nevüküpih” shei e.

²SHEMBÜPAlei shah büpa touei peiyei,

³“Hatoueipü daituh, hatü heong philei nyokei leitü Jordan heongphi Kherith yungyenei joshi nyutuh.

⁴Nüngi yungyen leipü yung yingtuh, hatü nüng kü ashathüi halei hahying ühhen ngei ngeükhüam shuohtepih” shei e.

⁵Hanangkü SHEMBÜPAi epükei büpai dük. Büpai Jordan heong philei Kherith yungyenei daiyei halei nyu.

⁶Asathüi büpa kü aan, hatü phai dhom hi om kü leiyei shuoh, hatü büpai yungyen leipü yung yingei nyu.

⁷Kahdok kü lanshei vang nekeipü nangkü nyih maani angpheikü yungyenao jepdai.

⁸Hahepak kü SHEMBÜPAlei shah büpa touei peiyei,

⁹“Nüng shao Sidon kahdok Zarephathlei heih-ei nyutuh. Halei nyupü vaümnyü hüki nüng kü hahying ühhen ngei ngeükhüam shuohtepih” shei e.

¹⁰Hanangkü büpa Zarephathlei heih. Mechem büpai hapa jila penyüsha ngoijapa, vaümnyü hük hangha püshow thaihah-ei nyuteke. Büpai pinnyü kü nyüktü, “Ngei yingnüng dük kü yung maani shihtü deishih” shei e.

¹¹Pinnyüi hapa deijanüng heihjajü büpai pinnyü kü nyüktü, “Nüngei lak leipü aanao deikei” shei e.

¹²Shejao pinnyüi, “SHEMBÜPA, nüngei Kahvangei men kü enyeih, lingtükpü aan sheiyü neshiüpih; dük hükei atta aan lakpaoh hük mon, hatü shong hükei mainga maani mon nyüpeih. Hapeü henjinyi-i hapa aan lingei hahtü didaihen shei deihshi aan linghen pü yahnyüpeih” shei e.

¹³Elijah-i pinnyü kü, “Nüng mongteshang. Shemei leiyei nüngi epükei düktuh; shejao shongei ngei kü shong hapa aan maani yah-ei lingtü ngei kü yahshih; hapheikü mon anha anji shing linghahtuh.

¹⁴Mehenangkü SHEMBÜPA, Israel Kahvangi, ‘SHEMBÜPAi kahdok kü vang nyipabü mangkeihü thahshi hapa aandük kübü aan nekemhen, hatü hapa mainga shong kübü mainga nekemdaipih’ shei ephopeih” shei e.

¹⁵Elijah-i epükei hapa vaümnyüi leiyei dük. Hanangkü Elijah hatü vaümnyü hatü jomei shemong shingvaishi nyihjeih hahying changshi dang.

¹⁶Mehenangkü SHEMBÜPAlei shah Elijah thibü homei epükei hapa aandük leipü aan mechemao nekem, hatü mainga shong mechemao ne-üdai.

¹⁷Nyih maani daipheikü hapa shem shembü vaümnyülei cheha tüng. Büpa din wongpüba wongpüba heih-ei shomshi büpa di.

¹⁸Pinnyüi Elijah kü, “Oh Kahvang shennyak, nüngi ngei kü mehe kü khünya? Ngelei mang deih-ei danghühen, hatü ngelei hapeü jütükhen shei nüngü peiküpü je?” shei e.

¹⁹“Anha ngei touei deikei” shei Elijah-i jangei e. Büpai hapa naü pinnyülei shüngdok shangeipü yah-ei paümtü büpa paümteipü dung-am shangpalei anei büpalei lüngei lemhü.

²⁰Büpai SHEMBÜPA kü lenei, “Oh SHEMBÜPA ngelei Kahvang, ngei nyupü vaümnyü am kü dangkao cheha dihüei hapa keipü shanghah mehekei shuohnya?” shei e.

²¹Hatü büpai jempa thahshi hapa naü kü chetei lemtü SHEMBÜPA kü lenei, “Oh SHEMBÜPA ngelei Kahvang, hapa naü yem leihüshih” shei e.

²²SHEMBÜPAi Elijah-i lenpü dan, hatü hapa naü shao yem leihü.

²³Elijah-i hapa naü müei chenyü touei chongei shüh-ei pinnyü kü, “Veituh, anha yem leiteke” shei e.

²⁴Hanangkü hapa vaümnyüi Elijah kü, “Nüngü Kahvang shennyak khih, hatü nüngei ju kübü SHEMBÜPAlei shah-ü shahhing khih shei shaang nyingteke” shei e.