Read Phom Naga 1 ONGPATHÜ 21 Bible Online

1 ONGPATHÜ 21 - Phom Naga bible

1 ONGPATHÜ 21

¹Hepak maani daipheikü ha vam: Jezreel kahdokei Jezreel am Naboth shei menpü shennyakei nyalingngupai kah hük Samaria amei ongpa Ahabei ongshem yopailei nyuteke.

²Nyih hük Ahabi Naboth kü, “Ngelei shem yopailei nyupü nangkü ngei haohilai sheihahnüng nüngei nyalingngupai kah ngei kü yahshih; hapa kü jeiyei lebü meipü nyalingngupai kah yahphüshah, nevaijü nüngi najema hapa kü shangpükei lop yahphüshah” shei e.

³Shejao Naboth-i Ahab kü, “Obülei mükjüp nüng kü shuohtükhenü SHEMBÜPAi nemongnyih” shei e.

⁴Jezreel am Naboth-i, “Obülei mükjüp nüng kü neshuohpih” shei büpa kü eshuohpü nangkü longi mongmangei, hatü mongshih-ei shemei leiteke. Büpai lüngei dhe shouk lemei meetü hah-ao nehah-i lemshi nyu.

⁵Chenyüha Jezebel peiyei, “Nüngi nehahneyingi nyuhen mü mehe kü mongshangpa?” shei phe.

⁶Büpai pinnyü kü, “Ngei Jezreel am Naboth kü, ‘Nüngei nyalingngupai kah ngei kü yahshih; nevaijü nüngi najema hapa kü jeiyei lebü nyalingngupai kah yahphüshah’ shei eshuohpeih, shejao büpai, ‘Ngelei nyalingngupai kah nüng kü neshuohpih’ shei ephopeih” shei e.

⁷Chenyüha Jezebeli büpa kü, “Israel kü ong hih shei hapakei nyunyu je? Paoei hahtuh hatü mongongtuh.Jezreel am Naboth-ei nyalingngupai kah ngei nüng kü shuohhen” shei e.

⁸Hanangkü pinnyüi Ahab ongpalei men kü lai nyangtü hapa kü büpalei füoshang shingtü chingnyülei Naboth mü nyupü behethü hatü chinglong chingvangthü kü shomteke.

⁹Pinnyüi hapa laithü kü hapakei nyangteke: “Nyih hük peüi shüaeiyungleyei themhen baongtuh, hatü Naboth deiyei thaipü khongkü shongnyü uoshingei uohütuh.

¹⁰Büpai Kahvang hatü ongpa nyi kü eelapeih shei büpalei dhe kü nyeanshi thaüvaühen shingvaishi neveü gühshe shapü shennyak nyi büpalei dhe kü khangshi uohütuh. Hapheikü büpa chingmong leipü haolei müei daiyei yaongi shükei jütuh” shei e.

¹¹Hanangkü chingnyülei nyupü behethü hatü chinglong chingvangi jom kü Jezebeli shomshuohpü lai kü nyangpükei dükteke.

¹²Jomphongi shüaeiyunglehen nyih hük chüng, hatü Naboth deiyei thaipü khongkü shongnyü uoshingei uohü.

¹³Hahepak kü neveü gühshe shapü shennyak nyi büpa mü khangteiyei uohütü nanglakthü tou kü Naboth kü thaüvaüei, “Naboth-i Kahvang hatü ongpa nyiphen kü eelateke” shei e. Hanangkü jomphongi chingnyü haolei büpa deiyei yaongi shükei jütük.

¹⁴Hapheikü jomi Jezebel kü, “Naboth-ü yaongi shükei jütüktih” shei shah shom.

¹⁵Naboth-ü yaongi shükei jütükteke shei danhinüng Jezebeli Ahab kü, “Jezreel am Naboth-i nüng kü neyuphapih shei epü nyalingngupai kah-ü heih-ei yahtuh; mehenangkü Naboth-ü yemmü nenyu; didaitekeja” shei e.

¹⁶Naboth didaitekeja shei danhinüng Jezreel am Naboth-ei nyalingngupai kah yahhen shingvaishi Ahab layaongei yiüteke.

¹⁷Hahepak kü SHEMBÜPAlei shah Tishbe am Elijah thibü touei peiyei,

¹⁸Samaria leipü Israel ongpa Ahab touei yiütuh; büpayü shaang Naboth-ei nyalingngupai yahhen shingvaishi yiüei nyüke.

¹⁹Nüngi büpa kü SHEMBÜPAi hapakei enyüke shei etuh: “Nüngi shennyakao jü, hatü büpalei mükjüpao yahnyu je?” SHEMBÜPAi hapakei enyüke: “Shi-i Naboth-ei iy laipü shingei-üng nüngei iyao laihen” etuh shei eteke.

²⁰Ahabi Elijah eeyei büpai, “Oh ngelei vepa, nüngi ngei eepü je?” shei e. Elijah-i jangei, “Hih, ngei nüng eetepih. Mehenangkü nüng nyingi SHEMBÜPA touei mehe mang ha dükhen yutükpü nangkü,

²¹SHEMBÜPAi hei enyüke: Nüng kü shanghah koei peikahen. Ngei nüngei hühiha li hümtükhen, hatü Ahab mü pangei aa vaituh, bümei vaituh, baha peü mahtükhen.

²²Ngei nüngei shemong Nebatei cheha Jeroboam, hatü Abijahlei cheha Baasha am shem kei leihühen; mehenangkü nüngi ngei mongshihhü, hatü Israel am mang thahhüteke.

²³Hatü Jezebel nangkü SHEMBÜPAi hapakei enyüke: ‘Shi-i Jezebelei mahng Jezreel chingnyülei hahtükhen.

²⁴Ahab am shem chingnyü mongei dipü peü shi-i hahhen, hatü chingnyü haolei phaühihaolei dipü peü asha alang phai vaihen’ ” shei e.

²⁵(Laophülei nyüha Jezebeli nyeanpü kü SHEMBÜPA touei chemjalak kü mang dükhen Ahabi phenei shuohpü keiha üpayao nenyu.

²⁶Israel am shekü SHEMBÜPAi changtükpü Amor ami keiha lajei kü khümei büpai longi jiühitnalai mang dükteke.)

²⁷Mechem Ahabi hathü shah danpa, büpai laophülei ashak shaaktüktü bümbai dhoila ashak ümtü shüaeiyungleteke. Büpai dhoila ashak ümtü shi, hatü mongshangei dhe yimdaitü nyu.

²⁸Hapheikü SHEMBÜPAlei shah Tishbe am Elijah thibü touei pei:

²⁹“Mekei Ahabi ngei touei maanpü leipa, ha nüngi nyingla? Büpai ngei touei maanpü leipü nangkü büpalei den kü ngei hapa shanghah neshuohpih, shejao ngei ha shanghah chehathülei shemong kü shuohhen” shei e.