Read Phom Naga 1 ONGPATHÜ 4 Bible Online

1 ONGPATHÜ 4 - Phom Naga bible

1 ONGPATHÜ 4

¹Solomon ongpai Israel am peü shak kü vanglem lem,

²hatü hathüyü büpalei lakchongbüthü nyuteke: Zadokei cheha Azariah-ü ngongpa;

³Shishalei cheha Ehihoreph hatü Ahijah nyi-ü laknyangbü; Ahiludei cheha Jehoshaphat-ü nyangbü;

⁴Jehoiadalei cheha Benaiah-ü veshan mübü shopü; Zadok hi Abiathar nyiyü ngongpa;

⁵Nathanei cheha Azariah-ü lakchongbüthü peü shak kü shembü; Nathanei cheha Zabud-ü ngongpa hatü ongpa kü shahnying ebü;

⁶Ahishar-ü ongshem veibü; Abdalei cheha Adoniramü dou dükbüthü kü nang hienbü nyuteke.

⁷Solomoni Israel kempülei district anpünyi kü governorthü je, hatü jomi ongpa hatü ongpalei shem am kü hahying shomhamteke. Pa hüki bong kü lenyang hük shing hahying shomhamteke.

⁸Jomphongei menü hathü: Ephraim phaüshang kahmük kü Benhur;

⁹Makaz, Shaalbim, Beth-Shemesh hatü Elon Beth-Hanan kü Ben-Deker;

¹⁰Arubboth (Sokoh hatü Hepherlei kahdok kemei) kü Ben-Hesed;

¹¹Dor kü Ben-Abinadab (büpai Solomonei yiükha Taphath mü shem yem);

¹²Taanakh hatü Megiddo, hatü Jezreel maai kü nyupü Zarethan phikü Beth-Shean kemei, Beth-Shean kübü Jokneam homei Abel-Meholah thahshi kü Ahiludei cheha Baana;

¹³Ramoth Gilead (Gilead kü Manassehlei hapeüthü Jair am nyupü chingthü, hatü Bashan kübü Argob district, hatü haleipü penyü showtükpü, hatü melangnyiam peshem haongpü chingnyü pejempüvok kemei) kü Ben-Geber;

¹⁴Mahanaimei Iddolei cheha Ahinadab;

¹⁵Naphtali kü Ahimaaz (büpai Solomonei yiükha Basemath mü shem yem);

¹⁶Asher hatü Aloth kü Hushailei cheha Baana;

¹⁷Issakhar kü Peruahlei cheha Jehoshaphat;

¹⁸Benjamin kü Elalei cheha Shimei;

¹⁹Gilead kü (Amor amei ongpa Sihon, hatü Bashan amei ongpa Og) Urilei cheha Geber nyu. Hapa district kü governor büpa mon nyu.

²⁰Judah hatü Israel nanglakthüyü yungching bhihhiphang kei nyu; jomi hahtü yingtü mongongshi nyu.

²¹Solomoni Euphrates yungyen kübü Philistia kahdok hatü Ijip amei viong thahshi kü nyupü ongchingthü kü vanglem lem. Hapa jatthüi büpa kü bom shuoh, hatü jomphongü büpalei den kemei kü büpalei nanglakthü leiteke.

²²Nyih hük kü Solomonei hahyingü atta kow hapüan hatü nük kow pejem,

²³khaokei haümpü mohoh chebaong an, phenha hah-ei longteipü mohoh kukha, mi kho hük, hathü mü lenei shaok, meishiy, hatü nitshüpü oupong shei nyuteke.

²⁴Mehenangkü büpai Euphrates apshaphi Tiphsah kübü Gaza thahshi, Euphrates apshaphi kü nyupü ongthü peü shak kü büpai vanglem lem; hatü nyonghidah peü philei chingmeivangmei nyu.

²⁵Solomonei den kemei kü Judah hatü Israel am kemei Dan kübü Beer-sheba thahshi peüi lakbowlayangei laophü laophülei nyalingngupai hatü adhapüthü phangkü nyu.

²⁶Solomoni büpalei koyei khari shingvaishi koyei tuhhen hatü koyei veshanthü shingvaishi koyei haja anpünyi tuhhen khaok haja pinyi nyuteke.

²⁷Hathü lakchongbüthüi Solomon ongpa hatü büpalei nükdülei peipüthü shingvaishi laophü laophü kü benpü len kü mepa hahyingao ne-ami shouh.

²⁸Jomphongi epü shing ngoiyei barley hah hatü hahtang, koyei khari, koyeithü hatü lebü koyeithü shingvaishi shuoh.

²⁹Kahvangi Solomon kü kihikon hatü yao-aokpü kon, hatü neshetnephenaokpü yungching bahiyang kei danaokpü kon shuoh.

³⁰Hanangkü Solomonei kihikonü Heong kahdok kübü shennyakthü hatü Ijip am nahpülangpüthülei kihikon mao nahpüba nyuteke.

³¹Büpa shennyakthü peü mü nahpüba nyu: Ezrah am Ethan, hatü Maholei chehathü Heman, Kalkol hatü Darda mao nahpüba nyu, hatü büpalei men ngeihpü shonpü jatthü peü touei baongeiyaüei etei.

³²Büpai kandok shah haja jem, hatü kesho haja hük mü nga thahshi ling.

³³Büpai püthü jung, Lebanon leipü cedar pü kübü bhambalei vampü hyssop thahshi e. Büpai yemhimakthü, ouhiyühthü nyahhinyiu jung thahshi e.

³⁴Solomonei kihikon jung danpü jatthü peü kübü ongthüi büpalei kihikon shah kü banghen shingvaishi shennyakthü shom.