Read Phom Naga 1 ONGPATHÜ 5 Bible Online

1 ONGPATHÜ 5 - Phom Naga bible

1 ONGPATHÜ 5

¹Mechem chepa David kü jeiyei ong vaihen cheha Solomon jeteke shei Tyre ongpa Hirami danpa, büpai laophülei chongphobüthü Solomon touei shom; mehenangkü büpa düngei David mü mongjem pongei nyu.

²Solomoni Hiram kü hapa shah shom:

³“SHEMBÜPAi vepathü peü shak kü aokpü mangshuoh thahshi opai jatthü peü mü vehok hokei nyupü nangkü büpai SHEMBÜPA büpalei Kahvang men kü Phopshem neveaokpü nüngi nyingei nyüke.

⁴Shejao shaang SHEMBÜPA ngelei Kahvangi peü phikü chingmeivangmei shuoh, hatü meleiyao ponghokvanshengpü hatü shanghah vongshüh neshiü.

⁵SHEMBÜPAi ngelei opa David kü, ‘Anha, üpai nüngei ong uoshing kü jeiyei uohen, büpai ngelei men kü Phopshem hük vehen shei epükei, ngei SHEMBÜPA ngelei Kahvangei men kü Phopshem hük vehen shei deihnyüke.

⁶Hanangkü ngelei men kü Lebanon leipü cedar püthü aghen ngeükhüam shuohkütuh. Ngelei nanglakthü aongei nüngei nanglakthü mü dou dükhen, hatü nüngei nanglakthü shing lat mekei nüngi itkahen hapakei ngei shuohhen. Mehenangkü nüngei nanglak Sidon ami manpükei pü aghen ngelei nanglakthüi nemanpü nüngi nyingdaiphei’ ” shei e.

⁷Mechem Hirami Solomonei shah danpa, büpa longi mongmei, “Shinnyih SHEMBÜPAlei men longtuh; mehenangkü büpai hapa longpü jat shak kü vanglem lemhen kon kohpü hapeü hük David kü shuohteke” shei e.

⁸Hirami Solomon kü, “Nüngi ngei kü shompü shah ngei ngoikütepih hatü nüngi napükei cedar hatü awkaongpü shuohhen.

⁹Ngelei nanglakthüi hathü agei Lebanon leipü yungching thahshi shanphahen; hatü nüngi epü shing ngoishi shepei shatü yung kü bhongei shanphahen. Hatouei ngei hathü leiphahen hatü nüngi shetei leihahtuh. Nüngi ngelei ongshem hatü nanglakthü kü hahying yahshih” shei e.

¹⁰Hapa keiha Hirami Solomon kü büpai napükei cedarpü hatü awkaongpüthü shuoh.

¹¹Ha nangjei Solomoni Hiram kü wheat hah ton haja nyi, hatü daülangpü olive mainga dok haja kho ali bong ieyei büpalei shem am hatü nanglakthü shing shuoh.

¹²Büpai lahpükei SHEMBÜPAi Solomon kü kihikon shuoh. Hiram hi Solomon nyi aa kü chingmeivangmei nyu, hatü jijinyi-i chingmei nyuhen vangtei.

¹³Solomon ongpai Israel peü kübü dou dükhen nanglak haja hapüan thahshi men nyang.

¹⁴Büpai jomphong shennyak haja an khong jem vaishi hantü Lebanonlei anshih; khong ieyei lenyang hük nyutü lenyang nyi shemei leiyei nyu. Hapa dousho kü Adonirami shembü vaiteke.

¹⁵Solomonei yaong bhaokhen shennyak haja büali hatü shethen shennyak haja pejempüan nyu;

¹⁶hatü büpai hapa dousho hatü dou dükpüthü kü veihen shennyak haja jem mü kho jem tuh.

¹⁷Ongpai epü nangkü jomphongi meipü yaongtaothü kemei Phopshem kü chongnyiam linghen koei lei.

¹⁸Solomon hatü Hiram nyilei mistrithü hatü Gebal ami Phopshem vehen yaong bhaokei pü vetei temteke.