Read Phom Naga 1 ONGPATHÜ 6 Bible Online

1 ONGPATHÜ 6 - Phom Naga bible

1 ONGPATHÜ 6

¹Israel am Ijip kahdok leipü vamei daipü vangbong kho ali mü büalipabü kü Solomoni Israel kü ong vaipü bong ali mü lenyang nyipabü Ziv len kü büpai SHEMBÜPAlei Phopshem vehen chongpang.

²Solomon ongpai SHEMBÜPA kü vepü Phopshemü yangkü meter 27, ba kü meter 9, hatü shaopü kü meter 13.5 shiüteke.

³Phopshem mongei shüpü shongnyü shaden chingshe kü shemshom hük ba kü meter 9 hatü chüpü kü meter 4.5 veteke; ba kü daülangpü shing hük kohshi ve.

⁴Büpai Phopshem kü ümha shadenthü chingdaü lemei sha maanshi ling.

⁵Büpai chingshephi bham hatü daülangpü shing mongphi shinei bham kü nyeanei dungnuk jaan jem baong kohshi veteke.

⁶Maaipa dungnuk kü ba kü meter 2.2, jiampa dungnuk kü meter 2.7, hatü jempabü dungnuk kü meter 3.1 lingteke. Dungnuk kemei pübhang neshihjao bhami hongaokhen shingvaishi maaipa dungnuk kübü bham meyü dokpa leipü dungnuk kübü bham-üng baüpüba lingteke.

⁷Phopshem veshingkü yaong bhaokshingei shangtükpü yaong mon yah, hatü kaoklak peikha nevaijü lebü hadir yah-ei yaong bappü ngeü nedanhü.

⁸Peü mü maaipa dungnukei shühen lemü apshaphi lemei ling; lem hük thai lingei anei jiampa dungnuk thahshi ling hatü hatoueipü jempabü dungnuk thahshi anteke.

⁹Hanangkü hapakei büpai Phopshem veyei tem; büpai cedarpü vetei taukta hatü yithiyü shih-ei adok küpteke.

¹⁰Büpai Phopshem chingshephi yang kemei kü dungnuk ling; dungnuk ieyei kü meter 2.2 baong ling, hatü hapayü cedar pülu yah-ei Phopshem kü khaaiyei ling.

¹¹SHEMBÜPAlei shah Solomon touei peiyei,

¹²“Nüngi vepü hapa Phopshem nang keyü nüngi ngelei shahkungthü kü müjema ngei epü hatü kangpüthü peü bangei dükjema, ngei ampa David kü lahpüthü peü nüng homei jiühühen.

¹³Ngei Israel nanglakthü mü nyuhen, hatü ngei jomphong netuhphongpih” shei e.

¹⁴Hanangkü Solomoni Phopshem veyei temteke.

¹⁵Büpai Phopshem mongphi bham kü aangshung kübü shinshang thahshi cedarpü taukta-i jüm, hatü aangshung kü awkaongpü taukta-i apteke.

¹⁶Phopshem shong philei meter 9 lushi aangshung kübü shinshang thahshi cedarpü taukta yah-ei Longi Daülangpü Shing vaihen shaungteke.

¹⁷Longi Daülangpü Shing shekü dungnuk hük meter 18 lushi ling.

¹⁸Phopshem mongphi bham kü cedarpü taukta-i jüm, hatü hapa kü betjük hatü chübong maei bak. Cedarpü taukta-i mon jümtükpü nangkü yaong ne-ee.

¹⁹SHEMBÜPAlei Vangpüshuwpü Pela tuhhen shingvaishi Phopshem mongpalei daülangpü shing hük ling.

²⁰Hapa daülangpü shingü yangkü meter 9, ba kü meter 9, hatü shaopü kü meter 9 shiüteke. Büpai hapa kü daülangpü honi jüm. Büpai moidüao cedarpüi mon jümteke.

²¹Solomoni Phopshem mong phikü daülangpü honi jüm, hatü büpai hon vüi Daülangpü Shing shesha philei kangei shen, hatü hapa kü honi shaokteke.

²²Hanangkü büpai shem mong kemei kü meiden dohei meihen shingvaishi honi jüm, hatü Daülangpü Shing mongei nyupü moidü kao honi jüm.

²³Büpai Daülangpü Shing mongei olive pü yah-ei cherubim nyi meter 4.4 baong shaoshi ling.

²⁴Shongpü cherub hükei yang kü meter 2.2 lushi, hatü hükpalei yang kao meter 2.2 lushi ling. Hanangkü yangjaang hük kübü hükpa yangjaang thahshi meter 4.4 lushi shiüteke.

²⁵Hükpa cherubao meter 4.4 lushi shiüteke; mehenangkü cherubim nyiphen bahiyang hatü deiaei aihük mü shiüteke.

²⁶Cherub ieyei meter 4.4 lushi shiüteke.

²⁷Büpai cherubim nyiphen Phopshem mongpalei Longi Daülangpü Shingei tuh; cherubim nyiphenei yang paanei yang hük baongi bham kü hongshi, hatü yang hük baongi Phopshem jiam philei meeshi yang hüki hük kü hongteishi tuh.

²⁸Büpai cherubim kao honi shaokei ling.

²⁹Phopshem bham kü dungnuk shakhimong peü kü cherubim, palm pü hatü chübongthü bakei ling.

³⁰Büpai Phopshem dungnukthü shakhimong kemei kü aangshungü honi mon jümei ling.

³¹Büpai Longi Daülangpü Shingei shühen shaden kü olive pü yah-ei sha bhaok nyi kohshi ling; shaden sho phiyü daüpei aongtü ling.

³²Shadenthü kemei kü cherubim, palmpüthü hatü chübongthü bakei ling, hatü cherubim hatü palmpüthü kü honi jüm.

³³Peü mü longpü dungnukei shüpü shaden kü mük ali kohshi ling.

³⁴Büpai awkaongpü yah-ei apei leihen shabhaok kohshi ling.

³⁵Büpai hapa kü cherubim, palmpüthü hatü chübong bakei ling, hatü ha kü honi jümei lingteke.

³⁶Büpai Phopshem chingshe pekonei chingsheba bhamtüng kü dhühshi ling, hatü cedar pü laap hük kü shükei lingpü yaong laap jem dheanei ling.

³⁷SHEMBÜPAlei Phopshemü bong alipabü Ziv len kü chongnyiam yaong haüei pang.

³⁸Bong anpühükpabü kü lenyang shetpabü Bul len kü shihhen shei tempü kemei shih-ei veyei tem. Büpai hapa vepü kü bong nyet tük.