Read Phom Naga 1 ONGPATHÜ 9 Bible Online

1 ONGPATHÜ 9 - Phom Naga bible

1 ONGPATHÜ 9

¹Mechem Solomoni SHEMBÜPAlei Phopshem hatü ongshem veyei tempa, hatü büpai dükhen shei kenei deihpü douthü dükei tempa,

²SHEMBÜPAi Gibeonei vampükei nyipabü büpa touei vamei huteke.

³SHEMBÜPAi büpa kü, “Nüngi ngei kü phoppü hatü phepü ngei dantepih; düngei ngelei men kü khümhen shingvaishi nüngi vepü Phopshem ngei daütüktepih. Ngelei mükhimong düngei halei nyuhen.

⁴Nüng nang keyü nüngi-üng ngei touei mongdang kangshangi ampa Davidi kei kamjema, hatü ngei kangpü peü dükei hatü ngelei shahkungnyüthü hatü vanglemthü dükjema,

⁵ngei ampa David kü, ‘Israel ong uoshing kü uohen nüng shennyak taoei nenyupih’ shei lahpükei, nüngei ong uoshing Israel shak kü düngei tuhhen” shei e.

⁶Shejao nüng nevaijü nüngei hühihathüi ngei toueipü yanei lüdaijema, hatü ngei am kü shuohpü shahkungnyü hatü vanglemthü kü nekami daiyei lebü kahvangthü chongphoei hathü kü khümjema,

⁷ngei Israel nanglakthü kü shuohpü kahdok kübü jom changtükhen, hatü ngelei men kü khümhen shingvaishi ngei daütükpü hapa Phopshem ngei yaktükhen. Hahepak keyü mih jathili touei mihnyipü leihen, hatü peüi yaüeilungei ehen.

⁸Hapa Phopshemü nyüphinya yakshing kei leihen, hatü peihpü leihpü peüi yashanei naamnyi nyiyei, “SHEMBÜPAi hapa kahdok hatü hapa Phopshem kü mehekei hapakei dükshuohpa yo?” shei ehen.

⁹Shennyakthüi jangei, “Mehenangkü jomi SHEMBÜPA jomei Kahvang, üpai jomei chebü chepa Ijip leipü müei leipa, ha yakphongtü lebü kahvangthü kü shongtü hapa kü khümei chongphopü nangkü SHEMBÜPAi jom kü hapa shanghah vongshüh yahshuohpü khih” shei ehen.

¹⁰Solomoni Phopshem hatü ongshem nyiphen vangbong kukha lompü mü tem.

¹¹Solomon ongpai Galil kübü jila kukha Tyre ongpa Hiram kü shuoh; mehenangkü Hirami Solomon kü cedarpü, awkaongpü hatü hon büpai napükei shuoh.

¹²Shejao mechem Solomoni shuohpü jilathü kü veihen Hirami Tyre leipü heih-ei veipa, büpai hathü kü mongnehah.

¹³Hanangkü büpai, “Menüng keipü jilathü nüngi ngei kü yahphopa oh jeihinaü?” shei phe. Hanangkü jomi hapa kü shinnyih thahshi Kabul kahdok shei nyüknyüke.

¹⁴Hirami Solomon ongpa kü hon dok haja ali shomteke.

¹⁵Hapayü Solomoni SHEMBÜPAlei Phopshem hatü ongshem vehen, hatü kahdok shaokei Millo hatü Jerusalem bham, Hazor, Megiddo hatü Gezer linghen shingvaishi ngaüngei dou dükhüpü jung nyüke.

¹⁶(Ijip ongpa Pharaoh-i Gezer hahtü omei yahlang. Büpai hapa ching kü awi haptük, hatü haleipü Kanan am jütük. Büpai hapayü Solomon kü doi deishihpü büpalei yiükha kü müü vaishi shuoh,

¹⁷hatü Solomoni hapa Gezer ja lingei lei) Solomoni Maaipa Beth-Horon,

¹⁸Baalah, hatü Judah phaü leipü Tamar,

¹⁹hatü büpai hahying tuhpü chingnyüthü, hatü koyei kharithü, hatü koyeithü tuhhen jilathü, hatü Jerusalem, Lebanon hatü büpai vanglem lempü kahmük peü kü büpai mehe mehe linghü, hathü kemei lingteke.

²⁰Israel nanglak nevaipü Israel ami nejütüki tuhpü Amor, Hit, Perizz, Hiv, hatü Jebus am nanglakthü peü

²¹jomei hühihathü shinnyih thahshi hapa kahdokei nyupüthü Solomoni aa vaishi ngaüngei dou dükhüteke.

²²Shejao Solomoni Israel am hükao aa neleihü; jomphongü veshan, büpalei ongching kü lakchongbüthü, veshan mübüthü, koyei khari kü hokpü veshanthü kü mübü leihü.

²³Solomoni shem vepü kü dou dükbüthü kü dou kü veihen lakchongbüthü jom 550 nyuteke.

²⁴Shejao Pharaoh-ei yiükha-i David Chingnyü leipü aongei Solomoni pinnyü kü veshuohpü ongshemei nyu; büpai hapheikü Millo lingteke.

²⁵Solomoni bong kü jempa büpai SHEMBÜPA kü vepü moidülei jakpü moila, hatü mongjempü moila mü SHEMBÜPA kü ayingshü jakei shuoh. Hapa keiha büpai Phopshem veyei temteke.

²⁶Solomon ongpai Ezion Geberlei Edom kahdok Elath yopailei Hakla Yungching yungkungei jahas ling.

²⁷Hirami büpalei shennyakthü, yung kü manpü jahas yüpbüthü Solomonei shennyakthü mü dou dükhen shom.

²⁸Jomi Ophirlei heih-ei hon dok haja anpüali koei leiyei Solomon kü shuoh.