Read Phom Naga 2 ONGPATHÜ 1 Bible Online

2 ONGPATHÜ 1 - Phom Naga bible

2 ONGPATHÜ 1

¹Ahab ongpa dipheikü Moab ami Israel am khüei yaong.

²Shaang Israel ongpa Ahaziah büpalei Samaria ongshem adok shangeipü vüei ma yahteke. Hanangkü büpai phongmokbüthü kü, “Daituh, hatü Ekron amei kahvang Baal-Zebub kü ngei mei-üla khih shei phetuh” shei e.

³Shejao SHEMBÜPAlei phongshan homei Tishbe am Elijah kü, “Aongtuh, hatü Samaria leipü Ahaziah-i shompü phongmokbüthü mü pongei, ‘Israel Kahvang neshiüpü vaishi Ekron amei kahvang Baal-Zebub kü phehen aongnyu je’? shei phetuh.

⁴Hanangkü SHEMBÜPAi, ‘Nüng shaang lemshi nyupü lüng leipü nepao-i nüng dihen’ shei enyüke” shei e.

⁵Mechem phongmokbüthü ongpa touei leijapa, büpai jomphong kü, “Amphong mekei leiküpa?” shei phe.

⁶Jomi büpa kü, “Shennyak hük ham mü pongteinüng peiküpeih, hatü büpai hamphong kü, ‘Amphong deishihpü ongpa touei nyokei leituh, hatü büpa kü, Israel Kahvang neshiüpü vaishi Ekron amei kahvang kü phehen shompü je? Hanangkü nüng shaang lemshi nyupü lüng kübü nepao-i nüng dihen SHEMBÜPAi enyüke’ shei ephopeih” shei eteke.

⁷Ongpai jomphong kü, “Amphong mü pongteinüng peiyei hapa ephopü shennyakü veiheni mekei khih?” shei phe.

⁸Jomi büpa kü, “Büpayü sho lushi, yemhalei shuwi ow lingei owtü, hatü phaishuw shüngshep shepshi nyuküpeih” shei e. Büpai, “Hapayü Tishbi am Elijah khih” shei e.

⁹Hahepak kü ongpai Elijah touei veshan pinyipüan shak kü mübü hük mü veshan pinyipüan shom. Shangching hükei uoshi nyupü Elijah touei büpa aongei büpa kü, “Oh Kahvang shennyak, chem leikütuh shei ongpai enyüke” shei e.

¹⁰Elijah-i jangei, “Ngeiyü Kahvang shennyak hük vaijema, vangsho leipü aw yiüei nüng hatü nüngei veshanthü nyemhahtük!” shei e. Hahepak kü vangsho leipü aw yiüei veshan mübü hatü veshanthü hahtük.

¹¹Shao ongpai büpa touei veshan pinyipüan shak kü mübü hük mü veshanthü pinyipüan shom. Jom aongei Elijah kü, “Oh Kahvang shennyak, ongpai nüng kü lomi leikei shei ngeükhüam shuohpü khih!” shei e.

¹²Shejao Elijah-i jangei, “Ngei Kahvang shennyak hük vaijema, vangsho leipü aw yiüei nüng hatü nüngei veshanthü nyemhahtük!” shei e. Hahepak kü vangsho leipü Kahvang aw yiüei büpa hatü büpalei veshanthü hahtük.

¹³Hanangkü ongpai jempabü veshan mübü, hatü büpalei veshan jom pinyipüan shom. Jempabü veshan mübüi aongei Elijah touei aümei shatü, “Oh Kahvang shennyak, chingmeilemlingei ngei hatü nüngei chongphobü jom pinyipüanei yangnyu kü phahjishih.

¹⁴Veituh, shelei anshihpü veshan mübü nyi, hatü jiji mü anshihpü veshanthü peü vangsho leipü aw yiüei hahtükteke, shejao nüngi ngei kü phahjishih!” shei khümei e.

¹⁵Hahepak kü SHEMBÜPAlei phongshani Elijah kü, “Büpa mü leituh, nüngi büpa kü tenyem” shei e. Hanangkü Elijah-i layaongei büpa mü ongpa touei lei,

¹⁶hatü büpai ongpa kü, “SHEMBÜPAi hapakei enyüke: Israelei Kahvang neshiüpü vaishi nüngi Ekron amei Baal-Zebub kahvang touei phongmokbüthü shomei phepü je? Nüngi hapakei dükpü nangkü nüngi shaang lemshi nyupü lüng kübü nepao-i nüng dihen!” shei e.

¹⁷Hanangkü SHEMBÜPAi Elijah kü epü keiha büpa di. Ahaziahlei hapeü neshiüpü nangkü Judah kü Jehoshaphat ong vaipü bong nyipabü kü chenaü Jehorami büpa jeiyei ong vai.

¹⁸Hanangkü Ahaziah-i vanglem lemshi büpai dükpü douthü peü Israel Ongthülei Büshah Laitap kü nyangei nyüpeih.