Read Phom Naga 2 ONGPATHÜ 10 Bible Online

2 ONGPATHÜ 10 - Phom Naga bible

2 ONGPATHÜ 10

¹Shaang Ahabei chehathü jom pejempüan thahshi Samarialei nyu. Hanangkü Jehu-i lai nyangtü Jezreel leipü lakchongbüthü, behethü hatü Ahabei chehathü yombüthü kü Samarialei shomteke.

²Büpai nyangpülei, “Ammi laithü danghinüng, ammei shembülei hapeüthü am mü nyupai, hatü ammei lakei koyei hatü koyei kharithü, chingnyü pe showtüktü, hatü lahhilaong nyupai,

³ammei shembülei hapeüthü khongkü peü mü meipü, hatü changpü hük jetü chepalei ong uoshing kü uohütuh, hatü jom shem yangei nyuhen shangmü hokhütuh” shei e.

⁴Shejao Samaria ami nyemei, “Joram ongpa hi Ahaziah ongpa nyi dangkao neaokjü hami mekei etü Jehu aokhen?” shei e.

⁵Hanangkü ongshem veipü lakchongbüthü, chingnyü veipü governor, behethü hatü yombüthüi Jehu kü hapakei shahjang shom: “Hamphongü nüng chongphopüthü, hatü nüngi mehe e, ha dükhen. Hami ong vaihen üpayao nejepih; nüng kü mehe meipeih shei deih, hapakei düktuh” shei e.

⁶Hapheikü Jehu-i nyipabü jom kü lai nyangpülei, “Am ngei mü nyujema, hatü ngelei shah banghen vaijema, ngenyih hapa hepak kü Jezreelei ammei shembülei hapeüthülei shangjing dakei ngei touei peikei” shei e. Shaang ongpalei hapeüthü jom pejempüan thahshi chingnyülei mübüthü mü nyu; mehenangkü hathüyü jomi jungei laonghahpüthü nyuteke.

⁷Mechem jom touei lai ngoijapa, jomi ongpalei hapeüthü müei deiyei jom pejempüan kemei jü. Jomi hathülei shangjing mühdow kü shihtü Jezreelei Jehu touei shom.

⁸Mechem phongmokbü Jehu ngoipa, büpai Jehu kü, “Hami ongpalei hapeüthülei shangjing deiküpeih” shei e. Hahepak kü Jehu-i, “Hathü kemei nepnüng dhom thahshi chingnyü penyüshalei khong nyi khongei haütuh” shei e.

⁹Nepphei Jehu-i penyü shadenei vamei nanglakthü touei yaongtü, “Ngelei shembü khüei yaongpü, hatü büpa jütükpeyü ngei hih; hapayü am mang nevaipih. Shejao hathü üpai jüpa?

¹⁰SHEMBÜPAi Ahab am shem khüei epü shah phahükao neshaiküpih shei nyinghahtuh. SHEMBÜPAi laophülei chongphobü Elijah homei mehe e, ha dükpü khih” shei e.

¹¹Hanangkü Jehu-i Jezreelei Ahab am shem aopü kemei, büpalei lakchongbüthü, büpalei mongjempathü, hatü ngongpathü hükao ne-aophongi jütükkem.

¹²Hapheikü Jehu-i layaongei Samaria lemei dai. “Mi yombüthülei baümtap” shei epü shingei,

¹³Jehu-i Judah am Ahaziah ongpalei shem am hanei pongei, “Amü üam vaipa?” shei phe. Jomi, “Hamphongü Ahaziahlei shem am hih, hatü hamphongü ongpalei shem am, onglanyü Jezebelei hapeüthü thümnüng peiküpeih” shei e.

¹⁴Jehu-i büpalei nanglakthü kü, “Hathü yemmü yeptuh” shei e. Hanangkü jomi hathü yemmü yepei jom pinyipünyi thahshi Beth-Eked kahsha touei deiyei jü. Büpai hükao yemmü aoei netuh.

¹⁵Mechem büpa haleipü layaongei daijapa, büpai lemei Rekhabei cheha Jehonadab büpa mü pongteinüng heihjapü heüei Jehu-i büpa kü selam vaitei, hatü büpa kü, “Ngelei mong nüng touei hingshangi nyupü keiha nüngei mongao ngei mü hingshangi nyaaikhihma yo?” shei e. Jehonadabi, “Hih” shei e. “Hei vaijema nüngei lak lüshih” shei Jehu-i e. Hanangkü büpai lak lüshuoh, hatü Jehu-i büpa koyei khari dokshangei anei uohü.

¹⁶Jehu-i, “Ngei mü mükei, hatü ngei mekei SHEMBÜPA kü nyakei kennya, veituh” shei e, hatü büpai büpa laophülei koyei khari kü uotü Samarialei leiteke.

¹⁷Mechem Jehu Samaria ngoipa, büpai halei Ahab am shem aopü kemei jütük; SHEMBÜPAlei shah Elijah homei epükei büpai jom peü jütük.

¹⁸Hapheikü Jehu-i Samaria am nanglakthü kemei nyükei thaihütü jomphong kü, “Ahabi Baal kahvang maani mon chongphopeih, shejao Jehu-i longi chongphohen.

¹⁹Hanangkü shaang Baal kahvangei thibüthü peü, büpa chongphobüthü hatü ngongpathü peü nyükkei. Hükao ne-ami nyüktuh; mehenangkü ngei Baal kahvang kü moila longpü shuohnüng hih. Üpai nepeihenshang yemmü netuhpih” shei e. Shejao hayü Baal kahvang chongphopüthü jütüknüng shei Jehu-i lawlüppü shiüteke.

²⁰Jehu-i, “Baal kahvang kü dhüm shuoh-ei thaihen nyüktuh” shei e. Hanangkü jomi hapa lenteke.

²¹Jehu-i Israel kahdok peü philei ha shah shom, hatü Baal kahvang chongphopüthü peü pei; hükao nepei-i nenyu. Jung hük kübü jung hük thahshi mangma thahshi Baal kahvangei phopshemei maei thai.

²²Hatü Jehu-i owhiai tuhteipü shennyak kü, “Baal kahvang chongphobüthü kü owhiai deikei” shei e. Hanangkü büpai owhiaithü deijateke.

²³Hahepak kü Jehu hatü Jehonadab nyi Baal kahvang phopshemei shüteke. Jehu-i Baal kahvang chongphobüthü kü, “Veituh, hatouei SHEMBÜPA chongphopü üpayao neshiüpeü kemei Baal kahvang chongphopüthü mon nyüke” shei e.

²⁴Hanangkü jijinyi-i moila hatü jakpü moila shuohhen shüteke. Shaang Jehu-i chingshelei shennyak jom büali thahshi ngeükhüam shuohtü yaonghütü, “Amphong pahüki dangkao shennyak hanei yangei deishihtükjema, büpalei yangnyu nangjei nüngei yangnyu yahhen” shei e.

²⁵Jehu-i moila shuoh-ei kemhinüng büpai yompüthü, hatü lakchongbüthü kü, “Mongei shüei hathü jütuh; hükao yangei tedeishih” shei e. Hanangkü jomi hathü bapei jü, hatü mahngthü shüei shüei chingshelei ngai. Jomphongi shao Baal kahvang phopshem mongpalei shüei,

²⁶daülangpü yaong shemnyüthü ngaiyei aw kü jaktük.

²⁷Jomi Baal kahvangei daülangpü yaong shemnyüthü hatü phopshem mangtük, hatü shennyakthüi hapa phopshemü shinnyih thahshi nühinam shing vainyüpeih.

²⁸Hanangkü Jehu-i Israel kü Baal kahvang khümpü maoei tükpeih.

²⁹Shejao Jehu-i Nebatei cheha Jeroboam, üpai Bethel hatü Dan kü hon mohoh cheha kü khümei Israel am mang thahhüpa, hapa mang kübü neyan.

³⁰SHEMBÜPAi Jehu kü, “Ngei hapa dükhen jiüpü khih shei ngelei mongei deihshi nyupü peü ngei nüng kü epükei Ahab am shem kü peü dükpü nangkü nüngei hühihathü denshem ali thahshi Israel ong uoshing kü vanglem lemhen” shei e.

³¹Shejao Jehu-i büpalei mong kempai SHEMBÜPA, Israel Kahvangei shahkungthü nebang; Israel mang thahhüpü Jeroboamei mang kübü büpa neyan.

³²Hathü nyih kü SHEMBÜPAi Israel kahdok bhihtük maantükhen pangteke. Hazael ongpai Israel amei kahmük peü neüei,

³³Gilead kahdok kü Jordan heongphi lappai Gad, Reuben hatü Manasseh amei kahmükthü Aroer jilathü kübü Arnon yungyen Gilead kübü Bashan thahshi omei neüei yahlang.

³⁴Shaang Jehu-i dükpü lebü douthü peü; büpai monglongei dükpü douthü kemei Israel Ongthülei Büshah Laitap kü nyangei nyüpeih.

³⁵Jehu di, hatü Samarialei mahng vü. Büpa kü jeiyei cheha Jehoahaz ong vaiteke.

³⁶Jehu-i Samaria kü Israel amei ong bong hapüshet thahshi vaiteke.