Read Phom Naga 2 ONGPATHÜ 15 Bible Online

2 ONGPATHÜ 15 - Phom Naga bible

2 ONGPATHÜ 15

¹Israel kü Jeroboami ong vaipü bong hapünyetpabü kü Judah kü Amaziahlei cheha Azariah-i ong vaiteke.

²Büpa ong vaipü hepak kü büpalei nyübüh bong anpüvok nyu, hatü büpai Jerusalemei bong pinyipüanpünyi vanglem lem. Chenyü-ü Jerusalem am Jekoliah shei mentü nyu.

³Büpai chepa Amaziah-i dükpü keiha SHEMBÜPA touei mehe jiü, ha dük.

⁴Shejao büpai vaümchongthü neyaktük; nanglakthüi nedoh-i halei moila hatü ayingshü jakhamteke.

⁵SHEMBÜPAi ongpa kü dipü nyih thahshi ngomdin bahhü; hanangkü büpayü hayaoha khaatei lebü shem kü nyu. Ongpalei cheha Jothami ongshem kü veiyei nanglakthü kü vanglem lem.

⁶Azariah-i dükpü lemphüli Judah Ongthülei Büshah Laitap kü nyangei nyüpeih.

⁷Azariah di, hatü chebü chepa mü David Chingnyülei mahng vü, hatü cheha Jothami büpa kü jeiyei ong vaiteke.

⁸Azariah-i Judah kü vanglem lempü bong hapüanpü shetpabü kü Jeroboamei cheha Zekhariah-i Samarialei Israel amei ong vai, hatü büpai lenyang vok ong vaiteke.

⁹Chebü chepa ami dükpü keiha büpaiyao SHEMBÜPA touei mang dük. Israel am mang thahhüpü Nebatei cheha Jeroboamei mang kübü büpa neyan.

¹⁰Jebeshlei cheha Shallumi Zekhariah khüei phaüshah show. Büpai nanglakthüi eeshi büpa jü, hatü büpa kü jeiyei ong vaiteke.

¹¹Zekhariah-i dükpü lemphüli Israel Ongthülei Büshah Laitap kü nyangei nyüpeih.

¹²Jehu kü, “Nüngei hühihathüi Israel kü den ali thahshi ong uoshing kü uohen” shei SHEMBÜPAi epü jiüshi vamteke.

¹³Judah kü Uzziah-i ong vaipü bong hapüanpü shüpabü kü Jebeshlei cheha Shallumi Israel kü ong vai, hatü büpai Samarialei lenyang hük mon ong vaiteke.

¹⁴Hahepak kü Tirzah leipü Gadilei cheha Menahem Samarialei aongei Jebeshlei cheha Menahem jütüktü büpa kü jeiyei ong vai.

¹⁵Shallumi dükpü lemphüli, büpai phaüshah showpü peü Israel Ongthülei Büshah Laitap kü nyangei nyüpeih.

¹⁶Hahepak kü Menahemi Tirzah leipü layaongei daishingkü Tiphsah ami büpa touei shakei nevampü nangkü büpai hapa chingnyü, hatü halei nyupüthü, hatü ngeihpü shonpü shingthü peü hahteke. Büpai Tiphsah hahtü büm nekongpü nyühathü peü vom shaakei jükemteke.

¹⁷Judah kü Azariah ongpai vanglem lempü bong hapüanpü shüpabü kü Gadilei cheha Menahemi Israel kü ong vai, hatü büpai Samarialei bong an vanglem lem.

¹⁸Büpai SHEMBÜPA touei mang dük; büpai vanglem lempü yangkemei kü Israel am mang thahhüpü Nebatei cheha Jeroboamei mang kübü büpa neyan.

¹⁹Hahepak kü Assyria am Pul ongpa peiyei Israel hah, hatü Israel kü nedoh-i ong vaiyei nyuhen wong nyemyahshuoh shei Menahemi büpa kü ngin dok haja anpüali shuoh.

²⁰Menahemi hapa ngin Israel shemmeithü ieyei leipü nyeanei ngin pinyipüan baong thaiyei shuoh. Hanangkü Assyria ongpai hapa kahdokei nenyui nyokei leidai.

²¹Menahemi dükpü lemphüli Israel Ongthülei Büshah Laitap kü nyangei nyüpeih.

²²Büpa di, hatü chebü chepa am mü vü, hatü cheha Pekahiah-i büpa jeiyei ong vaiteke.

²³Judah kahdok kü Azariah ongpai vanglem lempü bong pinyipüanpabü kü Menahemei cheha Pekahiah-i Samarialei Israel amei ong vai, hatü büpai bong nyi mon vanglem lem.

²⁴Pekahiah-i SHEMBÜPA touei mang dük. Israel am mang thahhüpü Nebatei cheha Jeroboamei mang kübü büpa neyan.

²⁵Büpalei lakchongbü longpü hük, Remaliahlei cheha Pekah-i büpa khüei phaüshah show. Büpa mü Gilead am shennyak pinyipüan mütü büpai Pekahiah mü Argob hatü Arieh nyi Samaria Chingnyü ongshemei jü. Hanangkü Pekah-i Pekahiah jütü büpa jeiyei ong vaiteke.

²⁶Pekahiah-i dükpü lemphüli Israel Ongthülei Büshah Laitap kü nyangei nyüpeih.

²⁷Judah kü Azariah ongpai vanglem lempü bong pinyipüanpünyipabü kü Remaliahlei cheha Pekah-i Samarialei Israel kü ong vai, hatü büpai bong kukha vanglem lem.

²⁸Büpai SHEMBÜPA touei mang dük. Israel am mang thahhüpü Nebatei cheha Jeroboamei mang kübü büpa neyan.

²⁹Israel kü Pekah ong vaipü hepak kü Assyria am Tiglath Pileser ongpa peiyei Ijon, Abel-Beth-Maakah, Janoah, Kedesh hatü Hazor yahlang. Büpai Naphtali amei kahdok Gilead hatü Galil nyi yahtü shennyakthü kemei Assyrialei shetei deilangkem.

³⁰Judah kü Uzziahlei cheha Jotham vanglem lempü bong kukhapabü kü Elahlei cheha Hoshea-i Pekah ongpa khüei phaüshah show, hatü büpa jütüktü jeiyei ong vaiteke.

³¹Pekah-i dükpü lemphüli Israel Ongthülei Büshah Laitap kü nyangei nyüpeih.

³²Israel kü Remaliahlei cheha Pekah-i ong vaipü bong nyipabü kü Uzziahlei cheha Jothami Judah kü ong vaiteke.

³³Büpa ong vaipü hepak kü nyübüh bong hapünga nyu, hatü büpai Jerusalemei bong anpüvok vanglem lem. Chenyü-ü Zadokei yiükha Jerusha shei menpü nyuteke.

³⁴Büpai SHEMBÜPA touei mehe jiü, ha chepa Uzziah-i keiha dükteke.

³⁵Shejao büpai vaümchongthü neyaktük; hanangkü nanglakthüi halei nedoh-i moila shuoh-ei ayingshü jakhamteke. Jothami SHEMBÜPAlei shem Dokpa Shaden lingei lei.

³⁶Jothami dükpü lemphüli Judah Ongthülei Büshah Laitap kü nyangei nyüpeih.

³⁷Büpa vanglem lempü nyih kü SHEMBÜPAi Judah am hahhen shingvaishi Aram am Rezin ongpa hatü Israel am Pekah ongpa nyi shomteke.

³⁸Jotham di, hatü chebü chepa am mü David Chingnyülei mahng vü, hatü cheha Ahaz-i büpa kü jeiyei ong vaiteke.