Read Phom Naga 2 ONGPATHÜ 17 Bible Online

2 ONGPATHÜ 17 - Phom Naga bible

2 ONGPATHÜ 17

¹Judah kü Ahaz ongpai vanglem lempü bong anpünyipabü kü Samarialei Israel kü Elahlei cheha Hoshea ong vai, hatü büpai Samarialei bong shü thahshi vanglem lem.

²Büpai SHEMBÜPA touei mang dük, shejao büpa she kübü Israel ongthü kei dempayü nevai.

³Assyria am Shalmaneser ongpai büpa mü hokhen aong; Hosheayü büpa phangkü ong naü-eepa vai, hatü büpa kü bom ühhamteke.

⁴Shejao Assyria ongpai Hosheayü peileipa khih shei yepaok; mehenangkü büpai Ijip ongpa So kü khüambakshih shei phongmokbüthü shom, hatü büpai bong ieyei Assyria ongpa kü shuohhampü bom neshuoh-i doh. Hanangkü Shalmaneser-i büpa yepei khoklatei tuh.

⁵Hapheikü Shalmaneser ongpai Israel kahdok kemei hahtü Samarialei aongei bong jem thahshi shüm.

⁶Hoshea ong vaipü bong shüpabü kü Assyria ongpai Samaria omei yah, hatü Israel am kemei Assyrialei wüpei deilang. Büpai hathü hanei Habor Yungnyü yopailei Gozan kahdok Halah chingnyülei tuh, hatü haneiyü Media chingnyülei tuhteke.

⁷Ijip kahdok Pharaoh ongpalei lakmong leipü jom müei leipü SHEMBÜPA, jomei Kahvang khüei mang thahpü nangkü Israel am kü ha vampeih. Jomi lebü kahvangthü kü khüm,

⁸hatü Israel am peishingkü SHEMBÜPAi changtükpü jatthülei vanglem kü kam, hatü Israel am ongthüi nyuhpüvenpü dükhiling kü mü.

⁹Israel nanglakthüi SHEMBÜPA, jomei Kahvang touei mehe nejiü, ha joei joei dükteke. Jomi jilathü peü kü chingha kübü chingnyü thahshi vaümchongthü ling.

¹⁰Jomi shangtaothü hatü pünyü dhüm peü kü shemnyüthü hatü Asherah nyüha kahvangei lajeithü lingei tuh,

¹¹hatü SHEMBÜPAi jom shekü changtükpü jatthüi dükpükei vaümchongthü peü kü ayingshü jakei moila shuoh. Jomi nemeipü douthü dükei SHEMBÜPA mongshihhü,

¹²hatü SHEMBÜPAi jom kü, “Ammi ha tedük” shei epü nebangi lajeithü kü khümteke.

¹³SHEMBÜPAi Israel hatü Judah kü büpalei thibüthü, hatü manghkhangthü homei, “Ammi ammei mang lemthü kübü mong leptuh, hatü ngei ammei bühipathü kü dükhen shuohpü, hatü ngei am kao ngei chongphopü thibüthü homei shuohpü shahkungnyüthü bangei düktuh” shei shahvüng shuoh-ei eteke.

¹⁴Shejao jomi jomei bühipathüi SHEMBÜPA, jomei Kahvang kü hingnelemi nyupü keiha jomi ha nebangi nyu.

¹⁵Jomi büpalei shahkungnyüthü nebangi mong vaan, hatü büpai chebü chepa am mü vangteishuwteipü, hatü büpai jom kü shuohpü shahvüng yaktük. Jomi yahlak neshiüpü lajeithü kü khümei yahlak neshiüi leidai. “Jomi dükpükei tedük” shei SHEMBÜPAi jom kü ngeükhüam shuohlangmao jomi jom ngeih-ei shonei nyupü jatthülei deiaei nyuhteke, hatü SHEMBÜPAi tedük shei epü douthü dük.

¹⁶Jomi SHEMBÜPA, jomei Kahvangei shahkungthü peü yaktük, hatü jomi jom shingvaishi mohoh cheha lajei nyi shükei ling, Asherah kahvangei lajei ling, hatü vangsho lithilen hatü Baal kahvang kü khüm.

¹⁷Jomi jomei hapeüthü aw kü jakei moila shuoh. Jomi phongyom thiphepü lemphü düktei, hatü SHEMBÜPA mongshihhüei büpa touei mang dükhen shingvaishi jom nyingi jom yutük.

¹⁸Hanangkü SHEMBÜPAi Israel am kü mongshih, hatü büpa toueipü jom changtük; Judah jat mü lenei hükao ne-ao.

¹⁹Judah amiyao SHEMBÜPA, jomei Kahvangei shahkungnyüthü nedük, shejao Israel ami hupü vanglem kü kam.

²⁰SHEMBÜPAi Israel amei hühihathü peü yaktük; büpai jomphong kü hanghi shuoh, hatü büpa toueipü jomphong mangchangtük thahshi büpai jom lupülempüthülei lak kü shuoh.

²¹Mechem büpai Israel am David phang kübü shaakei yaktükpa, Israel ami Nebatei cheha Jeroboamü jomei ong vaiyei tuh. Jom SHEMBÜPAlei phei müpü kübü Jeroboami jom yawh-ei deiyei nyempühanbenüng mang thahhü.

²²Israel ami Jeroboami thahpü mang kü nedoh-i nyu,

²³hatü SHEMBÜPAi büpa chongphopü thibüthü homei epükei Israel am büpa toueipü mangchangtük thahshi hapa mang kübü neyan. Hanangkü Israel amü laophülei kahdok kübü Assyria kahdokei shinnyih thahshi wüpküpei daiyei nyüpeih.

²⁴Assyria ongpai Babylon, Kuthah, Avva, Hamath hatü Sepharvaim kübü shennyakthü müei deiyei Israel am kü jeiyei uophongteke. Jomi Samaria chingthü kaamei yahtü halei nyu.

²⁵Mechem jomi shongei halei nyupa, jomi SHEMBÜPA kü nekhüm; hanangkü SHEMBÜPAi mailang shomei jom hanei hahtük.

²⁶Hanangkü Assyria ongpa kü, “Nüngi yah-ei deiyei Samarialei tuhphongpü jatthüi hapa kahdok kübü Kahvangei shahkungnyü nenyingnyu; hanangkü hapa Kahvangi mailang shomei jom jütüknyüke; mehenangkü shennyakthüi hapa kahdok kübü Kahvangei shahkungnyü nenyingang” shei eshuohteke.

²⁷Hahepak kü Assyria ongpai, “Hapa kahdok leipü amphongi müei leipü ngongpathü khongkü hük halei shomeishuoh; büpa halei heih-ei nyemnyu, hatü jomphong kü hapa kahdok kübü Kahvangei shahkungnyü nyemvenshuoh” shei ngeükhüam shuoh.

²⁸Hanangkü jomi Samaria leipü müei leipü ngongpathü khong kübü hük leiyei Bethelei nyu; büpai jom kü mekei Kahvang kü khümhen ha nyuhteke.

²⁹Shejao jatthü peüi laophü laophü nyupü shingthü peü kü laophülei kahvang lajei lingtü Samaria ami lingpü khümshing vaümchongthü touei haüei tuh.

³⁰Babylon shennyakthüi Sukkoth-Benoth ling, Kuthah shennyakthüi Nergal ling, hatü Hamath shennyakthüi Ashima,

³¹hatü Avva shennyakthüi Nibhaz hatü Tartak, hatü Sepharvaim ami jomei Sepharvaim kahvangthü Adrammelekh hatü Anammelekh kü laophülei hapeüthü aw kü jakei moila shuoh.

³²Jomi SHEMBÜPA kao khüm, hatü khümshing vaümchongthü kü ngongpa kei chongphohen, hatü jakpü moila shuohhen shingvaishi jom khong kübü shennyak lemphü je.

³³Hanangkü jomi SHEMBÜPA kü khüm, shejao jomi laophülei kahdokei khümteipü vanglem aimü laophü laophülei kahvangthü kao khüm.

³⁴Shinnyih thahshi jomi jomei vanglem düknyüpeih. Jomi SHEMBÜPA kü nekhümnyih, nevaijü Jakob, üpa kü Israel shei nyük, büpalei hapeüthü kü SHEMBÜPAi shuohpü shahkungnyüthü, hatü vanglemthü kü nemünyih.

³⁵Mechem SHEMBÜPAi jom mü vangpüshuwpü lingpa, büpai jom kü, “Ammi lebü kahvangthü mepa kao tekhüm, nevaijü aümei tesha, hathü chongtepho nevaijü moila teshuoh,

³⁶shejao amphongi SHEMBÜPA, üpai amphong Ijip kahdok leipü büpalei laklu wong longpai am müei leipa, büpa kü mon khümtuh, hatü moila shuohtuh.

³⁷Ammi düngei büpai am shingvaishi nyangpü shahkungnyüthü, hatü vanglemthü kenhingei noteituh. Ammi lebü kahvangthü tekhüm.

³⁸Ngei amphong mü lingpü vangpüshuwpü tebetük, hatü lebü kahvangthü tekhüm.

³⁹Shejao ammi SHEMBÜPA, ammei Kahvang kü mon khümtuh; büpai ammei vepathülei lak kübü yangphahen” shei shahkungnyü shuohteke.

⁴⁰Jomi ha nebang, shejao nedoh-i meyangpü vanglem chang notei.

⁴¹Hanangkü mechem hapa jatthüi SHEMBÜPA kü khümpa, jomi jomei lajeithüao chongpho. Shinnyih thahshi jomei chebü chepa ami dükpükei hapa hühihathüi nedoh-i düknyüpeih.