Read Phom Naga 2 ONGPATHÜ 20 Bible Online

2 ONGPATHÜ 20 - Phom Naga bible

2 ONGPATHÜ 20

¹Hathü nyih kü Hezekiah ongpa tüngei didaihen mü nyuteke. Amozlei cheha Isaiah thibü büpa touei peiyei büpa kü, “SHEMBÜPAi hapakei enyüke: Nüngei shem meishi jungtüktuh; mehenangkü nüng didaihen; hapa dinshan kübü nüng neyangaokpih” shei e.

²Hahepak kü Hezekiahlei dhe bham lemei lepei leitü SHEMBÜPA kü phopei,

³“Oh SHEMBÜPA, ngei mekei nüng kü ngelei mongdang kempai hinglemei kampa, hatü nüng touei mehe jiü ha dükei daipa, ha deih-ei dangtuh” shei e, hatü büpai shahyaki thep.

⁴Isaiah-i ongshem kü jiampa dung-am peih-ei mangdai shekü SHEMBÜPAlei shah büpa touei peiyei,

⁵“Nüng nyokei leituh, hatü ngelei nanglakthü mübü Hezekiah kü hei etuh, ‘SHEMBÜPA, ambü Davidei Kahvangi hapakei enyüke: Nüngi phoppü ngei dantepih, hatü nüngei mükphi ngei eetepih; ngei nüng meihühen hih. Nyih jempabü kü nüngi SHEMBÜPAlei shemei aonghen.

⁶Ngei nüng kü bong anpünga shao üphahen. Ngei nüng hatü Jerusalem chingnyü Assyria ongpalei lak kübü yanghen. Ngei hapa chingnyü ngelei men kü hatü ngelei chongphobü Davidei men kü yangei tuhhen’ ” shei eteke.

⁷Hahepak kü Isaiah-i, “Adhajüki aan lingtuh. Jomi hapakei lingtü hihüma kü shihtuh, hatü büpa meidaihen” shei e.

⁸Hezekiah-i Isaiah kü, “SHEMBÜPAi ngei meiphahen hatü ngei nyih jempabü kü SHEMBÜPAlei shemei aonghen mü nyangeihepü mehe nyuhen?” shei phe.

⁹Isaiah-i, “SHEMBÜPAleipü nüng kü shuohpü nyangeihepeyü hapa khih, hatü SHEMBÜPAi büpai lahtükpü dou dükhen: Vangdhüm laang she philei lakham an daipü meipü hi, ngaümphei philei lakham an leipü meipa?” shei e.

¹⁰Hezekiah-i jangei, “She philei vangdhüm laang lakham an daipü-üng yopüba” shei e. “Ngaümphei phileiang lakham an nyemlei” shei e.

¹¹Isaiah-i SHEMBÜPA kü phop, hatü SHEMBÜPAi Ahaz ongpai lingpü lateen kü vangdhüm laang lakham an ngaümphei lemei leishihteke.

¹²Hahepak kü Baladanei cheha, Babylon ongpa Merodakh-Baladani Hezekiah ongpa tüngpü danei büpai Hezekiah kü lai hük hatü thintho hük shom.

¹³Hezekiah-i phongmokbüthü ombomei yah, hatü büpai jomphong kü dou tuhpü shem leipü hon hi ngin, melivungla, meipü mainga hatü lahhilaong kemei hushuohteke. Hezekiah ongpai jomphong kü nehupü dou mepayao büpalei ongshem nevaijü ongching kü nenyu.

¹⁴Hahepak kü Isaiah thibüi Hezekiah ongpa touei peiyei, “Hathü shennyakthüi mehe ephopa, hatü jomphong meleipü peipa?” shei phe. Hezekiah-i jangei, “Jomphongü tailu kahmük Babylon leipü peipü khih” shei e.

¹⁵Thibüpai büpa kü, “Nüngei shem leipü jomi mehe mehe eepa?” shei e. Hezekiah-i, “Ngelei shemei nyupü lemphüli jomi eetepih; ngei jom kü nehupü shemei meheyao nenyupih” shei jangei e.

¹⁶Hahepak kü Isaiah-i Hezekiah kü, “SHEMBÜPAlei shah bangtuh:

¹⁷Nüngei shemei nyupü lemphüli, ambü ampa den kübü shinnyih thahshi thaiyei tuhpü douthü kemei Babylonei koei lüdaihen nyihthü ngoikünyüke; mepayao aoei netuhpih shei SHEMBÜPAi enyüke.

¹⁸Nüngi bühhahpü hapeüthü hanei müei deilanghen; jomphongü Babylon ongpalei ongshemei ban tüktüktü chongphoei nyuhen” shei e.

¹⁹Hahepak kü Hezekiah-i Isaiah kü, “SHEMBÜPAlei shah nüngi eküpeyü meiangke” shei e. Mehenangkü büpai deihhahpeyü büpalei den kemei kü chingmei hatü nyiushemmei kü nyuhen shei deihhahteke.

²⁰Hezekiah-i dükpü dou lemphüli, büpai lingpü yungkuk hatü chingnyülei yunglem laetei yung shanpü hathü kemei Judah Ongthülei Büshah Laitap kü nyangei nyüpeih.

²¹Hezekiah di, hatü cheha Manasseh-i büpa kü jeiyei ong vaiteke.