Read Phom Naga 2 ONGPATHÜ 21 Bible Online

2 ONGPATHÜ 21 - Phom Naga bible

2 ONGPATHÜ 21

¹Manasseh-i Judah amei ong vaishingkü büpa nyübüh bong anpünyi nyu, hatü büpai Jerusalemei bong pinyipüanpünga vanglem lem. Chenyülei menü Hephzibah nyuteke.

²Israel am leishingkü SHEMBÜPAi changtükpü jatthülei jiühitnalai vanglem, dükhiling kü kamei büpai SHEMBÜPA touei mang thah.

³Büpai chepa Hezekiah-i mangtükpü vaümchongthü ne leiyei ling; büpai Baal kahvang kü khümhen moidüthü hatü Asherah lajeithü Israel ongpa Ahabi lingpükei ling. Büpai lithathü peü kü khüm.

⁴SHEMBÜPAi, “Jerusalemei ngei kü khümtuh” shei epü SHEMBÜPAlei Phopshemei büpai lebü kahvangthülei moidüthü ling.

⁵Phopshem chingshe nyiphenei büpai lithathü kü khümhen moidüthü ling.

⁶Büpai cheha aw kü jakei moila shuoh. Büpai phongyom hingletpü, lashüh tetpü dou dük, hatü yimpi laang mü shah eteipü am, hatü tetpüvanpü am kü pheyeiyuei nyu. Büpai SHEMBÜPA touei mang longi dükei, büpa mongshihhü.

⁷“Israel jat anpünyi kübü ngei jepü hapa Jerusalem Phopshemei ngei kü khümtuh shei SHEMBÜPAi David hatü cheha Solomon nyi kü epü shemei büpai Asherah kahvangei lajei lingei tuh.

⁸Jomi-üng kenhingei ngei jom kü epü peü dükjema, hatü ngelei chongphobü Mosa homei jom kü shuohpü shahkungnyüthü kemei noteijema ngei jomei bühipa kü shuohpü kahdok leipü hajük kü Israel am nenyaiteihüpih” shei SHEMBÜPAi e.

⁹Shejao nanglakthüi ha nebang. Manasseh-i nyeishi mang dük; hanangkü Israel am peishingkü SHEMBÜPAi changtükpü jatthüi dükpü mao nyeishi nanglakthüi mang dükteke.

¹⁰SHEMBÜPAi büpalei chongphopü thibüthü homei ha eteke:

¹¹“Judah amei ongpa Manasseh-i hathü jiühitnalaipü mang thahteke. Büpai büpa shekü nyupü Amor ami dükpü mao nyeishi mang dük, hatü büpalei lajeithü homei Judah am mang thahhü.

¹²Hanangkü SHEMBÜPA, Israel Kahvangi hapakei enyüke: Ngei Jerusalem hatü Judah nyi kü shanghah koei peihen, hatü hapa jung danpai dhaongvang kü nyahhen.

¹³Ngei Samaria khüei shetpü vü, hatü Ahab am shem khüei shetpü lüngi ngei Jerusalem kao shethen. Ngei Jerusalemü shennyak hüki dükhi-üm vaüei thittüktü dhongdhongi haüphongpükei tuhphonghen.

¹⁴Ngelei mükjüp yahhen aopü nanglakthüao yaktükhen, hatü jomei vepathülei lak kü shuohtükhen. Jomphongü jomei vepathülei lak kü aonghen, hatü jomei kahmük kübü lemphüli aetlanghen;

¹⁵mehenangkü jomei bühipa Ijip kübü vamei leipü nyih kübü shinnyih thahshi jomi ngei touei mang dük, hatü ngei mongshih vamhüteke” shei SHEMBÜPAi eteke.

¹⁶Büpai Judah am mang thahhüei SHEMBÜPA touei mehe mang ha jomi dükpü mü Manasseh-i Jerusalem jung phihük kübü jung phihük thahshi mang neshiüpü kü iy longi yenhü.

¹⁷Manasseh-i dükpü lemphüli, büpai dükpü mang omshi Judah Ongthülei Büshah Laitap kü nyangei nyüpeih.

¹⁸Manasseh di, hatü ongshem leipü Uzza pemongei büpalei mahng vüteke, hatü cheha Amoni büpa kü jeiyei ong vaiteke.

¹⁹Amon ong vaishingkü büpalei nyübüh bong hapünyi nyu, hatü büpai Jerusalemei bong nyi vanglem lem. Chenyülei menü Meshullemeth, Jotbah leipü Haruzlei yiükha nyuteke.

²⁰Büpai chepa Manasseh-i dükpükei SHEMBÜPA touei mang dük.

²¹Chepai kampü lem peü kü büpa kam, chepai keiha lajeithü chongphoei khümteke.

²²Büpai SHEMBÜPA, chebü chepa amei Kahvang yakphong, hatü SHEMBÜPAlei lem kü nekam.

²³Amonei lakchongbüthü büpa khüei phaüshah show, hatü büpa ongshemei jütük.

²⁴Hahepak kü Judah nanglakthüi Amon khüei yaongpü shennyakthü peü jütük, hatü jomphongi büpa kü jeiyei cheha Josiah ong vaihü.

²⁵Amoni dükpü lemphüli Judah Ongthülei Büshah Laitap kü nyangei nyüpeih.

²⁶Amonü Uzza pemongei büpalei mahngchongei vüteke, hatü cheha Josiah büpa kü jeiyei ong vaiteke.