Read Phom Naga 2 ONGPATHÜ 22 Bible Online

2 ONGPATHÜ 22 - Phom Naga bible

2 ONGPATHÜ 22

¹Josiah ong vaishingkü büpalei nyübüh bong shet mon nyu, hatü büpai Jerusalemei bong hapüanpühük vanglem lem. Chenyülei menü Jedidah, Bozkath am Adaiahlei yiükha nyuteke.

²Büpai SHEMBÜPA touei mehe jiü, ha dük, hatü büpai chebü Davidei lemthü kü laknyong lakdah melemeiyao neleplüki kamteke.

³Büpai vanglem lempü bong anpüshetpabü kü Josiah ongpai büpalei laknyangbü Shaphan, Azaliahlei cheha, Meshullamei chehü SHEMBÜPAlei shemei shomei,

⁴“Hilkiah ngongchong touei aongtuh, hatü shaden yombüthüi nanglakthü leipü thaipü lop büpai iehütuh.

⁵Phopshem lingpüthü kü veihen shingvaishi jepü shennyakthü kü hapa lop shuohtuh, hatü jomi hapa lop SHEMBÜPAlei shem lingpüthü,

⁶mistrithü, shem vepüthü hatü yaong bappüthü kü shuohhütuh, hatü jomi hapa lopi phopshem linghen taukta hatü shangei lingtükpü yaongthü shakhütuh.

⁷Shejao jomei lak kü shuohtükpü lop nangkü itteihen napü neshiü; mehenangkü jomi shahhing kü düknyüke” shei e.

⁸Shaphani Hilkiah ngongchong kü ongpalei shah shuohhen heih, hatü Hilkiah-i büpa kü, “Ngei SHEMBÜPAlei shemei Shahkungnyü Laitap dangtepih” shei ejateke. Büpai ha Shaphan kü shuoh, hatü büpai ha ieteke.

⁹Hapheikü laknyangbü Shaphani ongpa touei leiyei büpa kü, “Nüngei chongphobüi Phopshem leipü lop yah-ei Phopshem lingpü dou kü veipüthü kü shuohtoja” shei e.

¹⁰Laknyangbü Shaphani ongpa kü, “Ngongchong Hilkiah-i ngei kü laitap hük yahphopeih” shei e, hatü Shaphani ongpa touei hapa wongmü ieteke.

¹¹Mechem ongpai hapa Shahkungnyü Laitap leipü shahthü danpa, büpai laophülei ashakviha shaak,

¹²hatü Hilkiah ngongchong, Shaphanei cheha Ahikam, Mikaiahlei cheha Akhbor, Laknyangbü Shaphan hatü ongpalei chongphobü Asaiah hathü kü ongpai ngeükhüam shuoh-ei e,

¹³“Daituh, hatü ngei, nanglakthü hatü Judah am kempü shingvaishi hapa dangpü Lai kü mehe enya, hapa SHEMBÜPA kü phekei. Jen khüei SHEMBÜPAi mongshihpü longpü nyüke; mehenangkü jenei bühipai jen kü nyangei nyupü keiha düktuh shei epü ha shah nebangi nyupü khih” shei e.

¹⁴Hanangkü Hilkiah ngongpa, Ahikam, Akhbor, Shaphan hatü Asaiah hathüi phopshem leipü ashakviha kü veiteipü Harkaslei cheha Tikvah, Tikvahlei cheha Shallumei chenyüha Huldah thibüla touei pei. Pinnyü-ü Jerusalem shingja philei nyu.

¹⁵Pinnyüi jomphong kü, “SHEMBÜPA, Israel Kahvangi hapakei enyüke: Ngei touei amphong shompü shennyak kü hapakei etuh,

¹⁶‘SHEMBÜPAi hapakei enyüke, ngei hapa shing hatü halei nyupüthü kü ongpai iepü hapa Lailei nyupü shanghah peü koei peihen.

¹⁷Mehenangkü jomi ngei yakphongtü lebü kahvangthü kü moila shuoh-ei khümpeih, hatü jomei laki lingpü lajeithüi ngei mongshihhüpeih; hanangkü ngei mongshihpü aw kei bahhen, hatü hapa nemethen.

¹⁸Shejao SHEMBÜPA kü phehen shingvaishi amphong shompü Judah ongpa kü hapakei etuh, SHEMBÜPA, Israel Kahvangi hapakei enyüke: Nüngi danpü shahthü nangkeyü,

¹⁹nüngi mong lepei, SHEMBÜPA touei maanpü leipü nangkü ngei hapa shing hatü halei nyupüthü lavüngtoiyei leitükhen, hatü thaüvaühen shei epü nüngi danei nüngi ashakviha shaakei ngei touei theppü nangkü ngei nüngi epü ngeü dantepih shei SHEMBÜPAi enyüke.

²⁰Ngei hapa shing kü koei peihen shanghah nüngei müki ne-eehüpih; ngei nüngü chingmeivangmei kü dihühen’ ” shei e. Jomi ongpa touei hapa shahjang koei leiteke.