Read Phom Naga 2 ONGPATHÜ 24 Bible Online

2 ONGPATHÜ 24 - Phom Naga bible

2 ONGPATHÜ 24

¹Jehoiakim Judah kü ong vaipü hepak kü Babylon am Nebukadnezzar ongpa peiyei Judah hah, hatü bong jem thahshi büpa phangkü angteke. Hapheikü büpa mong yeiyaei Nebukadnezzar khüei yaong.

²SHEMBÜPAi büpa khüei Babylon am, Aram am, Moab am, Ammon am shom. SHEMBÜPAlei shah büpalei chongphopü thibüthüi epü keiha Judah am hahhen büpai hathü jatthü shom.

³Hingmei, Manasseh-i thahpü mangthü hatü büpai dükpü douthü nangkü SHEMBÜPAi epü keiha Judah am büpa toueipü changtükhen shingvaishi hathü douthü vam,

⁴hatü nyeinya vaishi büpai mang neshiüpü iy longi yenhü. Mehenangkü büpai Jerusalemü mang neshiüpü iy yenpai mahü, hatü SHEMBÜPAi mang tükhen nemong.

⁵Jehoiakimi dükpü lemphüli Judah ongthülei Büshah Laitap kü nyangei nyüpeih.

⁶Jehoiakim didaipheikü cheha Jehoiakini büpa kü jeiyei ong vaiteke.

⁷Ijip ongpai jomei kahdok leipü nedai; mehenangkü Babylon ongpaiyao Ijip amei kahmük Ijip Kahji kübü Euphrates Yung thahshi peü yahlangtü nyu.

⁸Jehoiakin ong vaipü hepak kü büpa nyübüh bong anpüshet nyu, hatü büpai Jerusalemei lenyang jem vanglem lem. Chenyü-ü Jerusalem am Elnathanei yiükha Nehushta nyu.

⁹Chepai dükpü keiha büpai SHEMBÜPA touei mehe mang nyu, ha dük.

¹⁰Büpalei hepak kü Babylon am Nebukadnezzar ongpalei lakchongbüthü aongei Jerusalem shüm,

¹¹hatü büpalei lakchongbüthü ching shinei show lingei tuhphongtü Nebukadnezzar büpa nyingi Jerusalem Chingnyülei shü,

¹²hatü Jehoiakin ongpa, chenyü, chongphobüthü, büpalei lakchongbüthü hatü ongshem leipü lakchongbüthü peü Babylon am touei shakei vam. Nebukadnezzar vanglem lempü bong shetpabü kü büpai Jehoiakin khoklatei yepei küp,

¹³hatü SHEMBÜPAi epü keiha, büpai SHEMBÜPAlei shem hatü ongshem leipü mopnyümopha kemei shetlangkem, hatü Solomoni SHEMBÜPAlei shemei noteihen lingpü hon dükhi-ümthü kemei nihtük.

¹⁴Büpai Jerusalem am kemei: lakchongbüthü, veshanthü peü hatü lahhinei dou dükaokpüthü peüshep haja an thahshi wüpküpei deilang. Peü mü taopathü mon Judahlei nedeihah-i tuhphong.

¹⁵Nebukadnezzar ongpai Jehoiakin ongpa Babylon wüpküpei yah-ei dai. Büpai Jehoiakinei chenyü, chenyüha, lakchongbüthü kahmük kü mübü shennyakthü peü müei dai.

¹⁶Nebukadnezzari Babylonei shongnyü shennyakthü jom haja nyet, lahhinei dou dükaokpüthü jom haja hük, hatü veshan vaiaokhen den ngoipü shennyakthü peü wüpküpei müei dai.

¹⁷Nebukadnezzari Jehoiakinei chepa naü-eepa Mattaniah kü Zedekiah shei men jeitü Judahlei ong vaiyei tuhteke.

¹⁸Zedekiah vanglem lemei chongpangpü hepak kü büpa nyübüh bong hapühük nyu, hatü büpai Jerusalemei bong anpühük vanglem lem. Chenyü-ü Libnah am Jeremiahlei yiükha Hamutal nyuteke.

¹⁹Chepa Jehoiakimi dükpü keiha büpai SHEMBÜPA touei mehe mang nyu, ha dük.

²⁰Jerusalem hatü Judah nanglakthü kü SHEMBÜPAi longi mongshihpü nangkü büpai jomphong büpa toueipü changtük.