Read Phom Naga 2 ONGPATHÜ 25 Bible Online

2 ONGPATHÜ 25 - Phom Naga bible

2 ONGPATHÜ 25

¹Zedekiah ongpai Babylon ongpa Nebukadnezzar ongpa khüei yaong. Hanangkü Nebukadnezzari büpalei veshanthü mütü peiyei Zedekiah-i vanglem lempü bong shüpabü lenyang an mü nyih anpabü kü Jerusalem hah; jomi ching shinei shümhen bham ling.

²Hanangkü hapa chingnyü Zedekiah-i vanglem lempü bong anpühükpabü bong thahshi shüm.

³Lenyang alipabü nyih shüpabü kü hapa chingnyülei shaühile longpü vam, hatü shennyakthüi hahhen meheyao neshiüi nyu.

⁴Babylon am ching shinei nyulangmao ongpalei pe yopailei bham nyi kübü peshaden homei bham benei ongpa hatü veshanthü peü yanüng nyaidaikem. Jom Arabah lemei nyaiyei dai,

⁵shejao Babylon am veshanthüi ongpa kü changei daiyei Jeriko Kahjilei büpa yep, hatü veshanthü büpa yakphongtü yandaikem.

⁶Riblah chingnyülei Nebukadnezzar touei Zedekiah yepei lei, hatü halei büpa hanghihühen shahphen shuoh.

⁷Zedekiah-i veishi chehathü peü jü; Nebukadnezzari Zedekiahlei mük luktüktü nyiamvüi shatü Babylonei müei dai.

⁸Babylon ongpa Nebukadnezzari vanglem lempü bong anpüshü mü lenyang nga mü nyih nyetpabü kü ongpa yompü veshan mübü, Nebuzaradan, Babylon ongpalei lakchongbü Jerusalemei pei.

⁹Büpai Jerusalem moilashem, ongshem hatü Jerusalemei nyupü shemthü peü awi haptük. Shongnyü shemthü peü awi haptük.

¹⁰Nebuzaradani mütü veshanthüi Jerusalem shinpü bhamthü peü mangtük.

¹¹Nebuzaradani chingei tuhphongpü nanglakthü, neaoknethangpü shennyakthü peü wüpküpei müei dai.

¹²Shejao büpai taopathü hanei nyalingngupai kah linghen hatü kahthü linghen tuhphong.

¹³Babylon ami SHEMBÜPAlei shem leipü melangnyiam shemnyü, hatü hapa ngowteipü khari, hatü melangnyiam yungching yah-ei khih mü nihtük, hatü Babylonei koei leidai.

¹⁴Jomphongi dük, hoklak, moidü leipü awnih hokteipü shung, awmi tükteipü nyiam, hatü Phopshemei noteipü melangnyiami lingpü douthü peü shetei leidai.

¹⁵Hapa veshan mübüi chilimji hatü awtao hokteipü shung, hon hatü ngin yah-ei lingpü douhinang kemei shetei leidai.

¹⁶Solomoni SHEMBÜPAlei shem kü haongpü shemnyü nyi kübü melangnyiam, melangnyiam yungching, hatü hapa ngowteipü khari hathüyü dok kü dokhen neaoki nyuteke.

¹⁷Shemnyü ieyei shaopü kü feet hapünyet nyu. Shemnyü ieyei kü melangnyiami shemnyü ju kü feet ali mü bhaoei shih, hatü hapa shinei pomegranat betjük ow lingei shihteke.

¹⁸Ha mü lenei Nebuzaradani Seraiah ngongchong, Zephaniah ngongpa, dousho kü nyipabü shongnyü shennyak, hatü shaden yompü jom jem yepei dai.

¹⁹Chingnyülei nyupüthü khong kübü veshanthü kü lakchongbü hük, hatü ongpa kü shahnying ebüthü jom nga yepei dai. Kahmük kü nyupü nanglakthülei men nyangteipü veshan mübülei laknyangbü hatü lebü shongnyü shennyak pejem thahshi müei dai.

²⁰Nebuzaradani jom müei Riblahlei Babylon ongpa touei müei pei.

²¹Hamath kahdok Riblahlei ongpai jom kü üp, hatü jütük. Hanangkü Judah am laophülei kahdok leipü wüpküpei dai.

²²Babylon am Nebukadnezzari Ahikamei cheha, Shaphanei chehü, Gedaliah Judah kü governor vaiyei tuh, hatü büpai Babylonei müei nedeipü shennyakthü kü veihen dou shuohteke.

²³Mechem Judah am lakchongbüthü, hatü Babylon am touei shakei nevampü veshanthüi Gedaliah-i governor vaihen Babylon ongpai jeteke shei danpa, jomi Mizpahlei Gedaliah touei pei; jomphongü Nethaniahlei cheha Ishmael, Kareahlei cheha Johanan, Netophah leipü Tanhumethlei cheha Seraiah, hatü Maakahlei cheha Jaazaniah hatü jomei shennyakthü shiüteke.

²⁴Gedaliah-i hathü hatü jomei shennyakthü kü lah-ei, “Babylon am lakchongbüthü kü tenyem; hapa kahdokei nyutuh, hatü Babylon ongpa chongphotuh, hatü meheyao nevai-i meishi-üng nyushasha hih” shei büpai eteke.

²⁵Shejao hapa bong len nyetpabü kü Nethaniahlei cheha, Elishamalei chehü Ishmael, ongsha ongshem kübü shennyak hük, büpa mü shennyak an mütü Mizpahlei heih-ei Gedaliah jü, hatü Mizpahlei büpa mü nyupü Judah hatü Babylon am jütükkem.

²⁶Hahepak kü Israel am shemmei, taoha, veshan lakchongbüthü peü Babylon am kü nyemei Ijiplei yiüdaikem.

²⁷Judah am Jehoiakin ongpa wüpküpei küpshi nyupü bong hapüanpünyetpabü len anpünyi, nyih hapünyetpabü kü Evil-Merodakh-i Babylon kü ong vaiyei chongpangpü bong Judah am Jehoiakin ongpa khoklat leipü veteke.

²⁸Büpai büpa kü shinshangei dük, hatü Babylon wüpküpei nyupü ongthü peü mü büpa kü dhüm kohpü uoshing shaopü shuoh.

²⁹Hanangkü Jehoiakini khoklatei owpü ow tuhtüktü aopü büpalei nyihthü kemei kü ongpalei nükdülei chengei hahying.

³⁰Nyihjeih ongpai Jehoiakin kü büpa nyupü thahshi hahying shuoh.