Read Phom Naga 2 ONGPATHÜ 3 Bible Online

2 ONGPATHÜ 3 - Phom Naga bible

2 ONGPATHÜ 3

¹Judah kü Jehoshaphati vanglem lempü bong anpüshetpabü kü Ahabei cheha Jehorami Israel kü ong vai, hatü büpai Samarialei bong anpünyi vanglem lem.

²Büpai chenyü hi chepa nyi shük nevaijao mehe SHEMBÜPA touei mang nyu, büpai ha dük. Büpai chepai lingpü Baal kahvangei lajeithü yaktük.

³Shejoongpa büpai Nebatei cheha Jeroboamei mang mepai Israel am mang thahhü, hapa mang kübü büpa neyan.

⁴Shaang Moab amei Mesha ongpai mi haümteke hatü Israel ongpa kü miha 100, 000, hatü mi 100, 000 kübü mimum japei bom shuohhamteke.

⁵Shejao mechem Ahab ongpa didaipa, Moab ongpai Israel ongpa khüei yaong.

⁶Hanangkü hahepak kü-üng Jehoram ongpai Samaria leipü daiyei Israel am peü thaihü.

⁷Büpai Judah am Jehoshaphat kao hapa shahjang shom: “Moab ongpai ngei khüei yaongnyüke; Moab am mü hoknüng nüng ngei mü daikü-üla?” shei e. Büpai jangei, “Ngei daikahen; Ngei nüng mü nyüpeih, ngelei nanglakthüyü nüngei nanglak, hatü ngelei koyeithüyü nüngei koyeithü” shei e.

⁸“Melemei daiyei ham hokhenang?” shei phe. Büpai, “Edom jahpan homei heihkei” shei e.

⁹Hanangkü Israel ongpa, Judah ongpa hatü Edom ongpa shei layaongei dai, hatü mechem jomphongi nyih nyet shinei daipa, veshanthü hatü jom mü nyupü yemhimakthü shing yung neshiüi kemdai.

¹⁰Israel ongpai, “Mekei yahhenang! SHEMBÜPAi jen jemü Moab amei lak kü shuohtüknüng nyükpü hiang?” shei e.

¹¹Shejao Jehoshaphat ongpai, “Jeni SHEMBÜPA kü phehen shingvaishi SHEMBÜPAlei thibü hükao nenyupü je?” shei phe. Hahepak kü Israel ongpalei lakchongbü hüki, “Elijahlei lak kü yung cheihampü Shaphatei cheha Elisha halei nyüke” shei e.

¹²Jehoshaphati, “Büpayü hingshangpü thibü hih” shei e. Hanangkü Israel ongpa, Jehoshaphat, hatü Edom ongpa jom jemphen Elisha touei yiüteke.

¹³Elisha-i Israel ongpa kü, “Ji aa kü eteihen mehe nyüpa? Anyü hi ampa ami pheteihampü thibüthü kü daiyei phehahtuh” shei e. “Nevaipih! shei Israel ongpai jangei e; mehenangkü Moab am kü shuohtüknüng shei ongthü ham jem kü nyükpeyü SHEMBÜPA hih” shei e.

¹⁴Elisha-i, “Ngei chongphopü SHEMBÜPAlei men kü vangei enyeih, Judah am Jehoshaphat kü ngei dhüm neshuohlangmeyü ngei nüng kü veiyao nevaihah shepeih, hatü nüng nyüpeih shei nedeihhen.

¹⁵Shejao shaang ngei touei kesho lokbü hük deikei” shei e. Mechem kesho lokbüi harp vüngei kesho lokpa, SHEMBÜPAlei ngan Elisha kü pei,

¹⁶hatü büpai, “SHEMBÜPAi hapakei enyüke: ‘Hapa kahji maei kahsha shotuh.

¹⁷Mehenangkü SHEMBÜPAi hapakei enyüke: Amphongi vanglük nevaijü vangao ne-eepih, shejao hapa kahji maei yung chongkahen, hatü am, hatü ammei mohohthü hatü lebü yemhimakthüi yung changshi yinghen.

¹⁸Hapayü SHEMBÜPA shingvaishi ahshi-üng douyo; büpai Moab amao ammei lak kü shuohhen.

¹⁹Ammi penyü showlangpü chingnyüthü hatü longpü jilathü peü hah-aokhen. Ammi betjük pü meipüthü peü agtükhen, yunglokthü peü dohtükhen, hatü kahcheü kohpü kahthü peü kü yaong thaiyei shüngtükhen’ ” shei e.

²⁰Nepphei, nepnüng moila shuohpü hepak kü ngangahük kü Edom phi leipü yung yenei sha, hatü kahdok kü yungi mateke.

²¹Mechem Moab ami jom khüei hokhen shingvaishi ongthü aongkünyükeja shei danpa, hashih kübü behe thahshi lahhilaong noaokpüthü peü nyükei thaitü viong lem kü showteke.

²²Mechem jomphong nepnüng lomi paojapa, vanghe-i yung kü khang, hatü iyshüm kei hakpüh-i eeteke.

²³“Hapayü iy khih! Hathü ongthüyü jom jom hokei hüki hük jüteipü vaaishang. Jen Moab am, jomei douthü yahnüng heihshah” shei jomi eteiteke.

²⁴Shejao mechem Moab ami Israel amei baümtapei heihjapa, Israel am vamei jom jü, hatü jom nyaiyei leidai. Israel ami nedoh-i Moab kahdokei changei daiyei jom jüteke.

²⁵Jomi chingnyüthü peü mangtük, shennyak ieyei yaong homei shükpai kah meipüthü peü yaongi matük. Jomi yunglok peü dohtük, hatü betjük pü meipüthü peü agtük. Shomshi Kir-Hareseth chingnyü kübü bham mon nelaamtüki ao, hatü nyeilah kappüthü peiyei shintü hapa chingnyüao hahtük.

²⁶Mechem Moab ongpai hapa vehok kü büpa mahhen khih shei nyingpa, büpai büpa mü yanlu nopü veshanthü jom kho nyet mütü Edom ongpa touei bhaoei vamhen khe, shejao neaok.

²⁷Hahepak kü büpa jeiyei ong vaihen nyupü cheha hashongpa yah-ei jütü chingnyü bham shangkü Moab kahvang kü jakpü moila shuoh. Israel am kü longi nyempü pei hatü jomi nyokei jomei kahdok yemei leidai.