Read Phom Naga 2 ONGPATHÜ 4 Bible Online

2 ONGPATHÜ 4 - Phom Naga bible

2 ONGPATHÜ 4

¹Shaang thibüthü khong kübü shennyak hükei nyüha hük peiyei Elisha kü, “Nüng chongphobü ngelei baha didaiteke, hatü büpai SHEMBÜPA kü nyemshi nyupü nüngi nyingei nyüke. Shejao shaang hami hang shemshuohhen nyupü shennyak peiyei ngelei hapeü nyi hapa hang kü khaplükei aa vainüng yahlanghen enyüke” shei thepei e.

²Elisha-i pinnyü kü jangei, “Ngei nüng kü mehe dükphahenang? Nüngei shemei meheyao nyüla eshih?” shei phe. “Haümdük maanpü hükei olive mainga ajüki tuhpü mü lenei lebü meheyao neshiüpih” shei e.

³Elisha-i pinnyü kü, “Daituh, nüngi aokpü thahshi chingnyüthü leipü dük kong yüei leikei.

⁴Hapheikü shemongei shütü anhapeü amphongi sha küptuh, hatü dükthü kü mainga shih-ei chongpangtuh. Maküpüthü peü hengei sheemtüktuh” shei e.

⁵Hanangkü pinnyüi büpa tuhphongtü shemongei shütü pinnyü hatü cheha nyi-i sha küp. Cheha nyi-i dükthü deijashingkü pinnyüi mainga shih khan shihteke.

⁶Mechem dükthü makempa, pinnyüi cheha kü, “Lebü dük deikei” shei e. Shejao büpai pinnyü kü, “Hajük kü dük kong neshiü” shei e. Hahepak kü mainga yenpü dohdai.

⁷Pinnyüi vamei Elisha thibü kü ha jung eja, hatü büpai pinnyü kü, “Daiyei ha mainga yutuh, hatü hang shemtüktuh, hatü hapa aopü lopi anhapeü amphongi hahshi nyuaokhen hih” shei e.

⁸Nyih hük Elisha Shunam homei daishingkü halei shemmeila hük nyu. Pinnyüi büpa kü bhaong hahtü daituh shei nyeanteke. Hanangkü mechem büpa halei peihenshang büpai halei bhaong hahtü daihamteke.

⁹Pinnyüi chepaha kü, “Veihümao, düngei jenei shem lemei peih-ei laongteiküpü shennyakü Kahvang shennyak khih shei nyingnyüke.

¹⁰Jenei shem jaandokei büpa shing dungnuk hük lingshuohshah, hatü halei lüng hük, haüdü hük, uoshing hük, hatü awdük hük tuhshuohshah. Mechem büpa jenei peihenshang büpa halei nyempaümtei” shei e.

¹¹Mechem nyih hük büpa Shunamei peipa, büpai hapa dungnukei aongei nyiumeiyei lemshi nyu.

¹²Büpai laophülei chongphobü Gehazi kü, “Hapa Shunam lanyü kü nyükeishuoh” shei e. Hanangkü büpai pinnyü nyükei dei, hatü pinnyü büpa touei yaong.

¹³Elisha-i büpa kü, “Nüngi henjilei nadang peü kü sheüh-ei hanghi longi vaiteke. Hanangkü ha nangjeiyei nüng kü mehe dükphahenang? Nüngei men kü ham daiyei ongpa kü nevaijü veshan mübü kü shah hük etükkahen hiang shei eyeishuoh” shei e. Pinnyüi jangei, “Ngei ngelei nanglakthü mü nyunyüpeih” shei e.

¹⁴Elisha-i Gehazi kü, “Pinnyü kü mehe dükshuohjü meihenang?” shei phe. Gehazi-i, “Jomü hapeü neshiü, hatü chepahayü viüdaiteke” shei e.

¹⁵Büpai, “Pinnyü kü nyüktuh” shei e. Mechem büpai pinnyü kü nyükshuohpa, pinnyü peiyei yaong.

¹⁶Elisha-i pinnyü kü, “Ngüvang shaangkei yeshang hük paümshi nyuhen hih” shei e. Pinnyüi, “Nevai, ngelei shembü, nüngei chongphobü kü shahshem te-epha; Oh nüngü Kahvang shennyak hük khih!” shei e.

¹⁷Elisha-i pinnyü kü epü keiha hapa nyüha büm nekongi lei, hatü vangphei hapa hepak kü jiüshi pinnyüi yeshang hük angteke.

¹⁸Hapa naü longei nyih hük hah vetpüthü mü nyupü chepa touei heihteke.

¹⁹Büpai chepa kü, “Shangjing kü tüngangke! Shangjing kü tüngangke!” shei e. Chepai chongphobü hük kü, “Naü chenyü touei leijatuh” shei e.

²⁰Hapa chongphobüi hapa naü chenyü touei poh-ei lei, hatü pinnyüi hapa naü haümhahphei thahshi shüngdok shangei paümshi nyushi ha naü didai.

²¹Pinnyüi hapa naü Elishalei dungnukei paümei anei lüngei lemtü sha küpphongtü lüdai.

²²Pinnyüi chepaha kü nyüktü, “Ngei Kahvang shennyak Elisha thibü touei lomi heihtü leikününg chongphobü hük gadu mütü leishih” shei e.

²³Büpai, “Shinnyih-ü mehekei büpa touei heihhenang? Shinnyih-ü Lenja Mo nyih-ao nevai, nevaijü Sabbath nyih-ao nevai” shei e. Pinnyüi, “Meihen” shei e.

²⁴Pinnyü gadu dok shangei uotü chongphobü kü, “Ngei mange thahshi gadu shülangi mokhen ngangtuh, youngmü tekamkei” shei e.

²⁵Hanangkü layaongei daiyei Elisha nyupü Karmel Kahshang ngoi. Mechem büpai tailuei pinnyü heihjapü eepa, Kahvang shennyak Elisha thibüi büpalei chongphobü Gehazi kü, “Veihümao, antolei Shunamlanyü peikünyüke.

²⁶Pinnyü mü pongteinüng mokei heihtuh, hatü nüng, ampaha hatü naü am peü meishi-üng nyüpa yo? shei pinnyü kü phetuh” shei e. Pheshingkü, “Peü-üng meishi nyüpeih” shei pinnyüi e.

²⁷Mechem pinnyüi kahshangei Kahvang shennyak ngoipa, pinnyüi büpa touei aümei shatü büpalei la kü shongteke. Gehazi-i pinnyü hungei deitüknüng shei heih, shejao Kahvang shennyak Elisha-i, “Pinnyü hapakei nyemnyu! Pinnyü shahyaki mongshangnyu khih; SHEMBÜPAi ngei kü ha jung ne-epha-i jolangpü khih” shei e.

²⁸Hahepak kü pinnyüi büpa kü, “Ngei nüng kü hapeü yahshih shei yüphüla, ngelei shembü? Ngei angkü monglemhen mü shahshem te-epha shei ngei nüng kü ela?” shei e.

²⁹Büpai Gehazi kü, “Shünglok loktuh hatü ngelei lenshuoh notü leituh. Lemei nüngi mih heüjü shah eteiyei tenyu; mih-i nüng kü hangphüjü shah teleitei. Ngelei lenshuoh hapa naüei dhe kü haüeishuoh” shei e.

³⁰Hahepak kü naüei chenyüi, “Vanyangyem SHEMBÜPAlei men kü hatü nüng kü vangei enyeih, ngei nüng tuhtü neleipih” shei e. Hanangkü büpa layaongei pinnyü phei müei lei.

³¹Gehazi-i shelei leiyei naüei dhe kü lenshuoh haüshuoh, shejao ngeü nevam, hatü yem neleipü leipü meheyao nenying. Hanangkü Gehazi-i Elisha mü pongteinüng nyokei leiyei, “Hapa naü-ü nepaonyu” shei e.

³²Mechem Elisha shem ngoipa, büpa monha dungnukei aongjashingkü naü-ü lüngei diyei lemshi chongjateke.

³³Büpai jiji mon shemong lemei sha küptü Kahvang kü phop,

³⁴hatü büpa lüngei aongtü naüei ju kü ju, mük kü mük, lak kü lak jiüei chetei lemteke; hajük kü naüei büm shaamei pei.

³⁵Elisha-i lüng leipü shüh-ei dungnukei kam-aong kamsha lingleiyei nyutü shao lüngei aongtü hapa naü kü chetei lemteke. Hapa naü nyetpa thahshi hahshü shü, hatü büpalei mük vam.

³⁶Elisha-i Gehazi kü nyüktü, “Shunamlanyü kü nyükeishuoh” shei e. Hanangkü büpai pinnyü kü nyük. Mechem pinnyü peijapa, “Anha yahlangtuh” shei e.

³⁷Pinnyü shem mongei shüei büpalei la tüngei kahdokei aümei sha. Hapheikü pinnyüi cheha mütü vamei dai.

³⁸Mechem Elisha Gilgalei nyokei leipa, halei kahmük kü shaühile nyuteke. Mechem thibüthü büpa mü uoshi nyupa, büpai büpalei chongphobü kü, “Düknyü longpü hük chantuh, hatü hathü thibü khong shingvaishi hao baüei cheütuh” shei e.

³⁹Jomphong khongkü hüki kahlei hao baününg daiyei meheshangkü nenyingi leü nemeipü phenlak dunghaüm maei baüei leiyei vettü cheüteke,

⁴⁰hatü hahhen shingvaishi hanei kü bheih-ei shuoh, shejao mechem jomphongi ha hahpa, jomphongi lenei, “Oh Kahvang shennyak Elisha, hapa dükei dibenüng leü cheüei nyüke!” shei e. Hanangkü jomphongi ha nehah-aok.

⁴¹Elisha-i, “Ngei kü atta maani deikei” shei e. Büpai hapa yah-ei dük mongei shihtü, “Shennyakthü kü hapa nyemhahnüng bheih-ei yahjatuh” shei e, hatü hapa dük mongei meheyao ten nenyu.

⁴²Baal-Shalishah leipü shennyak hüki Kahvang shennyak Elisha kü shongpü betjük kübü barley aungi lingpü aanpha kukha, hatü aungjük ja bhagei peiteke. Elisha-i, “Shennyakthüi ha nyemhahnüng yah-eishuoh” shei e.

⁴³“Shennyak kho hük kü ha mekei shuoh-aokhen?” shei büpalei chongphobüi e. Shejao Elisha-i jangei, “Shennyakthüi ha nyemhahnüng yah-eishuoh. Mehenangkü SHEMBÜPAi hapakei enyüke: Jomphongi hahtü shao maani aohen hih” shei e.

⁴⁴Hanangkü büpai jomphong kü ha bheih-ei shuoh, hatü jomphongi ha hah, hatü SHEMBÜPAi epü keiha maani aoteke.