Read Phom Naga 2 ONGPATHÜ 6 Bible Online

2 ONGPATHÜ 6 - Phom Naga bible

2 ONGPATHÜ 6

¹Shaang thibüthü khongi Elisha kü, “Veituh, hamphong nyupü shingü hamphong shingvaishi ahshi-üng shoshipangke.

²Hamphongü Jordanei daishah, hatü ham peü shingvaishi pü hükbaong agei ham nyuhen shing linghahshah” shei e. Elisha-i, “Hapakei dükhahtuh” shei e.

³Hahepak kü jomphong khongkü hüki, “Nüngao chingmeilemlingei nüngei chongphobüthü mü daikütuh” shei e. Elisha-i, “Ngei daikahen” shei e,

⁴hatü büpa jomphong mü dai. Mechem jomi Jordan ngoipa, pü agei pangteke.

⁵Jomphong khongkü hüki pü agei nyushingkü ay laoei yung mongei hingdai. “Oh ngelei shembü! Hayü mih-ei ay yüpeih” shei lenei e.

⁶Hahepak kü Kahvang shennyaki, “Hayü melemei vüdaipa?” shei phe. Büpai büpa kü shing hushuohshingkü Elisha-i lüng hük langei hatouei shükteke, hatü hapa ay bhongei vam.

⁷Büpai, “Hapa ay homtuh” shei e. Hanangkü büpai lak lüei heih-ei hapa homei yah.

⁸Shaang Aram ongpa Israel am mü hokei nyu. Büpai laophülei lakchongbüthü mü shah shetteitü, “Hapa keipü shingkü ngelei baümtap vehen” shei e.

⁹Shejao Kahvang shennyak Elisha-i Israel ongpa kü shah shomei, “Hapa lem homei nedaihen lituh; mehenangkü Aram am ha lemei show uoshi nyüke” shei e.

¹⁰Hanangkü Kahvang shennyaki epü lemei nyupü shennyakthü kü Israel ongpai thashimashi nyuhen eshuohteke. Hepak ieshi Elisha-i ongpa kü hapa keipü shingthü kü lishi nyuhen shahvüng shuoh.

¹¹Hanangkü Aram ongpa longi mongshang. Büpai büpalei lakchongbüthü nyükei, “Jenphong khongkü Israel ongpa philei üpa nyüpa ekütuh” shei e.

¹²Büpalei lakchongbüthü khongkü hüki, “Ngelei shembü ongpa, üpaao neshiüpih. Hapayü Israelei nyupü Elisha thibü, büpai Israel ongpa kü nüngi shinshingei epü shah-ao eshuohnyu khih” shei e.

¹³Ongpai, “Daituh, büpa melei nyupüshang yemtuh; ngei shennyak shomei büpa yephen hih” shei e. “Büpayü Dothanei nyükeja” shei shah-om koei lei.

¹⁴Hanangkü büpai koyeithü, koyei kharithü, hatü veshan longi halei shom. Jomi nyak kü heih-ei hapa chingnyü shonteke.

¹⁵Mechem Kahvang shennyak Elishalei chongphobü nepnüng lomi paojapa, veshanthüi jomei koyeithü, hatü koyei kharithü mütü chingnyü shonlangtü nyu. Büpalei chongphobüi, “Oh ngelei shembü, mekei yahhenang?” shei e.

¹⁶Elisha-i, “Nüng tenyem” shei e. “Jomphong mü nyupü meyü ji mü nyupüthü-üng nyeishi nyüpeih” shei e.

¹⁷Hahepak kü Elisha-i, “Oh SHEMBÜPA, büpaiyao nyem-eenüng büpalei mük apeishuoh” shei phop. Hanangkü SHEMBÜPAi chongphobülei mük apshuoh, hatü büpai veishuoh shingkü kahshangei koyeithü hatü koyei kharithü aw keiha Elisha shonei eeteke.

¹⁸Mechem Aram am büpa touei yiüjapa, Elisha-i SHEMBÜPA kü phopei, “Hathü shennyakthülei mük phüngtüktuh” shei e. Hanangkü Elisha-i phepü keiha büpai jomphongei mük phüngtük.

¹⁹Elisha-i jomphong kü, “Hapayü lem nevai, hapayü chingnyü lem nevai, ngei pheikü mükei, hatü amphongi yempü shennyak touei ngei amphong müei deihen” shei e. Hatü büpai jomphong Samarialei müei dei.

²⁰Jomphong Samarialei shühinüng Elisha-i, “Oh SHEMBÜPA, jomi nyem-eehahnüng jomei mük apeishuoh” shei phop. Hahepak kü SHEMBÜPAi jomei mük ap, hatü veishuoh shingkü jomphongü Samarialei chongjateke.

²¹Mechem Israel ongpai hathü eepa, büpai Elisha kü, “Opa, ngei hathü jütükshah nyu? Ngei hathü jütükshah nyu? shei phe.

²²Büpai, ‘Tah’ shei e. Nüngi hathü jühen mü nüngei yannah-i nevaijü lahhilaongi omei leipüthü je? Jomphong kü hahying shuohtuh, hatü jomi ha hahtü jomei shembü yemei nyemlei” shei e.

²³Hanangkü büpai jomphong kü mo longpü hük tem; jomphongi mo hah-ei tempheikü büpai jomphong leishih, hatü jomphong jomei shembü yemei lei. Hajük kü Aram am Israel kahdokei nehoki doh.

²⁴Hepak kanja daipheikü Aram ongpa Ben-Hadadi büpalei veshanthü longi thaitü peiyei Samaria shümteke.

²⁵Hapa shojung kü chingnyü kü aeipülepü longpü nyu; hapa ching shümpü hepak luangi nyupü nangkü hahying nedangi gadu hükei shangjing hük kü lop büali hatü lihaovang pua hük kü lop nga kü yuteihamteke.

²⁶Shaang Israel ongpa chingnyü bham shangkü kamei nyushingkü nyüha hüki büpa kü lenei, “Ngelei shembü ongpa, ngei kü sheühshih!” shei e.

²⁷Büpai, “SHEMBÜPAi nüng kü nesheühpheikü ngei nüng kü mekei sheühphahen? Hah tenshing leipü hi yiü bhitshing leipü sheühphahen?” shei e.

²⁸Ongpai pinnyü kü, “Nüngei shanghah meheang?” shei phe. Pinnyüi jangei, “Hapa nyühai ngei kü, ‘Shinnyihpa nüngei ha jühahnüng yahkütuh; ngenyih ngelei ha jühahshah’ shei eküpeih.

²⁹Hanangkü henjinyi-i ngelei hapeü jüei hahtükpeih. Nyihphei ngei pinnyü kü, ‘Ji-i jühahhen anha yahkütuh’ shei eshuohjü pinnyüi cheha jotükteke” shei e.

³⁰Mechem ongpai hapa nyühalei shahthü danpa, büpai laophülei büm-ow shaak, hatü bham yopailei nyupü shennyakthüi büpayü büm-ow mongei dhoila-i thüngpü ow yahshi eeteke.

³¹“Shinnyihüng ngei Shaphatei cheha Elishlei shangjing nedakjema, Kahvangi ngei nyemjütük” shei büpai e.

³²Hanangkü büpai Elisha touei shennyak hük deishihteke. Hahepak kü Elishayü büpalei shemei uoshi nyu, hatü büpa mü behethüao uoshi nyu. Deishihpü shennyak ngoishekü Elisha-i behethü kü, “Hapa shennyak jüteipü shennyaki ngei jühen shei shennyak shompü amphongi nyingla? Mechem hapa shennyak ngoikahen ngei kü sha küpshih, hatü büpa mongei teshüpha. Ongpaao büpa phei müshi peikahen” shei e.

³³Büpai hapa jom mü etei-i nyushi ongpa büpa touei peiyei, “Hapa shanghah-ü SHEMBÜPA leipü peipeih! Hajük thahshi mehekei ngei SHEMBÜPA kü monglemei danhenang?” shei e.