Read Phom Naga 1 SHÜPPÜKENGPÜ 11 Bible Online

1 SHÜPPÜKENGPÜ 11 - Phom Naga bible

1 SHÜPPÜKENGPÜ 11

¹Israel am peü Hebronei David touei thai hatü büpa kü, “Hamphongü nüngei iy hatü phai.

²Peihdaipü nyih kao mechem Saul ong vaipa, nüngi Israel nanglak vehokei müei daipeih, hatü SHEMBÜPA, nüngei Kahvangi nüng kü, ‘Nüngi ngelei Israel nanglakthü mi yombü vaihen, hatü nüngi jom kü vanglem lemhen shei epeih’ ” shei eteke.

³Mechem Israel am behethü peü Hebronei David touei peipa, büpai Hebronei jomphong mü SHEMBÜPA touei vangpüshuwpü ling, hatü Samuel homei SHEMBÜPAi lahpükei Israel kü ong vaihen shingvaishi jomphongi David thiteiphuei je.

⁴David hatü Israel am peü Jebus sheiyao epü Jerusalemei heih.

⁵Halei nyupü Jebus ami David kü, “Nüng ha mongei teshükei” shei e. Shejoongpa Davidi Zion penyüsha kaamei yah hatü ha kü “David Chingnyü” shei nyük.

⁶Davidi hathü kü, “Üpai shongei Jebus am jühenshang, büpayü veshan kü longpü hatü mübü vaihen” shei etüktü nyu. Zeruiahlei cheha Joab shong aongei jü hatü mübü leiteke.

⁷Davidi penyüsha touei shem vetü nyu, hatü hapa kü “David Chingnyü” shei nyük.

⁸Kahshang kü heongphi kü kahdok shaokpü Millo shing kübü pangei büpai chingnyü ling hatü Joabi aopü chingnyüthü lingei lei,

⁹hatü Davidü nyeinya wong kohpüba lei; mehenangkü SHEMBÜPA büpa mü haoshi nyu.

¹⁰Hathüyü SHEMBÜPAi Israel am nangkü epü shah keiha David ong vaihühen shingvaishi büpalei ongching kü wong kohshi sheühpü veshan longpüthü hatü Israel nanglakthü nyüke.

¹¹Hapayü Davidei wong kohpü veshanthü jung nyangpü nyüke: Jashobeamü Hakhmoni am phang kübü “Jem” khongkü mübü nyuteke. Büpai laophülei phungi shennyak kho jem shan hük kü jü.

¹²Jem khongkü nyipabü Ahoh am Dodolei cheha Eleazar nyu.

¹³Philistia am hoknüng hatouei thaiyei nyushingkü büpa David mü Pas-Dammimlei nyu. Shaang barley hah mon maei nyupü kah hük nyu; Philistia am kü nyemei veshanthü nyaidai.

¹⁴Shejao büpa hatü David nyi hapa kah jiamei show lingtü Philistia am jü, hatü SHEMBÜPAi aokpü longpü danghüei yangteke.

¹⁵Philistia veshanthü Rephaim kahjilei baümtap vetü nyupü hepak kü veshan longpü hapüan khong kübü jom jem Adullam yaongsha yopai leipü David nyupü yaongnyü touei yiü.

¹⁶Hahepak kü Davidü pe showtükpü kahshangei nyu, hatü Philistia amü Jerusalemei küpshi nyu.

¹⁷Davidi yahyangei, “Oh, hanei ami Bethlehem penyüsha yopai leipü yungkuk leipü yung yinghen yahphülangmeyo!” shei e.

¹⁸Hanangkü veshan jom jemi Philistia amei show benei shüei Bethlehem penyüsha yopai leipü yungkuk leipü yung shoei David touei leijateke. Shejao büpai ha nenyingi SHEMBÜPA kü moila vaishi langteke.

¹⁹Büpai e, “Ngei ha yinghenü Kahvangi nemongnyih; ngei ha yingjema hapa leihen nangkü yangnyu lanei shuoh-ei daipüthülei iy yingpükei vamhen khih. Davidi ha neying; mehenangkü hathüi ha leihen yangnyu lanei shuohpeih. Veshan jom jemi hapa dou dükteke.”

²⁰Joabei chenaü Abishaiyü jom hapüan khongkü longpü nyu. Büpai phung mon notü shennyak kho jem mü hok hatü hathü jüteke. Hanangkü büpayü “Jem” keiha men-e lei.

²¹Büpayü “Jem” mao nyeinya men-e lei, hatü jomphongei mübü vaiteke; shejao büpa “Jem” mü omei nenyu.

²²Kabzeel leipü Jehoiadalei cheha Benaiahyü men-e veshan hük nyu; büpai dou longpü dük; büpai Moab am veshan meipü nyi jütük. Büpai shü vüpü nyih kü kahshalei shüei mailang hük jü.

²³Shao büpai Ijip am shennyak hük feet nyet mü bhaoei nyupü jü. Hapa Ijip naühalei phungü miyaung kei nyulangmao Benaiah-i lenshuoh mon notü büpa jütük. Büpai hapa Ijip naühalei phung aetei yahtü büpalei phungi-üng hümei jü.

²⁴Hathüyü Jehoiadalei cheha Benaiah-i dükpü douthü; büpayao wong kohpü shennyak “Jem” keiha men-e lei,

²⁵shejao “Jem” kei payü nethü. Davidi büpayü büpalei bümyom veshan vaishi tuh.

²⁶Wong kohpü veshanthüyü Joabei chenaü Asahel, Bethlehem leipü Dodolei cheha Elhanan,

²⁷Harod am Shammoth, Pelon am Helez,

²⁸Tekoa leipü Ikkeshlei cheha Ira, Anathoth leipü Abiezer,

²⁹Hushath am Sibbekai, Ahoh am Ilai,

³⁰Netophath am Maharai, Netophath am Baanahlei cheha Heled,

³¹Benjamin kahdok Gibeah leipü Ribailei cheha Ithai, Pirathon am Benaiah,

³²Gaash Kahjilei leipü Hurai, Arbath am Abiel,

³³Baharum am Azmaveth, Shaalbon am Eliahba,

³⁴Gizon am Hashemei hapeüthü, Harar am Shageelei cheha Jonathan,

³⁵Harar am Sakharlei cheha Ahiam, Urlei cheha Eliphal,

³⁶Mekerath am Hepher, Pelon am Ahijah,

³⁷Karmel am Hezro, Ezbailei cheha Naarai,

³⁸Nathanei chenaü Joel, Hagrilei cheha Mibhar,

³⁹Ammon am Zelek, Beroth am Naharai, Zeruiahlei cheha Joabei lahhilaong kobü,

⁴⁰Ithri am Ira, Ithri am Gared,

⁴¹Hit am Uriah, Ahlailei cheha Zabad,

⁴²Reuben am Shizalei cheha Adina; büpayü Reuben amei mübü nyu; büpa mü hapüan thahshi nyu,

⁴³Maakahlei cheha Hanan, Mithni am Joshaphat,

⁴⁴Ashterath am Uzzia, Aroer am Hothamei cheha Shamma hatü Jeiel nyi,

⁴⁵Tiz am Shimrilei cheha Jediael hatü Joha nyi,

⁴⁶Mahavah am Eliel, Elnaamei cheha Jeribai hatü Joshaviah nyi, Moab am Ithmah,

⁴⁷Mezoba am Eliel, Obed hatü Jaasiel hathü nyuteke.