Read Phom Naga 1 SHÜPPÜKENGPÜ 15 Bible Online

1 SHÜPPÜKENGPÜ 15 - Phom Naga bible

1 SHÜPPÜKENGPÜ 15

¹David Chingnyülei Davidi laophü shing shem veyei tempheikü, büpai Kahvangei Vangpüshuwpü Pela tuhhen shing hük ling, hatü hapa shing ashakshem hük ve.

²Hapheikü Davidi, “Üpaiyao nevai, shejao Levi ami hapa Kahvangei Vangpüshuwpü Pela kohen; mehenangkü SHEMBÜPAi jomü hapa Vangpüshuwpü Pela kohen hatü hapa chongphohen jepeih” shei e.

³Davidi SHEMBÜPAlei Vangpüshuwpü Pela büpai hapa tuhhen shingvaishi lingpü shingei anhen shingvaishi Jerusalemei Israel am kemei thaihü.

⁴Büpai Aaronei hühihathü hatü Levi am chemi nyük:

⁵Kohathlei hühihathü Ariel mübü mü jom shem am 120;

⁶Merarilei hühihathü, Asaiah mübü mü jom shem am 220;

⁷Gershonei hühihathü, Joel mübü mü jom shem am 130;

⁸Elizaphanei hühihathü, Shemaiah mübü mü jom shem am 200;

⁹Hebronei hühihathü, Eliel mübü mü jom shem am 80;

¹⁰Uzzielei hühihathü, Amminadab mübü mü jom shem am 112 nyu.

¹¹Hapheikü Davidi Zadok ngongpa Abiathar, hatü Levi am Uriel, Asaiah, Joel, Shemaiah, Eliel hatü Amminadab hathü kü nyük.

¹²Büpai jomphong kü, “Amphongü Levi phangthü kü mübüthü khih; amphong hatü jempü Levi am küphüthü am nyingi daütüktuh, hatü SHEMBÜPA, Israel Kahvangei Vangpüshuwpü Pela ngei hapa tuhhen lingpü shingei ankei.

¹³Hapayü am Levi ami shelei mebü-üng ne-anpü nangkü SHEMBÜPA, jenei Kahvangi jen khüei mongshih vampeih. Büpai epü lem keiha mekei jeni dükhen büpa kü nephepeih” shei e.

¹⁴Hanangkü ngongpathü hatü Levi ami laophü nyingi SHEMBÜPA, Israel Kahvangei Vangpüshuwpü Pela anhen nangkü daütükteke.

¹⁵SHEMBÜPAlei shah aimü Mosai epü keiha Levi ami Kahvangei Vangpüshuwpü Pela pü shatü bhagchongei paiyei anteke.

¹⁶Davidi Levi am mübüthü kü kesho lokhen nangkü jomei jeihinaüthü jehen hatü lyre, harp hatü cymbal vüngei mongong kesho lokhen e.

¹⁷Hanangkü Levi ami Joelei cheha Heman; hatü büpalei jeihinaüthü Berekhiahlei chenaü Asaph; hatü jomei jeihinaüthü Merarilei hapeüthü, hatü Kushaiahlei cheha Ethan;

¹⁸hatü jom mü nyipabü laphen kübü jomei jeihinaü Zekhariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah, hatü shaden yompü Obed-Edom hatü Jeiel hathü jeteke.

¹⁹Kesho lokbü Heman, Asaph hatü Ethan hathüyü cymbal vünghen;

²⁰Zekhariah, Aziel, Shemiramoth, Jehiel, Unni, Eliab, Maaseiah hatü Benaiah hathüyü Alamoth aimü lyre vünghen jeteke;

²¹hatü Mattithiah, Eliphelehu, Mikneiah, Obed-Edom, Jeiel hatü Azariah hathüyü Sheminith aimü harp vünghen jeteke.

²²Levi am shangjing Kenaniah-ü kesho nyahhai kü khei vai; hapayü büpalei dousho nyu; mehenangkü büpai hapa manei nyu.

²³Berekhiah hatü Elkanah nyiyü Vangpüshuwpü Pela yomhen je.

²⁴Shebaniah, Joshaphat, Nathanel, Amasai, Zekhariah, Benaiah hatü Eliezer hathü ngongpathü peü Kahvangei Vangpüshuwpü Pela touei amit vünghen je. Obed-Edom hatü Jehiah nyiyao Vangpüshuwpü Pela yomhen je.

²⁵Hanangkü David, Israel am behethü hatü haja khongkü mübüthü peü Obed-Edom amei shem leipü SHEMBÜPAlei Vangpüshuwpü Pela mongongshi anhen yiü.

²⁶Mehenangkü Kahvangi Levi am SHEMBÜPAlei Vangpüshuwpü Pela kopüthü kü sheüh hatü jomi mohoh nyet, mi nyet moila shuoh.

²⁷Shaang Levi am Pela kopüthü, kesho lokpüthü, hatü kesho lokpü mübü Kenaniah am keiha Davidi meipü nyemin bhagthuh thuhtü nyu. Davidi nyemin bhagthuh longbenüngao thuhteke.

²⁸Hanangkü Israel am peüi SHEMBÜPAlei Vangpüshuwpü Pela kotü leneiwongei, nyavaung, amit hatü cymbal, lyre hatü harp vüngei anteke.

²⁹SHEMBÜPAlei Vangpüshuwpü Pela David chingnyü penyü mongei shüjashingkü Saulei yiükha Mikhali ümha shaden leipü chiyei vei, hatü mechem pinnyüi David ongpa mongongei phaukteipü eepa, pinnyüi büpa kü mongei eelaei deih.