Read Phom Naga 1 SHÜPPÜKENGPÜ 17 Bible Online

1 SHÜPPÜKENGPÜ 17 - Phom Naga bible

1 SHÜPPÜKENGPÜ 17

¹Davidi büpalei ongshemei uopheikü büpai Nathan thibü kü, “SHEMBÜPAlei Vangpüshuwpü Pela ashakshem hükei tuhphongtü ngeiyü cedar püi vepü ongshemei nyunyu khih” shei e.

²Nathani David kü, “Nüngei mongei mehe deihshi nyu, ha düktuh; mehenangkü Kahvang nüng mü nyüke” shei jangei e.

³Ha ya SHEMBÜPAlei shah Nathan touei peiyei e:

⁴Ngelei chongphobü David kü hapakei heih-ei etuh, “SHEMBÜPAi hapakei enyüke: Ngei nyushing phopshem vehenü nüng nevai.

⁵Ngei Israel am Ijip leipü müei leipü nyih kübü shinnyih thahshi ngei shem hükeiyao nenyuangpih. Ngei ashakshem kü nyupeih, hatü shing hük kübü hük shei kamteiyei nyupeih.

⁶Ngei melei shangkü Israel am mü kamteiyei nyujao ngelei nanglakthü yomhen jepü mübü üpa kü dangkao, ‘Mehekei nüngi ngei kü cedar püi ngei shing shem nevepa?’ shei chemao ephüla?”

⁷SHEMBÜPA Kahvangi hapakei enyüke shei ngelei chongphobü David kü eyeishuoh: Ngei nüngü mi pheikü müshi het üh-ei phaülei nyupü kübü ngelei nanglak Israel am kü vanglem lemhen jepeih.

⁸Nüng melei dai halei ngei nüng mü nyupeih, hatü nüng toueipü nüngei vepathü neütükpeih. Shaang ngei nüngei menü kahdoknyü kü peü mü longpüthülei men kei leihühen hih,

⁹hatü ngei ngelei nanglak Israel am shingvaishi shing hük shuohhen; shejüang jomi jom lompü bükhishem anghen hatü üamiyao nebaoknehenghen. Nemeipü shennyakthüi sheleipü kei hajük kü jom kü neshüveihen,

¹⁰hatü ngei Israel nanglak shangkü mübüthü jehinüng henüng keipü nevamhen. Ngei ammei vepathü peü neütükhen. Anyei vaishi SHEMBÜPAi am shing shem hük vephahen shei ngei enyüpeih.

¹¹Mechem nüng diyei ambü ampa mü mahng vühenshang, nüngei uoshing jeihen shingvaishi ngei nüngei li, hapeüthü khong kübü hük vamhühen hatü ngei büpalei ongching chonglinghühen.

¹²Büpai-üng ngei shing shem vehen, hatü ngei büpalei ong uoshing linghen.

¹³Ngei büpalei pa vaihen hatü büpayü ngelei hapeü vaihen. Ngei ammei bühipathü toueipü ngei bampü yahlangpükei ngei büpa toueipü ngei bampü neyahlanghen.

¹⁴Ngei büpayü ngelei shem hatü ngelei ongching kü den kü tuhhen; büpalei ong uoshing den kü nyuhen.

¹⁵Hapa shakei vamei epü shahthü peü Nathani David kü ejateke.

¹⁶Hahepak kü David ongpai mongei shüei SHEMBÜPA touei uotü phopei e, “Oh SHEMBÜPA Kahvang, nüngi hajük thahshi bamei noteihen mü ngei üpaang, hatü ham shemü meheang?

¹⁷Hatü hajüki yo-ong nechangpükei nüngi nüngei chongphobülei ngoikahen shemong laphen jung eteke, Oh Kahvang, nüngi ngei keyü peü mü longpü shennyak kei nonyüke, Oh SHEMBÜPA Kahvang.

¹⁸Nüngei chongphobü kü nüngi hajük thahshi dhüm hupü kü David, ngei ha mü lenei mehe ekününg? Mehenangkü nüngi nüngei chongphobü nyingei nyüke,

¹⁹Oh SHEMBÜPA, nüngei chongphobülei men kü nüngi mongei deihpü aimü nüngi hapa dou longpü dükteke, hatü hathü lahpü longpüthü peü nyinghüteke.

²⁰Nüng keiha üpayao neshiü, Oh SHEMBÜPA, hatü nüng mü lenei lebü Kahvang neshiü; hathü peü hamei dhaongi danei nyüpeih,

²¹hatü nüngei nanglak Israel am keiha kahdok shak kü jat hük Kahvangi laophü shingvaishi angei leilangpü hatü laophü shing men hük linghen, hatü longpü hatü yashanyale nyembenüng dou dükei nüngei nanglakthü toueipü vepathü changtüktü laophülei nanglak Ijip leipü angei leipükei üam nanglak nyüpa?

²²Nüngi nüngei nanglak Israel amü den shing nüng lompü vailangteke, hatü nüngü jomei Kahvang leiteke, Oh SHEMBÜPA.”

²³Hanangkü shaang, Oh SHEMBÜPA, nüngi nüngei chongphobü hatü jomei shemong nangkü lahpükei den kü ha dükshih. Nüngi lahpükei dükshih,

²⁴shejüang ha linghen hatü nüngei men düngei longpü vaihen. Shejüang shennyakthüi, “Jeiyong SHEMBÜPA, Israel shak kü Kahvangü Israel amei Kahvang khih!” shei ehen, hatü nüngei chongphobü David am shem nüng touei chonglingei nyuhen.

²⁵Ngelei Kahvang, nüngi nüngei chongphobü kü nüngi büpa shing shem hük vehen shei shakei vamei eteke. Hanangkü nüngei chongphobüi monghumei nüng kü phopnyeih.

²⁶Oh SHEMBÜPA, nüngü Kahvang! Nüngi hathü doumei nüngei chongphobü kü lahteke.

²⁷Shaang nüngi nüngei chongphobülei shemong kü moihimanhen mongongei deihteke, hatü hapa düngei nüng touei nyuhen; mehenangkü Oh SHEMBÜPA, nüngi ha moihiman, hatü hapayü den kü moihimanei nyuhen.