Read Phom Naga 1 SHÜPPÜKENGPÜ 19 Bible Online

1 SHÜPPÜKENGPÜ 19 - Phom Naga bible

1 SHÜPPÜKENGPÜ 19

¹Hepak shohük pheikü Ammon amei ongpa Nahash didaitü büpa kü jeiyei cheha ong vaiteke.

²“Ngei Nahashlei cheha Hanun kü bampü huhen; mehenangkü chepai ngei kü bampü hupeih” shei Davidi deih. Hanangkü Davidi shahjang kobü hanei chepa nangkü Hanun kü bampü jung ehen shom. Mechem Davidei shennyakthü heih-ei Ammon kahdok ngoiyei Hanun kü bampü jung ehen peijapa,

³Ammon am longhiongthüi Hanun kü, “Davidi nüng kü bamnyeih shei shennyakthü shomei epai ampa kü dhüm shuohnyeih shei nüngi deihnyu je? Büpalei shennyakthü peipeyü kahdok dokei gühshoukei temtü baoh-ei haitükhen peipeih shei nedeihnyu je?” shei eteke.

⁴Hanangkü Hanuni Davidei shennyakthü yepei sho kuptük, shüngbaong kü jiüei ashak kemei shaaktüktü leishihteke.

⁵Mechem hanei ami David kü hathü nang ejapa, büpai hathü mü pongnüng phongmokbüthü shom; mehenangkü jomphong kü longi veühen mü ne-ienelemi dükteke. Ongpai hathü kü, “Jumum manglu thahshi amphong Jerikolei chongkei; hapheikü mon nyokei leikei” shei e.

⁶Mechem Ammon ami sheyü David mü ve leiteke shei nyingpa, Hanun hatü Ammon ami Dokpa Mesopotamia, Aram-Maakah hatü Zobahlei koyei khari hatü hapa mühen shennyakthü phuoei yahhen shingvaishi ngin dok haja hapüanpüali shom.

⁷Jomi koyei khari hatü hapa mühen shennyakthü haja hapüanpünyi mü Maakah ong mü büpalei veshanthü peiyei Medeba yopailei baümtap ve, hatü Ammon amao ching kübü laoei hokhen vam.

⁸Ha danei Davidi Joabi mütü hokhen veshanthü peü shom.

⁹Ammon amao vamei jomei chingnyü penyüsha touei hokhen show lingei uo, hatü peipü ongthü peü koshoyalei vamei nyu.

¹⁰Ngaümphei shelang kemeilei vepathü show lingdaipü Joabi eeteke. Hanangkü büpai Israel kü peü mü meipü veshan hanei jetü Aram am khüei hokhen show lingei tuhphong.

¹¹Aopüthü kemei chenaü Abishai phang kü tuh, hatü jomphongü Ammon am khüei hokhen show ling.

¹²Joabi hathü kü, “Ngei neaokhen mü Aram am wong kohshi chongküjema, am peiyei ngei kü sheühtuh; amphongi neaokhen mü Ammon am longi wong kohshi chongküjema ngei peiyei sheühphahen.

¹³Amphong wong kohtuh hatü jenei nanglak hatü jenei Kahvang chingnyüthü med kü monglongshi hokshah. SHEMBÜPAi büpa kü mehe mei, ha dükphahen” shei e.

¹⁴Hanangkü Joab hatü büpa mü nyupü veshanthü Aram am mü hokhen heih, hatü hathü büpa toueipü nyaidai.

¹⁵Mechem Ammon ami Aram am nyaidaikemi eepa, jomphongao chenaü Abishai toueipü nyaiyei chingnyü mongei shüdai. Hanangkü Joab Jerusalemei nyokei leidai.

¹⁶Mechem Aram ami Israel ami neülangteke shei nyingpa, jomi Euphrates Yungdangei phongmokbüthü shomei veshanthü müei leiyei Zobah am Hadadezerlei veshan mübü Shophakh phangkü tuhphong.

¹⁷Mechem Davidi hapa jung danpa, büpai Israel am veshanthü thaitü Jordan homei heih-ei jom mü khangteiyei show ling. Mechem Davidi show lingei tempa, büpai jom khüei hok.

¹⁸Shejao Israel am toueipü jom nyai; hatü Davidi koyei khari müpüthü jom haja nyet hatü veshanthü haja pinyi thahshi jü. Büpai veshan mübü Shophakh-ao jütük.

¹⁹Mechem Hadadezerlei ong naü-eethüi jom kü Israel ami neüteke shei nyingpa, jomi David mü chingmei ling, hatü büpa phangkü nyu. Hajük kü Aram ami Ammon am kü sheühhen nemong.