Read Phom Naga 1 SHÜPPÜKENGPÜ 22 Bible Online

1 SHÜPPÜKENGPÜ 22 - Phom Naga bible

1 SHÜPPÜKENGPÜ 22

¹Hanangkü Davidi, “SHEMBÜPA Kahvangei shem hatü Israel am shingvaishi jakpü moila shuohteipü moidüyü hatouei nyuhen vaipü khih” shei e.

²Hanangkü Davidi kung shennyakthü Israel kahdokei nyupü peü thaihü, hatü hathü kü büpai phopshem vehen yaong bhaokei shanghen dou shuoh.

³Büpai peshaden shemshathü kü aphen, hatü hathü nyeanei aphen shingvaishi kojal linghen nyiam shuoh, hatü nyeinya dokhen neaoki melangnyiam shuoh.

⁴Büpai iehen neaoki cedar püthü longi shuoh; mehenangkü Sidon hatü Tyre ami David kü hathü longi shanei shuoh.

⁵Davidi, “Ngelei hapeü Solomonü hashih hatü meheyao mangnying, shejao SHEMBÜPA shing vehen shemü jatthüi veijü müknyinshekhangshi, kahdoknyü kü men-e, hatü nethe meishi vehen vongbong. Hanangkü ngei hapa shing douhinang temhen hih” shei deih. Hanangkü Davidi büpa di shekü longi temeilemei tuh.

⁶Hapheikü büpai cheha Solomon kü nyüktü SHEMBÜPA, Israel Kahvangei shem vehen lanei shuoh.

⁷Davidi Solomon kü e, “Ngelei hapeü, SHEMBÜPA, ngelei Kahvangei men kü shem hük vehen shei ngelei mongei deihshi nyupeih.

⁸Shejao SHEMBÜPAlei hapa shah ngei touei peiyei, ‘Nüngi iy longi yenhüteke hatü vehok longi hokteke. Nüngi ngelei men kü shem nevehen; mehenangkü kahdoknyü kü nüngi ngei touei iy longi yenhüteke.

⁹Shejao nüngi hapeü hük anghen; büpayü chingmei hatü nyiushemmei shennyak hük vaihen, hatü ngei büpa kü lem peü phileipü vepathü touei chingmei shuohhen. Büpalei menü Solomon nyuhen, hatü ngei büpa vanglem lempü hepak kü Israel kü chingmei hatü lakbowlayang meiyei nyuhen shuohhen.

¹⁰Ngelei men kü shem hük vehenü büpa hih. Büpayü ngelei hapeü, hatü negeiyü büpalei pa vaihen, hatü ngei büpalei ongching ong uoshing Israel shak kü düngei chonglingei tuhhen’ shei ephopeih.”

¹¹“Shaang, ngelei hapeü, SHEMBÜPA nüng mü nyutuh, hatü büpai nüngi vehen shei epükei SHEMBÜPA, nüngei Kahvangei shem vehen nüng aokpü danghütuh.

¹²Büpai nüng Israel am shak kü veihen tuhshingkü SHEMBÜPA, nüngei Kahvangei Shahkungnyü jiüshi dükhen shingvaishi SHEMBÜPAi nüng kü yao-aokpü hatü danaokpü kon nyemyahpha.

¹³Israel am shingvaishi Mosa homei SHEMBÜPAi shuohpü shahkung hatü vanglemthü kenhingei dükjema nüngi aokpü danghen. Nüng wong kohtuh hatü monglongtuh. Nüng tenyem nevaijü mongtemaan.”

¹⁴Ngei longi tok yah-ei SHEMBÜPAlei shem vehen shingvaishi hon ton 3, 400, hatü ngin ton 34, 000 dok kü hatü dokei neaoki melangnyiam hatü nyiam, pü hatü yaong thaiyei yowtepih. Nüngi hapa kü ühahte.

¹⁵Nüngei dou dükhen nanglak longi nyüke: Yaong bhaokhenthü, mistrithü hatü lemphü phikü lahhinei dou dükhen shennyakthü;

¹⁶hon, ngin, melangnyiam, hatü nyiam hathü kü dükhen longi nyüke. Shaang dou pangtuh hatü SHEMBÜPA nüng mü nyukahen.

¹⁷Hapheikü Davidi cheha Solomon kü sheühhen shingvaishi Israel am mübüthü peü kü nyük.

¹⁸Büpai jomphong kü, “SHEMBÜPA, ammei Kahvang am mü nenyupü je? Büpai lem peü philei am kü nyiushemmei neshuoh-angpü je? Mehenangkü büpai hapa kahdok kü nyupüthü ngelei lak kü shuohpeih, hatü hapa kahdokü SHEMBÜPA hatü büpalei nanglakthü phangkü nyüke.

¹⁹Shaang, ammei mongdang, laangha kempai SHEMBÜPA, ammei Kahvang yemtuh. Ammi SHEMBÜPAlei Vangpüshuwpü Pela koei leihen hatü SHEMBÜPAlei men kü vehen phopshemei Kahvangei daülangpü douhinangthü leiyei tuhhen shingvaishi daülangpü shem vehen chongpangtuh” shei e.