Read Phom Naga 1 SHÜPPÜKENGPÜ 23 Bible Online

1 SHÜPPÜKENGPÜ 23 - Phom Naga bible

1 SHÜPPÜKENGPÜ 23

¹Mechem David longi behe leidaipa, büpai cheha Solomon Israel kü ong vaihü.

²David ongpai Israel kü mübüthü, ngongpathü hatü Levi am peü chemi thaihü.

³Levi am bong hapüan hatü ha dok kübü ieteke hatü bhei-ie peüshep haja 38, 000 nyuteke.

⁴“Hathü khongkü haja hapüaliyü SHEMBÜPAlei phopshem vepü dousho kü veihen, haja vokü lakchongbü hatü shahphenbüthü vaihen,

⁵haja aliyü shaden yombüthü vaihen hatü haja aliyü ngei hapa nadang shingvaishi shuohpü kesho lokhen hadirthü noshi SHEMBÜPA menvih-ei nyutuh” shei Davidi e.

⁶Davidi Levi am jomei phang aimü khong jem hanteke: Gershon, Kohath hatü Merari.

⁷Gershonei hapeüthü: Ladan hatü Shimei.

⁸Ladanei hapeüthü: Hashongpa Jehiel, Zetham hatü Joel jom jem.

⁹Shimeilei hapeüthü: Shelomoth, Haziel hatü Haranjom jem. Hathüyü Ladan am shemdep kü shangjingthü nyuteke.

¹⁰Shimeilei hapeüthü: Jahath, Zina, Jeush hatü Beriah. Hathüyü Shimeilei hapeüthü jom ali.

¹¹Jahath-ü shongpüba, Zinayü nyipabü shejao Jeush hatü Beriah nyilei hapeüthü longi nenyu. Hanangkü jom keyü shemdep hük shei mon ieteke.

¹²Kohathlei hapeüthü: Amram, Izhar, Hebron hatü Uzzieljom ali.

¹³Amramei hapeüthü: Aaron hatü Mosa. Aaron hatü hapeüthü peü daülangpü douthü daühen, SHEMBÜPA kü moilathü shuohhen, büpa touei chongphohen hatü büpalei men kü moihiman shingvaishi denshing hayaoha khaatei tuhteke.

¹⁴Kahvang shennyak Mosalei hapeüthüyü Levi jat aimü ieteke.

¹⁵Mosalei hapeüthü: Gershom hatü Eliezer.

¹⁶Gershomei hapeüthü: Shongpeyü Shubael.

¹⁷Eliezerlei hapeüthü: Rehabiahyü shongpüba nyu. Eliezerlei lebü hapeüthü nenyu shejao Rehabiahlei hapeüthü longi nyu.

¹⁸Izharlei hapeüthü: Shongpübayü Shelomith.

¹⁹Hebronei hapeüthü: Shongpübayü Jeriah, Amariah nyipabü, Jahaziah jempabü hatü alipabüyü Jekameam.

²⁰Uzzielei hapeüthü: Shongpüba Mikah, nyipabü Isshiah.

²¹Merarilei hapeüthü: Mahli hatü Mushi. Mahlilei hapeüthü: Eleazar hatü Kish.

²²Eleazar-ü yeshang netuh-i didai; büpalei hapeü-ü yiükhathü mon nyu. Jomei chepa naü-eepa Kishlei hapeüthü mü jomphong shem yem.

²³Mushilei hapeüthü: Mahli, Eder hatü Jerimothjom jem.

²⁴Hathüyü Levilei hühihathü phang hatü shemdep lomei lomei peü men shüei nyupü aimü nyüke. Büpalei hühihathü peü bong kukha hatü ha dok kübü SHEMBÜPAlei shemei chongphopüthü nyüke.

²⁵Davidi, “SHEMBÜPA, Israel Kahvangi büpalei nanglakthü kü nyiushemmei shuoh hatü den kü Jerusalemei nyuhen peidaipü nangkü,

²⁶Levi ami hajük kü ashakshem nevaijü halei khümshingkü noteipü douthü koei kamteihen napü neshiü” shei e.

²⁷Davidi eshuohpü keiha Levi am bong kukha hatü ha dok kübü peü ie.

²⁸Levi amei dousho-ü Aaronei hühihathü kü SHEMBÜPAlei shemei dousho kü sheühteihen, chingshe pekon, hatü haleipü dungthü kü veihen, hatü Kahvangei shemei daülangpü douthü daühen hatü lebü douthü dükpü kü sheühhen nyuteke.

²⁹Nükdülei haüpü aan, hahying moila shing tuhpü atta, daw neshihpü aanthü, aan oukpü hatü nyetpü, hatü meshük lushi shethen, meshük longshi dokhen hathü kü veihen dousho nyuteke.

³⁰Jomphongü nepjeih SHEMBÜPA kü menvih shuoh-ei yaonghen nyuteke. Hapa keiha om ieyei kü dükhen,

³¹hatü mechem jakpü moila SHEMBÜPA kü Sabbath nyih, Len ja Mo kü hatü lebü mothü kü shuohhenshang hapakei dükhen nyuteke. Jomü düngei SHEMBÜPA touei bhei-ie jiüshi hatü jom kü epü vanglem aimü chongphohen nyuteke.

³²Hanangkü Levi ami ashakshem, daülangpü shing kü veihen shuohpü dousho keiha SHEMBÜPAlei shemei Aaronei hühihathü phangkü dou dükei nyu.