Read Phom Naga 1 SHÜPPÜKENGPÜ 28 Bible Online

1 SHÜPPÜKENGPÜ 28 - Phom Naga bible

1 SHÜPPÜKENGPÜ 28

¹Davidi Israel am lakchongbüthü peü kü Jerusalemei thaihen nyük: Hanangkü jatthü shak kü lakchongbüthü, ongpa chongphopü khongthü kübü mübüthü, haja hatü kho shak kü mübüthü, ongpalei mop, yemhimak, hapeüthü kü veipüthü, ongshem leipü lakchongbüthü, hampathü hatü veshanthü peü pei.

²Hahepak kü David ongpai yaongtü, “Ngei epü bangtuh, ngelei jeihinaüthü hatü nanglakthü. Ngei Vangpüshuwpü Pela düngei tuhhen, SHEMBÜPA, jenei Kahvang kü phopshing shem hük vehen küpjan deihshi nyupeih; hatü ha vehen nangkü tempülempü nyupeih.

³Shejao Kahvangi ngei kü, ‘Ngelei men kü nüngi shem teve; mehenangkü nüngü hampa, hatü iy longi yenhüpeih’ shei ephopeih.

⁴Shejao SHEMBÜPA, Israel Kahvangi ngelei bühipa shemdep kübü ngei den kü ammei ong vaihen jepü khih; mehenangkü büpai mübü vaihen Judah am je, hatü Judah am kübü opalei shemong je, hatü ham shem khongkü Israel shak kü ong vaihen büpai ngei kü monghahteke,

⁵hatü SHEMBÜPAi ngei kü shuohpü hapeü longi nyupü khongkü büpai Israel shak kü SHEMBÜPAlei ongching ong uoshing kü uohen ngelei hapeü Solomon jeteke.

⁶Büpai ngei kü, ‘Anha Solomoni ngelei shem hatü ngei nyushing vehen; mehenangkü büpayü ngelei hapeü, ngei büpalei pa vaihen ngei büpa jetepih.

⁷Shinnyihpü kei büpai ngelei shahkung hatü vanglemthü jiüshi dükei daijema ngei büpalei ongching den kü chonglingei tuhhen.’

⁸Hanangkü shaang Israel am peüi eeshi, SHEMBÜPAlei nanglakthü thaipü touei, jenei Kahvangi danshi SHEMBÜPA, ammei Kahvangei shahkungthü peü bangtuh; shejüang ami hapa kahdok yah-aokhen hatü am pheikao denshing ammei hühihathü kü mükjüp vaishi tuh-aokhen” shei eteke.

⁹Hapheikü büpai cheha Solomon kü, “Ngelei hapeü, ampalei Pa Kahvang nyingtuh, hatü mong kempai monglempai büpa chongphotuh; mehenangkü SHEMBÜPAi peüei mongdang yemnyeih, hatü büpai deihpü küpjan peü nyingnyeih. Nüngi büpa yemjema, nüngi büpa danghen, shejao nüngi büpa tuhphongjema büpai den kü nüng yakphonghen.

¹⁰Hanangkü nüng kenhingtuh; mehenangkü daülangpü shem hük vehen SHEMBÜPAi nüng jeteke; nüng wong kohtuh hatü dou düktuh” shei eteke.

¹¹Hapheikü Davidi Solomon kü Phopshem shemshom, shembümnyü, dou tuhshing, jaandok dungthü, hatü Longi Daülangpü Shing vehen tempü peü shuoh.

¹²Büpalei mongei phopshem chingshe, hatü shinpü dungnukthü, phopshem leipü dou tuhshing, hatü daütükpü douthü tuhshing nangkü deihshi nyupü peü eshuohteke.

¹³Büpai ngongpathü hatü Levi am khong hanhen, phopshemei chongphohen dousho peü, hatü halei noteipü douthü nangkü nyinghenthü eteke.

¹⁴Hon hi ngin, dükhi-üm linghen nangkü hon meshük yah-ei linghen, hatü ngin meshük linghen;

¹⁵awdük hatü awshong linghen nangkü hon meshük yahhen, ngin meshük yahhen,

¹⁶aan haühen dü linghen kü hon meshük ngin meshük yahhen,

¹⁷hatü haoklak, chilimji, yungdük, hatü dük linghen hon meshük ngin meshük yahhen,

¹⁸hatü ayingshü jakhen moidü linghen daülangpü hon meshük yahhen eshuohteke. Büpai koyei khari mepa cherubim yang paanei Vangpüshuwpü Pela kü dhümshi nyüpa, ha linghen deihpü küpjanao ejateke.

¹⁹“Hathü kemei dükei daihen shingvaishi SHEMBÜPAi ephopü aimü nyangei nyüpeih” shei Davidi e.

²⁰Davidi cheha Solomon kü, “Wong kohtuh hatü monglongtuh hatü dou düktuh. Nüng tenyem nevaijü mongtemaan; mehenangkü SHEMBÜPA Kahvang, üpa ngei chongphonya, büpa nüng mü nyüke. Hapa Phopshem dou mangtem thahshi büpai nüng kü neshaiphapih nevaijü netuhphongpih.

²¹Phopshem dou lemphü shing ngongpathü hatü Levi am hanei tem, hatü lahhinei doumin dükaokpüthü peüi sheühphahen. Nüngi ejapü peü kü lakchongbüthü hatü nanglakthüi bangkahen hih” shei eteke.