Read Phom Naga 1 SHÜPPÜKENGPÜ 29 Bible Online

1 SHÜPPÜKENGPÜ 29 - Phom Naga bible

1 SHÜPPÜKENGPÜ 29

¹David ongpai thaipü khongkü eteke, “Ngelei ha Solomon üpa Kahvangi jetepa, büpayü hashih hatü nyingpü kü manglongpü, shejao dou payü ahshi longshi nyüke; mehenangkü phopshemü shennyakei nevai shejao hayü SHEMBÜPA Kahvangei.

²Hanangkü ngelei Kahvangei shem shingvaishi ngei aokpü thahshi hon, ngin, melangnyiam, nyiam hatü pü temtepih. Ha mü lenei nyemhen onyx yaong, nyiam, ow kohpü yaong, douvang yaong lemphü, hatü marble yaong changshi temtepih.

³Anyei vaishi ngei ngelei lompü hon hatü ngin hapa shem vehen shingvaishi ngei Kahvang kü bampü nangkü;

⁴hon ton kho hük hatü ngin ton kho nyi mü pinyi hükshing phopshem bham kü ow linghen,

⁵hatü dou dükbüthüi hon shihhen kü honi, ngin shihhen kü ngini ow linghen shuohtepih. Shaang üami SHEMBÜPA kü shinnyih lak laiyei moila shuohhenang?”

⁶Hahepak kü phang kü shangjingthü, jat kü lakchongbüthü, haja hatü kho shak kübü veshan mübüthü hatü ongpalei dou kü khei vaipüthüi mongongshi shuoh.

⁷Jomi phopshem dou shingvaishi hon ton 170, ngin ton 340 dok kü, melangnyiam ton 620 dok kü hatü nyiam ton 3, 400 kü nyeishi shuoh.

⁸Üami douvang yaong ang, hathüi phopshem dou tuhshingei ha shuoh, hatü hayü Gershon am Jehiel homei veihen shuoh.

⁹Hahepak kü mongongshi, mong hük mü jomi SHEMBÜPA kü shuohpü nangkü nanglakthüi mongong hatü David ongpai longi mongong.

¹⁰Hahepak kü nanglakthü peü nyushi Davidi SHEMBÜPA kü moihimanei e, “Nüng men vihnyeih, Oh SHEMBÜPA, nedohnetenpü hamei pa Israel Kahvang.

¹¹Oh SHEMBÜPA, lupülongpü, ngan, müknyinshekhang, aokpü hatü dhemeilaüma vangsholei hatü kahdoknyülei nyupü kemei nüngei. Oh SHEMBÜPA, ongchingao nüngei, hatü nüngü lemphü shak kü shangjing.

¹²Mophimo hatü dhüm nüng leipü peinyeih; nüngü lemphü shak kü ongpa. Nüngei lakei wong hatü ngan nyüke, hatü nüngei laki longei anshihnyeih hatü peü kü wong shuohnyeih.

¹³Shaang, Oh Kahvang, hami nüng vihnyeih, hatü nüngei müknyinshekhangpü men longnyeih.”

¹⁴Shejao hapakei mongongshi moila shuohhen mü ngei üpa hatü ngelei nanglakthü üamang? Lemphü nüng leipü peinyeih hatü mehe nüngei lak leipü pei, ha-üng nüng kü yahphünyeih.

¹⁵Mehenangkü nüng touei hamphongü hamei bühipa keiha yenpa leshi nyüke; kahdoknyü kü hamei nyihthüyü vangdhüm laang kei mon, hatü monglemhen neshiü.

¹⁶Oh SHEMBÜPA hamei Kahvang, nüngei daülangpü men kü shem hük vehen shuohpü mopthü peü nüngei lak kübü peipeih hatü hathü kemei nüngei.

¹⁷Ngelei Kahvang, nüngi mongdang yemnyeih, hatü kangshangpüthü kü mongmeinyeih shei ngei nying; ngelei mongsha daülangpai ngei hathü dou mongongshi shuohpeih, hatü shaang hatouei nyupü nüngei nanglakthüi monghumei mongongshi shuohpü ngei eeteke.

¹⁸Oh SHEMBÜPA, hamei bühipa Abraham, Isak hatü Jakob Kahvang, nüngei nanglakthülei mongkü hapa keipü mükhong hatü mongdeih düngei nyuhütuh, hatü jomei mongdang nüng philei meehütuh.

¹⁹Ngelei ha Solomon kü mongdang hüki nüngei shahkung, nüngei vanglem hatü nyuhpüvenpü peü dükhen, hatü ngei dou temei tuhshuohpü phopshem vehen chudeih mongdang yah-eishuoh.

²⁰Hapheikü Davidi thaipü nanglakthü kü, “SHEMBÜPA, ammei Kahvangei men longtuh” shei e. Hanangkü jom peüi SHEMBÜPA, jomei bühipa Kahvang kü menvih; jomi SHEMBÜPA hatü ongpa touei kahdok kü aümei shateke.

²¹Nyihphei jomi SHEMBÜPA kü moila hatü jakpü moila hapakei shuoh: mohoh chebaong 1, 000, mi chebaong 1, 000, mi chebaongha 1, 000 mü yiü moila hatü lebü moilathü changshi Israel am peü shingvaishi shuoh.

²²Ha nyih jomi SHEMBÜPA touei longi mongongshi hah hatü ying. Jomi nyipabü Davidei cheha Solomon ong vaihen shingvaishi SHEMBÜPA touei thiteiphuei je hatü Zadokü ngongpa vaihen je.

²³Hapheikü chepa David ongpa kü jeiyei Solomoni SHEMBÜPAlei ong uoshing kü uo. Büpa daeisheyei dai hatü Israel am peüi büpai epü bang.

²⁴Lakchongbüthü, veshanthü hatü Davidei chehathü peüi Solomon phangkü lanei chongphohen lah.

²⁵Israel am peüi eeshi SHEMBÜPAi Solomon shangei longei anshih, hatü Israel kü shelei üpa ongpaiyao nedangpü müknyinshekhang büpa kü shuoh.

²⁶Jesselei cheha Davidi Israel am peü shak kü vanglem lem.

²⁷Büpai Israel am shak kü bong pinyi thahshi ong vai; büpai Hebronei bong nyet hatü Jerusalemei bong hapüanpüjem thahshi ong vai.

²⁸Büpa meishi behe leiyei, viüei, angeideiyei nyutü longi dhüm kohshi di, hatü cheha Solomoni büpa kü jei.

²⁹Shaang Davidi dükpü douthü chongpangpü kübü dohpü thahshi Samuel thibülei laitap, hatü Nathan thibülei laitap hatü Gad thibülei laitap kü,

³⁰büpai vanglem lempü jung peü, büpalei wong, büpai ponghahpü Israel ami heüpü douthü hatü kahdoknyü ongchingthü kü vampü jung peü nyangei nyüke.