Read Phom Naga 2 SHÜPPÜKENGPÜ 10 Bible Online

2 SHÜPPÜKENGPÜ 10 - Phom Naga bible

2 SHÜPPÜKENGPÜ 10

¹Rehoboam Shekhemei heih; mehenangkü Israel am kemei Shekhemei büpa ong vaihühen nangkü heih.

²Mechem Nebatei cheha Jeroboami ha danpa, (büpa Solomon ongpa kü nyemei Ijiplei yiüei nyu) Jeroboam Ijip leipü nyokei lei.

³Apshaphi leipü jat nanglakthüi büpa kü nyüknüng shom; Jeroboam hatü Israel am peü peiyei Rehoboam kü,

⁴“Ampai ham kü hanggovih longi kohüpeih. Hanangkü nüngi ampai ham kü shuohpü hapa hanggovih shangtükshih, shejema hami mong kempai nüng chongphohen hih” shei e.

⁵Büpai jomphong kü, “Nyih jem pheikü peikei” shei e. Hanangkü nanglakthü lüdai.

⁶Hapheikü Rehoboam ongpai chepa Solomon hepak kü chongphoei nyupü behethü nyükei chudeih hanteiteke. Büpai, “Hathü keyü mekei eshuohjü meihen kei amiyao deihnyüke?” shei phe.

⁷Jomphongi büpa kü, “Nüngi hathü nanglakthü kü bamjema, jom mongonghüei tuhjema, hatü jom kü shahmei ejema, jomü düngei nüngei chongphobüthü vaihen” shei e.

⁸Shejao behethüi eshuohpü shahnying büpai yaktüktü büpa mü chemi longpü büpalei chongphopüthü kü pheteke.

⁹Büpai jomphong kü, “Ampai ham kü kohüpü hanggovih shangtükshih shei epü nanglakthü kü mekei eshuohjü meihen khih shei amiyao deihnya?” shei phe.

¹⁰Büpa mü chemi longpü nethethüi büpa kü, “Nüng kü, ‘Ampai ham kü hanggovih kohüpeih shejao nüngi ha shangtükshih’ shei epüthü kü, ‘Ngelei lakjaang shomhayü opalei shüngkam mao longpeih.’

¹¹Opai am kü hanggovih kohüteke, ngei ha kü shao ühen. Opai am kü hanbhi-i bheiteke, shejao ngei am kü yiüjikaungkangi japhüei anghen shei etuh” shei eteke.

¹²Hanangkü Jeroboam hatü nanglakthü peü ongpai, “Nyih jem pheikü peikei” shei epükei pei. Büpai jomphong kü shahlong e.

¹³Ongpai jomphong kü behethülei chudeih shahnying yaktüktü,

¹⁴nethethülei shah yah-ei, “Opai am kü hanggovih kohüpeih, shejao ngei ha kü shao ühen; opai am kü hanbhi-i bheipeih, shejao ngei am kü yiüjikaungkangi japhüei anghen” shei e.

¹⁵Hanangkü nanglakthüi epü ongpai nebang; mehenangkü hapayü Nebatei cheha Jeroboam kü Shilon am Ahijah homei epü SHEMBÜPAlei shah dhaümhen shingvaishi hapa klüpklungei vampeyü Kahvangi mongpü hük nyuteke.

¹⁶Mechem Israel ami jomi epü kü ongpai nebangpü eepüshang, jomi ongpa kü jangei e, “David mü ham mehe hean nyüpa? Jesselei cheha mü mehe phaihan nyüpa? Laophü laophülei shem yemei leidaikemtuh, Oh Israel! Ammei shemong kü mon veihahtuh, Oh David.” Hanangkü Israel nanglakthü peü shemei leidaikem.

¹⁷Shejao Rehoboami Judahlei nyupü Israel am shak kü ong vaiteke.

¹⁸Mechem Rehoboam ongpai dou dükpüthü kü dou kü veibü Hadoram shompa, Israel ami büpa yaongi shükei jütük. Rehoboam ongpai shüshülangi koyei khari kü uotü Jerusalem yemei mokdai.

¹⁹Hanangkü Israel ami shinnyih thahshi David am shem kü khüei heihpeih.